របាយការណ៍ក្រសួងកសិកម្ម ឱ្យដឹងថា ក្នុងរយៈពេល៩ខែឆ្នាំ២០២១នេះ ការនាំចេញកសិផលសរុបកម្ពុជា មានកំណើនចំនួន៨៨,៤៨% ខណៈការនាំចេញអង្ករមានការថយចុះចំនួន១៥,៩៧%។
យោងតាមលទ្ធផលនៃការនាំចេញកសិផលទៅក្រៅប្រទេស ដែលរដ្ឋមន្ត្រីក្រសួងកសិកម្មបានផ្សព្វផ្សាយលើទំព័រហ្វេសប៊ុករបស់លោកនៅថ្ងៃសុក្រនេះ បានឱ្យដឹងថា ការនាំចេញកសិផលកម្ពុជាទៅក្រៅប្រទេសនៅក្នុងរយៈពេល៩ខែ ឆ្នាំ២០២១នេះ មានការកើនឡើងចំនួន ២ ៧៨៥ ២៣១,៥៧តោន ស្មើនឹង ៨៨,៤៨% បើធៀបនឹងរយៈពេលដូចគ្នាក្នុងឆ្នាំ២០២០ ដែលទទួលបានត្រឹមតែ ៣ ១៤៧ ៦៩១,៨៦តោន។
លោកបន្តថា ការនាំចេញនេះមានបរិមាណសរុប ៥ ៩៣២ ៩២៣,៤៣តោន ទៅកាន់ប្រទេសចំនួន៦៨។ ប៉ុន្តែទោះជាយ៉ាងនេះក្តី លោកថា ការនាំចេញអង្ករមានការថយចុះចំនួន -១៥,៩៧% ហើយការថយចុះនេះបណ្តាលមកពីកម្ពុជាជួបបញ្ហាប្រឈមនឹងកង្វះប្រភេទទូកុងតឺន័រដែលមានទំហំ២០ហ្វិតសម្រាប់ផ្ទុកអង្ករ និងតម្លៃដឹកជញ្ជូនកើនឡើង។
សូមជម្រាបជូនថា កសិផលសំខាន់ៗដែលកម្ពុជានាំចេញទៅក្រៅប្រទេស រួមមាន អង្ករ អង្ករក្រអូប និងកសិផលក្រៅពីស្រូវ-អង្ករ ដែលរួមមាន ចំណិតដំឡូងមីក្រៀម ដំឡូងមីស្រស់ ម្សៅដំឡូងមី កាកសំណល់ដំឡូងមី គ្រាប់ស្វាយចន្ទី គ្រាប់ពោត គ្រាប់សណ្ដែកបាយ គ្រាប់សណ្ដែកសៀង ផ្លែចេកស្រស់ ផ្លែក្រូចថ្លុង ផ្លែស្វាយស្រស់ ដំណាប់ស្វាយ ទឹកស៊ីរ៉ូស្វាយ ដូងប្រេង ម្រេច ថ្នាំជក់ បន្លែចម្រុះ ម្ទេសស្រស់ ម្ទេសក្រៀម រួមនឹងផលិតផលចំនួន៧៤មុខផ្សេងទៀត ដែលមានចំនួន១៥២ ៩៤៦,៤៤តោន។
តាមការប៉ាន់ស្មាន តម្លៃនៃការនាំចេញរបស់កម្ពុជានៅក្នុងរយៈពេល៩ខែឆ្នាំ២០២១នេះ មានចំនួន៣ ៤៨៩ ៧៧៦ ៩៩៩,០៥ដុល្លារអាមេរិក។ ក្នុងនោះ ការនាំចេញអង្ករមានចំនួន៣៤៩ ៩១៤ ៦៩៦ដុល្លារអាមេរិក ការនាំចេញស្រូវមានចំនួន៤២៨ ៩៥៤ ៧១០ដុល្លារអាមេរិក និងការនាំចេញកសិផលក្រៅពីស្រូវ-អង្ករ មានចំនួន២ ៧១០ ៩០៧ ៥៩៣,០៥ដុល្លារអាមេរិក៕
