លោក សម រង្ស៊ី និងមន្រ្តីជាន់ខ្ពស់អតីតគណបក្សសង្គ្រោះជាតិចំនួន៣រូបទៀតបានរងការចោទប្រកាន់ពីតុលាការកម្ពុជាចំនួន២ករណីថែមទៀតពីបទ “រួមគំនិតក្បត់” និង “ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” បន្ទាប់ពីលោក សម រង្ស៊ី បានអំពាវនាវដោយបង្កប់ខ្លឹមសារ “រៀបចំផែនការផ្តួលរំលំរដ្ឋាភិបាលកម្ពុជា” ដោយប្រើប្រាស់ព័ត៌មានបំផ្លើសខុសពីការពិត។
ក្នុងសេចក្ដីប្រកាសព័ត៌មានចុះថ្ងៃទី៧ ខែតុលា ឆ្នាំ២០២១ អយ្យការអមសាលាដំបូងរាជធានីភ្នំពេញ បានសម្រេចចោទប្រកាន់លោក សម រង្ស៊ី, លោក អេង ឆៃអ៊ាង, លោកស្រី មូរ សុខហួរ, លោក ហូរ វ៉ាន់ និងមន្រ្តីនៃអតីតគណបក្សសង្គ្រោះជាតិផ្សេងទៀត ពីបទ “រួមគំនិតក្បត់” និង “ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” តាមមាត្រា៤៥៣ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា។
កាលពីថ្ងៃទី៥ ខែតុលា លោក សម រង្ស៊ី បានសរសេរសារនៅលើហ្វេសប៊ុក ដោយភ្ជាប់នូវសេចក្ដីថ្លែងការណ៍របស់គណបក្សសង្គ្រោះជាតិ ដែលបានលើកឡើងថា លោកនាយករដ្ឋមន្ត្រី ហ៊ុន សែន មានបំណងរត់ចោលប្រទេសកម្ពុជា។ តាមរយៈសារនេះ លោកបានអំពាវនាវឱ្យប្រជារាស្ត្រខ្មែរនិងកងកម្លាំងប្រដាប់អាវុធជំរុញឱ្យរបបលោកនាយករដ្ឋមន្ត្រី ហ៊ុន សែន ដួលរលំកាន់តែឆាប់កាន់តែល្អ និងថាដល់ពេលហើយដែលត្រូវរៀបចំប្រទេសកម្ពុជាឡើងវិញ ដើម្បីឱ្យប្រជាពលរដ្ឋខ្មែរបានស្គាល់នូវលទ្ធិប្រជាធិបតេយ្យពិតប្រាកដ ធានានូវសេរីភាព យុត្តិធម៌ និងភាពរុងរឿង។
តាមសេចក្ដីប្រកាសព័ត៌មានរបស់អយ្យការអមសាលាដំបូងរាជធានីភ្នំពេញ បានលើកឡើងថា បទចោទប្រកាន់ថ្មីទាំង២នេះធ្វើឡើងដោយផ្អែកលើអង្គហេតុដែលប្រធានស្ដីទីអតីតគណបក្សប្រឆាំងដែលកំពុងរស់នៅដោយនិរទេសខ្លួននៅបរទេស បានបង្ហោះសារតាមបណ្ដាញសង្គម Facebook នៅថ្ងៃទី៥ ខែតុលា ឆ្នាំ២០២១នេះ។ ក្នុងលិខិតនោះ អយ្យការអមសាលាដំបូងរាជធានីភ្នំពេញ បានចាត់ទុកថា សារនោះបានបង្កប់ខ្លឹមសារ “រៀបចំផែនការផ្តួលរំលំរាជរដ្ឋាភិបាលកម្ពុជា” ដោយប្រើប្រាស់ព័ត៌មានបំផ្លើសខុសពីការពិត។
វីអូឌី នៅមិនទាន់អាចទាក់ទងសុំការឆ្លើយតបពីលោក សម រង្ស៊ី និងមន្ត្រីជាន់ខ្ពស់អតីតគណបក្សសង្គ្រោះជាតិ ដែលកំពុងរងបណ្ដឹងថ្មីនេះបាននៅឡើយទេ។
អតីតប្រមុខដឹកនាំគណបក្សប្រឆាំង លោក សម រង្ស៊ី បន្ទាប់ពីលោកបានរត់ភៀសខ្លួនទៅប្រទេសបារាំងជាថ្មីនៅឆ្នាំ២០១៥ កំពុងរឹតរួតដោយបណ្ដឹងនៅក្នុងតុលាការជាបន្តបន្ទាប់ រួមមាន បណ្ដឹងបរិហារកេរ្តិ៍ រួមគំនិតក្បត់ ញុះញង់បង្កភាពវឹកវរក្នុងសង្គម និងបទប្រមាថព្រះមហាក្សត្រ ជាដើម៕