ធនាគាអភិវឌ្ឍន៍អាស៊ី (ADB) បានអនុម័តប្រាក់កម្ចីចំនួន៨២លានដុល្លារ សម្រាប់កែលម្អផ្លូវជាតិនិងផ្លូវខេត្តប្រវែង៤៨គីឡូម៉ែត្រក្នុងខេត្តព្រៃវែង និងខេត្តកណ្ដាល ដើម្បីជំរុញការអភិវឌ្ឍសេដ្ឋកិច្ច តាមច្រករបៀងសេដ្ឋកិច្ចមហាអនុតំបន់ទន្លេមេគង្គ (GMS)។
យោងតាមសេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី (ADB) នៅថ្ងៃទី២៩ ខែកញ្ញា ឆ្នាំ២០២១ បានឱ្យដឹងថា ជំនួយថ្មីនេះគឺជាដំណាក់កាលទី២នៃគម្រោងធ្វើឱ្យប្រសើរឡើងនូវបណ្ដាញផ្លូវថ្នល់ ដែលមានបំណងពង្រឹងការតភ្ជាប់កម្ពុជាជាមួយវៀតណាម និងគាំទ្រការអភិវឌ្ឍសម្របសម្រួលការឆ្លងខេត្តទាំងពីរផងដែរ។
សេចក្តីប្រកាសព័ត៌មានបន្តថា ការធ្វើឱ្យប្រសើរថ្មីនេះនឹងប្រើប្រាស់រចនាដែលធន់នឹងគ្រោះមហន្តរាយ ធន់នឹងអាកាសធាតុ ព្រមទាំងជួយឱ្យក្រសួងសាធារណការ និងដឹកជញ្ជូន គ្រប់គ្រងផ្លូវបានល្អប្រសើរ ដោយកាត់បន្ថយការផ្ទុកលើសចំណុះយានយន្ត ដែលជារឿយៗធ្វើឱ្យខូចផ្លូវនិងនាំឱ្យមានការជួសជុលមុនពេលកំណត់។
អ្នកជំនាញផ្នែកដឹកជញ្ជូនរបស់ធនាគារអភិវឌ្ឍន៍អាស៊ី លោក Mohammad Nazrul Islam មានប្រសាសន៍ក្នុងសេចក្តីប្រកាសព័ត៌មាននោះថា ការដឹកជញ្ជូនតាមផ្លូវគោកជាមធ្យោបាយចម្បងនៃចរាចរណ៍ទំនិញនិងមនុស្សនៅក្នុងប្រទេសកម្ពុជា និងរវាងប្រទេសមហាអនុតំបន់់ទន្លេមេគង្គ។
លោកថា៖ «គម្រោងនេះនឹងពង្រីកលទ្ធភាពទទួលបានការអប់រំ សេវាសុខភាព ក៏ដូចជាសេវាកម្មសាធារណៈដទៃទៀត ក្នុងចំណោមសហគមន៍មូលដ្ឋាន ជាពិសេសពលរដ្ឋក្រីក្រនៅតាមជនបទ។ វាក៏នឹងជួយតភ្ជាប់កាន់តែប្រសើរទៅនឹងទីផ្សារ និងឱកាសសេដ្ឋកិច្ចតាមរយៈបណ្ដាញផ្លូវថ្នល់ប្រកបដោយសុវត្ថិភាពនិងធន់នឹងអាកាសអាតុ ដែលតភ្ជាប់កម្ពុជាជាមួយវៀតណាមតាមច្រករបៀងសេដ្ឋកិច្ចខាងត្បូងនៃមហាអនុតំបន់ទន្លេមេគង្គ»។
ADB បានលើកឡើងថា សេដ្ឋកិច្ចកម្ពុជាចាប់ពីឆ្នាំ១៩៩៨ដល់ឆ្នាំ២០១៩ ជាមធ្យម បានកើនដល់ ៧,៨% ក្នុងមួយឆ្នាំ ប៉ុន្តែបានធ្លាក់ចុះ ៣,១% នៅឆ្នាំ២០២០ ដោយសារជំងឺរាតត្បាតកូវីដ-១៩។
ប្រភពដដែលបន្តថា វិស័យដឹកជញ្ជូនរបស់ប្រទេសប្រឈមនឹងបញ្ហាដូចជា ការវិនិយោគលើហេដ្ឋារចនាសម្ព័ន្ធមិនគ្រប់គ្រាន់ និងបញ្ហានិរន្តរភាព។ ដោយឡែក ផ្លូវជនបទនិងផ្លូវខេត្តភាគច្រើនរបស់កម្ពុជាមិនទាន់ឈូសឆាយឱ្យបានស្អាតត្រឹមត្រូវ ហើយសមត្ថភាពផ្លូវជាតិនៅមានកំណត់ថែមទៀតផង៕
