មន្ត្រីជាន់ខ្ពស់រដ្ឋាភិបាលអះអាងថា សាររបស់លោក សម រង្ស៊ី ប្រធានអតីតគណបក្សសង្គ្រោះជាតិ គ្មានឥទ្ធិពលអូសទាញដល់ប្រជាពលរដ្ឋឱ្យប្រឆាំងនឹងរដ្ឋាភិបាលឡើយ។
ការអះអាងនេះធ្វើឡើងបន្ទាប់ពីលោក សម រង្ស៊ី អំពាវនាវជាថ្មីទៀតឱ្យកងកម្លាំងនិងប្រជាពលរដ្ឋ ប្រឆាំងរដ្ឋាភិបាល ក្រោមហេតុផលថា ដើម្បីទប់ស្កាត់អំពើពុករលួយ អយុត្តិធម៌សង្គម និងរៀបចំប្រទេសឡើងវិញ ដើម្បីឱ្យពលរដ្ឋទទួលបាននូវលទ្ធិប្រជាធិបតេយ្យពិតប្រាកដ។
តាមរយៈសេចក្ដីថ្លែងការណ៍ចុះថ្ងៃទី៥ ខែតុលានេះ មេដឹកនាំអតីតគណបក្សសង្គ្រោះជាតិ លោក សម រង្ស៊ី បានលើកឡើងថា លោកនាយករដ្ឋមន្ត្រី ហ៊ុន សែន បានទិញសញ្ជាតិនិងលិខិតឆ្លងដែនពីប្រទេសមួយនៅទ្វីបអឺរ៉ុប (ប្រទេសសាយប្រឺ / Cyprus) ដើម្បីរត់ចោលប្រជាពលរដ្ឋ។
សេចក្ដីថ្លែងការណ៍លោកសម រង្ស៊ី បន្តថា៖ «[លោក] ហ៊ុន សែន ដឹងយ៉ាងច្បាស់ថា របបផ្ដាច់ការ ពុករលួយ និងក្បត់ជាតិរបស់គាត់ ចូលមកដល់ទីបញ្ចប់របស់វាហើយ ដែលជាហេតុធ្វើឱ្យគាត់ត្រៀមលក្ខណៈរត់ចេញពីប្រទេសកម្ពុជាទៅរកកន្លែងសុវត្ថិភាព និងចាយលុយពុករលួយរាប់ពាន់លានដុល្លារជាមួយក្រុមគ្រួសារគាត់នៅឯបរទេស។ ប្រជាពលរដ្ឋ រួមទាំងកម្លាំងប្រដាប់អាវុធត្រូវតែជំរុញឱ្យ [លោកនាយករដ្ឋមន្ត្រី] ហ៊ុន សែន ដួលរលំកាន់តែឆាប់កាន់តែល្អ ដើម្បីចៀសវាងកុំឱ្យបុគ្គលនិងក្រុមគ្រួសារគាត់អាចលួចក្រាញអំណាច ដោយភូតភរនិងបោកប្រាស់បញ្ឆោតរាស្រ្តដូចពួកគេធ្វើបច្ចុប្បន្ន»។
ប៉ុន្តែប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន មានប្រសាសន៍នៅថ្ងៃទី០៦ ខែតុលានេះថា រដ្ឋាភិបាលមិនឆ្លើយឆ្លងជាមួយអតីតបក្សប្រឆាំងទៀតទេ ដោយថា សម្រាប់លោក សម រង្ស៊ី តុលាការបានសម្រេចផ្ដន្ទាទោសរួចហើយ បើសិនជាលោកចូលកម្ពុជា សមត្ថកិច្ចនឹងចាប់ខ្លួន។ លោកចាត់ទុកសាររបស់លោក សម រង្ស៊ី ថាគ្មានឥទ្ធិពលអ្វីដើម្បីអូសទាញដល់ប្រជាពលរដ្ឋឱ្យប្រឆាំងនឹងរដ្ឋាភិបាលឡើយ។
លោកថា៖ «គាត់គ្មានឥទ្ធិពលមកបំបះបំបោល ពីព្រោះស្អីដដែល សកម្មភាពដែលជាសេចក្ដីប៉ងប្រាថ្នានៃទិសដៅគាត់ដដែលពីដដែល ជាមួយ៩វិច្ឆិកា [គម្រោងចូលប្រទេសរបស់លោក សម រង្ស៊ី] ដូច្នេះគ្មានន័យអីទេ ពីព្រោះកម្ពុជាបានអនុម័តទាំងអស់គ្នា ជាចរិតនយោបាយរបស់កម្ពុជាដែលប្រជាពលរដ្ឋលោកអនុវត្ត គឺការបោះឆ្នោតរវាង៥ឆ្នាំម្ដង។ ការបោះឆ្នោតទៀងទាត់តាមអ្វីដែលយើងរៀបចំរួចស្រេចអស់ហើយ ដូច្នេះគ្មានអ្វីកែប្រែនោះទេ»។
