បុគ្គលិកអះអាងថា កាស៊ីណូដឹសេនជូនរី នៅខេត្តព្រះសីហនុ បានផ្អាកការងារបុគ្គលិកមួយរយៈ ក្រោយមានបុគ្គលិកម្នាក់ស្លាប់ និងច្រើននាក់ទៀតឆ្លងជំងឺកូវីដ-១៩។
កាលពីថ្ងៃទី៣០ ខែកញ្ញា ឆ្នាំ២០២១ រដ្ឋបាលខេត្តព្រះសីហនុ បានចេញសេចក្តីបញ្ជាក់មួយដោយលើកឡើងថា បុគ្គលិកជាស្ត្រីមា្នក់ឈ្មោះ ហៀន ស្រីនិច អាយុ២៨ឆ្នាំ ដែលបម្រើការក្នុងកាស៊ីណូ ដឹសេនជូរី បានស្លាប់ដោយសារការពុលអាហារ និងបាត់បង់ជាតិទឹកច្រើនពេក ខណៈបុគ្គលិកជាច្រើននាក់ផ្សេងទៀតបានឆ្លងជំងឺកូវីដ-១៩។
បុគ្គលិកកាស៊ីណូដឹសេនជូរី អ្នកស្រី ហ៊ឹម ហេង ប្រាប់ វីអូឌី នៅថ្ងៃអង្គារនេះថា ក្រោយមានបុគ្គលិកម្នាក់ស្លាប់ ខាងអាជ្ញាធរបានឱ្យម្ចាស់កាស៊ីណូផ្អាកការងារបុគ្គលិកបណ្ដោះអាសន្ន និងបានដោះស្រាយបញ្ហាផ្សេងៗជូនបុគ្គលិកផងដែរ។ អ្នកស្រីថា ពេលនេះអាជ្ញាធរបានរៀបចំឱ្យមានគ្រូពេទ្យប្រចាំការ និងមានអាហារហូបចុកគ្រប់គ្រាន់ឡើងវិញហើយ។
អ្នកស្រីបន្ថែមថា៖ «អាជ្ញាធរបានប្រាប់ក្រុមហ៊ុនតាំងពីថ្ងៃទី៣០ ខែកញ្ញាម្ល៉េះ ក្រោយបុគ្គលម្នាក់ស្លាប់ ហើយឥលូវមានក្រុមគ្រូពេទ្យប្រចាំការគ្រប់គ្រាន់ដែរ។ ដូចខ្ញុំប្រាន់បងអ៊ីចឹង ពីមុន នៅកាស៊ីណូនេះអត់មានគ្រូពេទ្យប្រចាំការទេ ប៉ុន្តែពេលរឿងហ្នឹងផ្សព្វផ្សាយ អាជ្ញាធរបានដោះស្រាយឱ្យអស់ហើយ។ ឥលូវអត់មានបញ្ហាអីទៀតទេ»។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បញ្ជាក់ថា កាស៊ីណូនេះបានផ្អាកមួយរយៈពិតមែន ក្រោយរកឃើញបុគ្គលិកច្រើននាក់ឆ្លងជំងឺកូវីដ-១៩។
កាលពីថ្ងៃទី២៦ ខែកញ្ញា ឆ្នាំ២០២១ អាជ្ញាធរខេត្តព្រះសីហនុ បានសម្រេចយកទីតាំងកាស៊ីណូ ដឹសេនជូរី ធ្វើជាមណ្ឌលធ្វើចត្តាឡីស័ក និងជាកន្លែងព្យាបាលអ្នកជំងឺកូវីដ-១៩ ក្រោយពិនិត្យឃើញបុគ្គលិកបម្រើការងារនៅកាស៊ីណូនេះឆ្លងជំងឺកូវីដ-១៩ច្រើនពេក ប៉ុន្តែក៏បានផ្តល់ជម្រើសដល់អ្នកជំងឺក្នុងការជ្រើសរើសកន្លែងព្យាបាលផងដែរ ថាពួកគេចង់ព្យាបាលនៅទីនេះឬទៅសម្រាកព្យាបាលនៅមន្ទីរពេទ្យខាងក្រៅ។
រដ្ឋបាលខេត្តអះអាងថា អ្នកជំងឺសម្រាកព្យាបាលនៅកន្លែងកាស៊ីណូនេះត្រូវបានក្រុមគ្រូពេទ្យចុះពិនិត្យព្យាបាលដោយយកចិត្តទុកដាក់និងតាមដានសុខភាពអ្នកជំងឺជាប្រចាំ ហើយមានការផ្តល់អាហារ៤ពេលពីម្ចាស់កាស៊ីណូផងដែរ ប៉ុន្តែបុគ្គលិកអះអាងថា មុនមានមានអ្នកស្លាប់ ពួកគេជាង៤០០នាក់ ត្រូវបានបង្ខាំងឱ្យធ្វើការងារទាំងឈឺនៅក្នុងកាស៊ីណូ និងពុំមានគ្រូពេទ្យប្រចាំការគ្រប់គ្រាន់ថែមទៀត។
បុគ្គលិកទាំងនោះថែមទាំងបានចោទថៅកែថា មិនអនុញ្ញាតឱ្យបុគ្គលិកយកអាហារឬថ្នាំពេទ្យពីខាងក្រៅចូលទៅក្នុងកាស៊ីណូនោះទេ ដោយឱ្យបុគ្គលិកហូបអាហារដែលផ្តល់ដោយកាស៊ីណូ ហើយថា បុគ្គលិកប្រមាណ៤០០នាក់នោះបានឆ្លងជំងឺកូវីដ-១៩ស្ទើរទាំងអស់ និងធ្លាប់មានករណីបុគ្គលិកដួលសន្លប់ផងដែរ៕