ក្រសួងការងារ និងបណ្ដុះបណ្ដាលវិជ្ជាជីវៈ បានណែនាំដល់ម្ចាស់រោងចក្រសហគ្រាសទាំងអស់ត្រូវធ្វើតេស្តរកវីរុសកូវីដ-១៩លើកម្មករទូទាំងប្រទេស ក្រោយពួកគេឈប់សម្រាកក្នុងពិធីបុណ្យភ្ជុំបិណ្ឌ ហើយត្រលប់ចូលធ្វើការងារវិញ។
សេចក្តីណែនាំរបស់ក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី២៨ ខែកញ្ញា ឆ្នាំ២០២១ បានលើកឡើងថា ការតម្រូវឱ្យធ្វើតេស្តនេះ ដើម្បីរក្សាបាននូវសកម្មភាពអាជីវកម្ម ផលិតកម្ម ការផ្តល់សេវាកម្ម និងការចូលរួមប្រយុទ្ធប្រឆាំង រួមទាំងទប់ស្កាត់ការរីករាលដាលទ្រង់ទ្រាយធំនៃជំងឺកូវីដ-១៩ បណ្តាលមកពីមេរោគបំប្លែងថ្មីប្រភេទ ដែលតា (Delta) នៅតាមបណ្ដារោងចក្រសគ្រាស។
ក្រសួងការងារ ក៏បានណែនាំដល់ម្ចាស់រោងចក្រសហគ្រាសឱ្យត្រៀមឧបករណ៍ធ្វើតេស្តរហ័សរកមេរោគកូវីដ-១៩ឱ្យបានគ្រប់ចំនួនសម្រាប់ធ្វើតេស្តដល់កម្មកររបស់ខ្លួន ហើយថា ការធ្វើតេស្តនេះជាបន្ទុករបស់ថៅកែរោងចក្រទាំងស្រុង។
សេចក្ដីណែនាំដដែលនេះបានរម្លឹកដល់កម្មករទាំងអស់ឱ្យចូលរួមធ្វើតេស្តរហ័សតាមការរៀបចំរបស់ម្ចាស់រោងចក្រ ហើយថា ប្រសិនបើកម្មករណាមិនព្រមចូលរួមធ្វើតេស្តទេ នឹងត្រូវចាត់ទុកថា បានល្មើសច្បាប់ធ្ងន់ធ្ងរចំពោះវិធានខាងវិន័យសន្តិសុខនិងអនាម័យ។ ក្រសួងការងារ ក៏ប្រាប់ឱ្យកម្មកររាយការណ៍ទៅក្រសួងផងដែរ ប្រសិនបើរោងចក្រសហគ្រាសណាមិនបានធ្វើតេស្តរហ័សរកមេរោគកូវីដ-១៩ជូនកម្មករ។
កម្មការិនីបម្រើការងារនៅរោងចក្រ W&D នៅរាជធានីភ្នំពេញ អ្នកស្រី ជា សុខា សាទរចំពោះវិធានការរបស់រដ្ឋាភិបាលនេះ។ អ្នកស្រីនិយាយថា ថ្ងៃឈប់សម្រាកក្នុងពិធីបុណ្យភ្ជុំបិណ្ឌនោះ កម្មករនឹងទៅលេងស្រុកកំណើត អាចនឹងមានការជួបគ្នាណាមួយ ហើយពួកគេអាចនឹងមានការឆ្លងជំងឺកូវីដ-១៩ ប្រសិនបើពួកធ្វេសប្រហែសមិនបានការពារខ្លួន។
កម្មការិនីរូបនេះក៏បង្ហាញការព្រួយបារម្ភចំពោះការឆ្លងរាលដាលជំងឺកូវីដ-១៩ដែរ ហើយថា អ្នកស្រីនិងគ្រួសារបានត្រៀមខ្លួនរួចហើយក្នុងការអនុវត្តវិធានការរបស់ក្រសួងសុខាភិបាល។
