ក្រសួងការងារ និងបណ្តុះបណ្តាលវិជ្ជាជីវៈ គ្រោងបោះឆ្នោតជ្រើសរើសយកតួលេខចុងក្រោយសម្រាប់ការដំឡើងប្រាក់ឈ្នួលគោលកម្មករឆ្នាំ២០២២ នៅសប្តាហ៍ក្រោយ បន្ទាប់ពីភាគីពាក់ព័ន្ធចរចាមិនត្រូវគ្នា។
ក្នុងលិខិតមួយចុះថ្ងៃទី២១ ខែកញ្ញា ឆ្នាំ២០២១នេះ ក្រុមប្រឹក្សាជាតិប្រាក់ឈ្នួលអប្បបរមា បានបន្តជួបចរចាត្រីភាគីជាលើកទី២ ដើម្បីកំណត់ប្រាក់ឈ្នួលអប្បបរមាសម្រាប់វិស័យកាត់ដេរនិងផលិតស្បែកជើងនៅកម្ពុជា។
លិខិតដដែលនេះបានឱ្យដឹងថា ការចរចាលើកទី២នេះ ភាគីសហជីពតំណាងឱ្យកម្មករស្នើតួលេខ២០៤ដុល្លារ និងនិយោជកស្នើ១៨៨ដុល្លារ ខណៈរដ្ឋាភិបាលស្នើ១៩២ដុល្លារ។
លិខិតដដែលបន្តថា ការចរចាលើកទី១ ខាងសហជីពស្នើតួលេខ២១៤,២៧ដុល្លារ និងនិយោជកស្នើតួលេខ១៨៣,៣ដុល្លារ។
បើតាមលិខិតនេះ ដោយសារតែការស្នើសុំតួលេខរបស់ភាគីទាំង៣មានភាពខុសគ្នាច្រើនពេក ប្រធានក្រុមប្រឹក្សាជាតិប្រាក់ឈ្នួលអប្បបរមា នឹងធ្វើការបោះឆ្នោតជ្រើសរើសយកតួលេខចុងក្រោយ នៅថ្ងៃទី២៨ ខែកញ្ញា ឆ្នាំ២០២១ ដែលមានសមាសភាពតំណាងសហជីព១៧រូប តំណាងភាគីនិយោជក១៧រូប និងតំណាងភាគីរដ្ឋាភិបាល១៧រូប។
ប្រធានសហភាពការងារកម្ពុជា លោក អាត់ ធន់ បានស្នើដល់ភាគីនិយោជកនិងរដ្ឋាភិបាលពិចារណាឡើងវិញ ចំពោះការដំឡើងប្រាក់ឈ្នួលគោលជូនកម្មករ ខណៈក្រុមសហជីពទាមទារ២០៤ដុល្លារនៅឆ្នាំ២០២២។
មេសហជីពរូបនេះលើកឡើងថា វិបត្តិជំងឺកូវីដ-១៩ ក៏បានបង្កផលប៉ះពាល់ធ្ងន់ធ្ងរដល់សេដ្ឋកិច្ចរបស់កម្មករផងដែរ ហើយប្រសិនបើការដំឡើងប្រាក់ឈ្នួលកម្មករមិនបានសមរម្យទេ នឹងធ្វើឱ្យពួកគេកាន់តែជួបការលំបាកថែមទៀត។
លោកលើកឡើងថា៖ «ខ្ញុំគិតថា និយោជកនិងរដ្ឋាភិបាលគួរតែពិនិត្យអំពីការលំបាកផ្សេងៗរបស់កម្មករ ពីព្រោះបានកាត់ប្រយោជន៍កម្មករច្រើនហើយ [….] ហើយខាងកម្មករខ្លួនឯងគួរតែធ្វើការជជែកជាមួយនិយោជក ឬក៏ជំរុញធ្វើម៉េចឱ្យមានឥទ្ធិពលនៅថ្ងៃទី២៨ហ្នឹង ធ្វើឱ្យមានការទាក់ទាញការសម្រចចិត្តខាងរដ្ឋាភិបាលបន្ថែមទៀត»។
វីអូឌី មិនអាចសុំការឆ្លើយតបពីអគ្គលេខាធិការសមាគមរោងចក្រកាត់ដេរនៅកម្ពុជា លោក ខេន លូ បានទេ នៅថ្ងៃនេះ។ ប៉ុន្តែលោកបានប្រាប់ វីអូឌី កាលពីថ្ងៃទី១៥ ខែកញ្ញា ថាវិបត្តិកូវីដ-១៩បានធ្វើឱ្យថៅកែខាតបង់ប្រាក់យ៉ាងច្រើន ដែលពិបាកក្នុងការដំឡើងប្រាក់ឈ្នួលជូនកម្មករនៅឆ្នាំក្រោយ។
តំណាងនិយោជករូបនេះលើកឡើងទៀតថា វិបត្តិកូវីដ-១៩ បានធ្វើឱ្យការចំណាយរបស់ថៅកែមានការកើនឡើង ខណៈចំណូលពីអ្នកបញ្ជាទិញមិនមានការកើនឡើង ហើយការនាំចេញកាលឆ្នាំ២០២០ បានថយចុះជាង១០ភាគរយថែមទៀតផង។
លោកបន្ថែមថា៖ «សួរថាពេលចំណាយយើងកើនឡើង និងចំណូលយើងអត់កើនឡើង សួរថា ប្រាក់ចំណូលវាកើនឡើងយ៉ាងម៉េចទៅ? ការនាំអីវ៉ាន់ចេញ ក៏ខាងសហជីពថាមានការកើនឡើងដែរ ចុម! មានការកើនឡើងពីណា? បើតួលេខផ្លូវការនៅឆ្នាំ២០២០ ថយចុះជាង១០ភាគរយហើយហ្នឹង»។
នៅឆ្នាំ២០២១នេះ រដ្ឋាភិបាលបានដំឡើងប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌកាត់ដេរ និងផលិតផលស្បែកជើងពី ១៩០ដុល្លារ ទៅ ១៩២ដុល្លារ ក្នុងមួយខែ។ បើគិតជារួម ទាំងអត្ថប្រយោជន៍ផ្សេងៗដែលមានស្រាប់ ជាមធ្យម កម្មករនិយោជិតម្នាក់ៗអាចទទួលបានប្រាក់ចំណូលយ៉ាងតិចពី ២៥០ដុល្លារ ដល់ ៣០០ដុល្លារ ក្នុងមួយខែ។
របាយការណ៍សិក្សាមួយរបស់សហជីពកម្ពុជា និងយុទ្ធនាការសម្លៀកបំពាក់ស្អាតស្អំ ចេញផ្សាយនៅខែកក្កដា ឆ្នាំ២០២១នេះ បានឱ្យដឹងថា កម្មករចំនួន៧៨៤ ០០០នាក់ ដែលធ្វើការក្នុងវិស័យកាត់ដេរសម្លៀកបំពាក់ ស្បែកជើង និងឧស្សាហកម្មស្បែក បានបាត់បង់ប្រាក់ឈ្នួលនិងប្រាក់អត្ថប្រយោជន៍ប្រមាណ១០៩លានដុល្លារ ក្នុងអំឡុងពេលការផ្ទុះឡើងនៃជំងឺកូវីដ-១៩ និងការអនុវត្តវិធានការបិទខ្ទប់រាជធានីភ្នំពេញ កាលពីខែមេសា និងខែឧសភាកន្លងទៅ៕