រដ្ឋមន្ត្រីក្រសួងសេដ្ឋកិច្ចជប៉ុន លោក Yasutoshi Nishimura បានថ្លែងថា ប្រទេសជប៉ុននឹងដកការដាក់ប្រទេសក្នុងគ្រាអាសន្ន (State of emergency) ដោយសារជំងឺរាតត្បាតកូវីដ-១៩ នៅគ្រប់តំបន់ នៅថ្ងៃព្រហស្បតិ៍ខាងមុខនេះ ខណៈចំនួនករណីឆ្លងថ្មីបានធ្លាក់ចុះ។
ផែនការដែលត្រូវបានអនុម័តដោយក្រុមប្រឹក្សារបស់រដ្ឋាភិបាលនេះ នឹងធ្វើឱ្យប្រទេសជប៉ុនទាំងមូលចាកចេញពីការដាក់ប្រទេសក្នុងគ្រាអាសន្នក្នុងរយៈពេលជិត៦ខែ ខណៈដែលនាយករដ្ឋមន្រ្តីជប៉ុន លោក Yoshihide Suga នឹងធ្វើសន្និសីទសារព័ត៌មានមួយនៅរសៀលនេះ ដើម្បីប្រកាសពីការសម្រេចចិត្តនេះ។
ទោះជាយ៉ាងណា លោក Yasutoshi Nishimura បានឱ្យដឹងថា ការកំណត់មួយចំនួនលើភោជនីយដ្ឋាន និងការជួបជុំគ្នាក្នុងទ្រង់ទ្រាយធំ នឹងនៅតែត្រូវអនុវត្តបន្តក្នុងរយៈពេលប្រមាណជា១ខែទៀត ដើម្បីការពារការកើនឡើងនៃករណីឆ្លងថ្មីឡើងវិញ។
ទីភ្នាក់ងារសារព័ត៌មាន Reuters បានស្រង់សម្ដីរដ្ឋមន្ត្រីក្រសួងសេដ្ឋកិច្ចរូបនេះថា៖ «ករណីឆ្លងថ្មីអាចនឹងកើនឡើងវិញ បន្ទាប់ពីស្ថានភាពនៃការដាក់ប្រទេសក្នុងគ្រាអាសន្នត្រូវបានដកចេញ។ ដូច្នេះហើយ យើងត្រូវតែបន្តជាមួយនឹងវិធានការចាំបាច់មួយចំនួន ដើម្បីការពារការស្ទុះងើបឡើងវិញនៃករណីឆ្លងថ្មី»។
ដូចទៅនឹងបណ្ដាប្រទេសដទៃទៀតដែរ ប្រទេសជប៉ុនបានរងផលប៉ះពាល់ដែលបង្កដោយការឆ្លងរីករាលដាលនៃវីរុសកូវីដ-១៩ បំប្លែងខ្លួនថ្មីប្រភេទ Delta ដែលបានធ្វើឱ្យតំបន់ភាគច្រើននៅក្នុងប្រទេសស្ថិតនៅក្រោមការរឹតត្បិតយ៉ាងតឹងរ៉ឹង។
យោងតាមរដ្ឋមន្ត្រីសុខាភិបាល ករណីឆ្លងថ្មីប្រចាំថ្ងៃនៅក្នុងប្រទេសជប៉ុនបានធ្លាក់ចុះជាលំដាប់ក្នុងរយៈពេលមួយខែចុងក្រោយនេះ មកនៅត្រឹមតែ១ ១២៨ករណីនៅថ្ងៃចន្ទ បើធៀបទៅនឹងតួលេខឆ្លងប្រចាំថ្ងៃកម្រិតខ្ពស់បំផុតប្រមាណជា២៥ ០០០ករណីកាលពីពេលកន្លងទៅ ខណៈដែលប្រជាជនរបស់ខ្លួនជិត ៦០% ហើយដែលទទួលបានការចាក់វ៉ាក់សាំងពេញលេញ គិតរហូតមកដល់ពេលនេះ៕