អ្នកស្រីបន្ថែមថា៖ «ការធ្វើបែបនេះ វាជាការល្អមួយដែរ សម្រាប់ការពារសុខភាពរបស់កម្មករនិងគ្រួសាររបស់យើង ពីព្រោះថា ចំពោះកម្មករម្នាក់ៗដែលគាត់ទៅស្រុកហ្នឹង គាត់ទៅ គាត់នៅតែផ្ទះឯណា! អ៊ីចឹងចំពោះបញ្ហាហ្នឹង ប្រសិនបើគេពិនិត្យអ៊ីចឹង វាក៏ជាការល្អដែរ សម្រាប់ការងារកម្មករយើងម្នាក់ៗ»។
ប្រធានរដ្ឋបាលរោងចក្រមួយនៅខេត្តបន្ទាយបានជ័យ អ្នកស្រី កែម រ៉េន មានប្រសាសន៍ថា ក្រុមហ៊ុននឹងចូលរួមអនុវត្តវិធានការនេះតាមការណែនាំរបស់ក្រសួងការងារ។
អ្នកស្រីថា៖ «ការអនុវត្តវិធានការនេះ ថៅកែមិនមានជាបញ្ហាខាតបង់អីទេនោះ ថៅកែគាត់រីករាយនឹងសហការជាមួយរដ្ឋាភិបាលហើយ»។
ដូចគ្នានេះដែរ ប្រធានរដ្ឋបាលរោងចក្រមួយនៅរាជធានីភ្នំពេញ អ្នកស្រី មាស សារ៉េត មានប្រសាសន៍ថា រោងចក្រនឹងអនុវត្តតាមសេចក្តីណែនាំរបស់រដ្ឋាភិបាល។ អ្នកស្រីថា កន្លងមក រោងចក្រនេះក៏បានអនុវត្តការធ្វើតេស្តលើកម្មកររួចម្តងមកហើយ ដោយមិនមានជាបញ្ហាអ្វីនោះទេ។
អ្នកស្រីថា៖ «ការតម្រូវឱ្យយើងចេញថ្លៃទិញឧបករណ៍នេះ វាមិនជាបញ្ហាអីទេសម្រាប់រោងចក្រយើង។ យើងអនុវត្តវិធានការនេះ ក្រោយកម្មករគាត់ត្រលប់មកបំពេញការងារវិញ»។
អគ្គលេខាធិការសមាគមរោងចក្រកាត់ដេរនៅកម្ពុជា លោក ខេន លូ បានលើកឡើងថា វិបត្តិកូវីដ-១៩ បានធ្វើឱ្យថៅកែចំណាយច្រើនទៅលើការទិញឧបករណ៍ផ្សេងៗ ដូចជា ម៉ាស់ អាល់កុល ឧបករណ៍តេស្ត និងឧបករណ៍ផ្សេងទៀត ដែលធ្វើឱ្យថៅកែបានខាតបង់ប្រាក់យ៉ាងច្រើន ខណៈចំណូលពីការបញ្ជាទិញពុំមានការកើនឡើង។
លោកបន្ថែមថា៖ «ចំណូលដែលយើងទទួលពីអ្នកបញ្ជាទិញ អត់មានការកើនឡើងទេ! ហើយចំណាយពួកយើង អ្នកណាៗក៏ដឹងថាមានការកើនឡើងដែរ ពីព្រោះយើងត្រូវអាល់កុល ត្រូវម៉ាស់ ត្រូវឧបករណ៍តេស្ត និងរបស់របរផ្សេងៗទៀត។ សួរថាចំណាយយើងកើនឡើង ហើយចំណូលអត់កើនឡើង សួរថាយើងបានប្រាក់ចំណេញពីណា»។
