អតីតប្រធានគណបក្សសង្រ្គោះជាតិ លោក កឹម សុខា ដែលកំពុងនៅជាប់បណ្ដឹងនៅតុលាការនៅឡើយ លើកឡើងថា សម្រាប់លោកមិនភ្លេចឡើយបុណ្យទាន ហើយបញ្ហាវិបត្តិកូវីដ-១៩ក៏លោកមិនភ្លេចដែរ ពិសេសបញ្ហាជាតិ លោករឹតតែមិនអាចបំភ្លេចបានថែមទៀត បើទោះបីជាលោកនៅពុំទាន់មានសេរីភាពពេញលេញយ៉ាងណាក៏ដោយ។
តាមរយៈទំព័រហ្វេសប៊ុករបស់លោកនៅថ្ងៃអង្គារនេះ លោក កឹម សុខា លើកឡើងថា ថ្ងៃទី២៨ ខែកញ្ញា ឆ្នាំ២០២១ ជាថ្ងៃកាន់បិណ្ឌទី៧ លោកនិងភរិយា ព្រមទាំងសហការី បានធ្វើដំណើរមកដល់ខេត្តព្រះវិហារ។ ក្នុងដំណើរពីរថ្ងៃនេះ ក្រុមការងារលោកក៏បានយកចង្ហាន់ ទេយ្យទាន និងបច្ច័យប្រគេនព្រះសង្ឃដែលគង់នៅវត្តមួយចំនួនក្នុងខេត្តកំពង់ចាម ខេត្តកំពង់ធំ និងខេត្តព្រះវិហារផងដែរ។
លោកបន្តថា ក្នុងរដូវកាន់បិណ្ឌនិងភ្ជុំបិណ្ឌឆ្នាំនេះ ជំងឺកូវីដ-១៩នៅតែរីករាលដាលគួរឱ្យព្រួយបារម្ភដែលយើងទាំងអស់គ្នាត្រូវតែអនុវត្តនូវវិធានការសុខាភិបាលទប់ស្កាត់ការឆ្លងជំងឺនេះដោយប្រុងប្រយត្ន័។ ដូច្នេះហើយទើបក្រុមការងារលោកមិនអាចចូលទៅក្រាបថ្វាយព្រះបង្គំព្រះពុទ្ធបដិមាករ និងព្រះសង្ឃក្នុងវត្តអារាមផ្ទាល់ ដើម្បីប្រារព្ធពិធីបុណ្យកាន់បិណ្ឌនោះទេ។ ក៏ប៉ុន្តែលោកបានយកចង្ហាន់ ទេយ្យទាន និងបច្ច័យប្រគេនព្រះសង្ឃនៅត្រឹមតែខ្លោងទ្វារវត្ត ដើម្បីឧទ្ទិសកុសលផលបុណ្យជូនដល់បុព្វការីជនដែលបានចែកឋានទៅ តាមទំនៀមទម្លាប់ប្រពៃណីខ្មែរយើងដែលមានជាយូរលង់ណាស់មកហើយ។
ក្រៅពីទានយកទៅប្រគេនព្រះសង្ឃ លោក កឹម សុខា និងក្រុមការងារក៏បាននាំយកជំនួយជូនដល់ប្រជាពលរដ្ឋនៅតំបន់បិទខ្ទប់ខ្លះផងដែរ។
សម្រាប់អតីតមេបក្សប្រឆាំងរូបនេះ អះអាងថា បុណ្យទានមិនអាចភ្លេចឡើយ ហើយកូវីដ-១៩ក៏មិនអាចភ្លេចដែរ រីឯរឿងជាតិ រឹតតែមិនអាចបំភ្លេចបាន។
ហ្វេសប៊ុកលោក កឹម សុខា សរសេរថា៖ «បុណ្យក៏មិនភ្លេច ទានក៏មិនភ្លេច កូវីដ-១៩ក៏មិនភ្លេច ជាតិក៏រឹតតែមិនភ្លេច ទោះបីមិនមានសិទ្ធិសេរីភាពពេញលេញក្តី។ សូមបងប្អូនជនរួមជាតិកុំភ្លេចចូលរួមអនុវត្តវិធានការសុខាភិបាលទប់ស្កាត់ជំងឺឆ្លងកូវីដ-១៩ទាំងអស់គ្នា»។
អតីតប្រធានគណបក្សសង្រ្គោះជាតិ និងជាអតីតអនុប្រធានទី១រដ្ឋសភាកាលពីអាណត្តិទី៥ រូបនេះ ត្រូវបានកម្លាំងសមត្ថកិច្ចរបស់រដ្ឋាភិបាលចាប់ខ្លួនទាំងកណ្តាលអធ្រាត្រកាលពីថ្ងៃទី៣ ខែកញ្ញា ឆ្នាំ២០១៧ ហើយបញ្ជូនទៅឃុំខ្លួននៅពន្ធនាគារត្រពាំងផ្លុង ក្នុងខេត្តត្បូងឃ្មុំ ជាប់ព្រំដែនវៀតណាម។ ប្រមាណ១ឆ្នាំក្រោយមក លោកត្រូវបានបញ្ជូនមកឃុំខ្លួននៅក្នុងផ្ទះរបស់លោកនារាជធានីភ្នំពេញវិញ ក្រោមហេតុផលដើម្បីធានាសុខភាពរបស់លោក។
នៅចុងឆ្នាំ២០១៩ តុលាការបានសម្រេចកែប្រែលក្ខខណ្ឌដាក់លោក កឹម សុខា ឱ្យស្ថិតនៅក្រោមការត្រួតពិនិត្យតាមផ្លូវតុលាការ ដោយបានផ្តល់សេរីភាពឱ្យលោកច្រើនជាងមុន ប៉ុន្តែសិទ្ធិធ្វើនយោបាយ និងការធ្វើដំណើរចេញទៅក្រៅប្រទេសត្រូវបានហាមឃាត់ទាំងស្រុង។
គិតចាប់តាំងពីថ្ងៃចាប់ខ្លួនមកដល់ចុងខែកញ្ញានេះ លោក កឹម សុខា ត្រូវបានដកសិទ្ធិធ្វើនយោបាយរយៈពេល៤ឆ្នាំមកហើយ ខណៈសំណុំរឿងរបស់លោកត្រូវបានតុលាការសម្រេចផ្អាកដំណើរការតាំងពីដើមឆ្នាំ២០២០ រហូតមកទល់បច្ចុប្បន្ន ក្រោមហេតុផលវិបត្តិកូវីដ-១៩។
សហគមន៍ជាតិ-អន្តរជាតិ លោកសេរីមួយចំនួន តែងថ្កោលទោសរដ្ឋាភិបាលជុំវិញការចាប់ឃុំខ្លួនលោក កឹម សុខា ដោយថាជារឿងអយុត្តិធម៌។ លើសពីនេះ ពួកគេតែងជំរុញរដ្ឋាភិបាលឱ្យដោះលែង និងផ្តល់សេរីភាពផ្នែកនយោបាយដល់អតីតមេបក្សប្រឆាំងរូបនេះនិងសកម្មជនដទៃទៀតផងដែរ៕