លោកនាយករដ្ឋមន្ត្រី ហ៊ុន សែន នៅថ្ងៃអង្គារនេះ បានសរសេរលើទំព័រហ្វេសប៊ុកផ្លូវការរបស់លោក ហាក់ឆ្លើយតបនឹងលោក សម រង្ស៊ី ថា ដើម្បីបង្ហាញនូវការស្មោះត្រង់ចំពោះជាតិ និងបញ្ចៀសនូវការជ្រៀតជ្រែកពីបរទេស ថ្នាក់ដឹកនាំជាតិដែលកាន់តួនាទីជាប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ ត្រូវមានសញ្ជាតិខ្មែរតែមួយ។
ចំពោះរឿងនេះ លោកបានប្រគល់ការងារឱ្យរដ្ឋមន្ត្រីក្រសួងយុត្តិធម៌ លោក កើត រិទ្ធ សិក្សារៀបចំធ្វើសេចក្ដីព្រាងច្បាប់វិសោធនកម្មរដ្ឋធម្មនុញ្ញ ឬសេចក្តីព្រាងច្បាប់អង្គការ ដែលចេញពីរាជរដ្ឋាភិបាល ឬជាសេចក្ដីស្នើច្បាប់ដែលចេញពីព្រឹទ្ធសភានិងរដ្ឋសភា។
អ្នកវិភាគនយោយ លោកបណ្ឌិត មាស នី ចាត់ទុកការលើកឡើងរបស់មេដឹកនាំគណបក្សនយោបាយទាំងពីរ មិនបានផ្ដល់ផលប្រយោជន៍អ្វីដល់ប្រទេសជាតិឡើយ និងមិនធ្វើឱ្យមានដំណោះស្រាយឈានទៅរកការផ្សះផ្សាជាតិដដែល។
លោកថា៖ «នយោបាយនេះជានយោបាយមួយធ្វើឱ្យមានភាពទាល់ច្រកក្នុងដំណោះស្រាយនយោបាយខ្មែរបច្ចុប្បន្ន ដោយសារមេដឹកនាំខ្មែរគាត់បានផ្ដោតការតតាំងប្រឈមគ្នាតាមបែបបុគ្គលជាជាងការឈានទៅរកការបង្រួបបង្រួមជាតិ។ ដូច្នេះ ត្រង់ហ្នឹង ធ្វើឱ្យការផ្សះផ្សាជាតិពិបាកណាស់ បើសិនជាមេដឹកនាំខ្មែរយើងបង្ហាញនូវការយកឈ្មោះផ្ទាល់ខ្លួន ដើម្បីយកប្រៀបនយោបាយជាមួយគ្នា»។
គណបក្សសង្រ្គោះជាតិ ត្រូវបានតុលាការកំពូលរំលាយចោល កាលពីថ្ងៃទី១៧ ខែវិច្ឆិកា ឆ្នាំ២០១៧ ខណៈអតីតមន្ត្រីជាន់ខ្ពស់បក្សសង្រ្គោះជាតិ ចំនួន១១៨នាក់ ក៏ត្រូវបានតុលាការកំពូលដាក់បម្រាមមិនឱ្យធ្វើនយោបាយរយៈពេល៥ឆ្នាំ។ តែបច្ចុប្បន្ន មានអតីតមន្ត្រីជាន់ខ្ពស់បក្សសង្គ្រោះជាតិមួយចំនួនទទួលបានសិទ្ធិធ្វើនយោបាយឡើងវិញ ក្រោយពីដាក់ពាក្យស្នើសុំ។
ក្រោយពីគណបក្សនេះត្រូវបានរំលាយនោះ អតីតសកម្មជនគណបក្សសង្រ្គោះជាតិត្រូវបានអាជ្ញាធរចាប់ខ្លួនដាក់ពន្ធនាគារជាបន្តបន្ទាប់ ដែលពួកគេទាំងនោះត្រូវបានតុលាការចោទប្រកាន់ពីបទ «រួមគំនិតក្បត់ជាតិ» និង «ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម» ជាដើម៕