ប្រធានសហភាពចលនាកម្មករ លោក ប៉ាវ ស៊ីណា បានគាំទ្រទៅលើវិធានការរបស់រដ្ឋាភិបាលនេះដែរ។ លោកបារម្ភថា កម្មករ-កម្មការិនី អាចនឹងយកឱកាសថ្ងៃឈប់សម្រាកបុណ្យភ្ជុំទៅជួបជុំបងប្អូន និងទៅលេងកម្សាន្តកន្លែងផ្សេងៗដែលមានការជួបជុំមនុស្សច្រើន ដែលមានហានិភ័យខ្ពស់ពីការឆ្លងរាលដាលជំងឺកូវីដ-១៩ និងវីរុសបំប្លែងថ្មីផងដែរ។
លោកបានអំពាវនាវដល់កម្មករទាំងអស់ឱ្យមានការប្រុងប្រយ័ត្នខ្ពស់ និងអនុវត្តឱ្យបានល្អនូវវិធានការនានារបស់ក្រសួងសុខាភិបាលឬរដ្ឋាភិបាល ហើយមិនត្រូវយកឱកាសឈប់សម្រាកនោះទៅសប្បាយរីករាយភ្លេចខ្លួន ខណៈកម្រិតឆ្លងជំងឺនេះនៅកម្ពុជានៅខ្ពស់នៅឡើយនោះទេ។
លោកបន្ថែមថា៖ «ដូច្នេះ ទាំងអស់នេះ វាជាការព្រួយបារម្ភខ្លាំង មិនចំពោះតែក្រសួងការងារទេ សូម្បីតែខ្ញុំជាសហជីព ក៏ខ្ញុំគិតថា ស្ថានភាពនេះ នៅពេលដែលក្រសួងនៅរក្សាការឈប់សម្រាកដូចដើម។ យើងនៅតែមានការព្រួយបារម្ភ នៅពេលដែលមានការសប្បាយរីករាយហើយភ្លេចនូវការការពារ ភ្លេចនូវការអនុវត្តវិធានការនានារបស់ក្រសួងសុខាភិបាល វាអាចនឹងមានហានិភ័យសម្រាប់បងប្អូនកម្មករនិងក្រុមគ្រួសាររបស់ពួកគាត់ផ្ទាល់។ ហើយម្យ៉ាងទៀតអាចនឹងជួបឧបសគ្គខ្លាំងចំពោះសង្វាក់ផលិតកម្មផងដែរ»។
កាលពីថ្ងៃទី២៣ ខែកញ្ញា ឆ្នាំ២០២១ រដ្ឋាភិបាលបានចេញសេចក្ដីសម្រេចបន្ទាន់មួយ ដោយសម្រេចផ្អាកការរៀបចំពិធីបុណ្យកាន់បិណ្ឌនិងភ្ជុំបិណ្ឌ ចាប់ពីបិណ្ឌទី៤ ដែលត្រូវនឹងថ្ងៃទី២៥ ខែកញ្ញា ដើម្បីទប់ស្កាត់ការឆ្លងជំងឺកូវីដ-១៩ ក្រោយសង្កេតឃើញថា ការរៀបចំពិធីបុណ្យកាន់បិណ្ឌកន្លងទៅ មានការជួបជុំនិងប្រមូលផ្តុំមនុស្សជាច្រើននៅតាមបណ្តាវត្តអារាម ដោយមិនមានការធានាបាននូវការអនុវត្តបានត្រឹមត្រូវតាមវិធានការសុវត្ថិភាពផ្នែកសុខាភិបាល។ ប៉ុន្តែរដ្ឋាភិបាលបានអនុញ្ញាតឱ្យកម្មករឈប់សម្រាករយៈពេល៣ថ្ងៃ នៅថ្ងៃបុណ្យភ្ជុំបិណ្ឌ ចាប់ពីថ្ងៃទី៥ ដល់ថ្ងៃទី៧ ខែតុលា ឆ្នាំ២០២១៕
