ធនាគារអភិវឌ្ឍន៍អាស៊ី (ADB) បានប្រកាសថា ខ្លួនកំពុងបង្កើនមហិច្ឆតាក្នុងការផ្ដល់ហិរញ្ញប្បទានឬប្រាក់កម្ចីអាកាសធាតុដល់ប្រទេសកំពុងអភិវឌ្ឍន៍ជាសមាជិករបស់ខ្លួន ក្នុងនោះមានទាំងកម្ពុជាផងដែរ។
តាមសេចក្ដីប្រកាសព័ត៌មាននៅថ្ងៃទី១៣ ខែតុលា ឆ្នាំ២០២១នេះ ADB បានបង្ហាញពីមហិច្ឆតាបង្កើនថវិកាហិរញ្ញប្បទានអាកាសធាតុឱ្យដល់១០០ពាន់លានដុល្លារដល់ប្រទេសកំពុងអភិវឌ្ឍន៍សម្រាប់ឆ្នាំ២០១៩-២០៣០ ដើម្បីឆ្លើយតបតាមការអំពាវនាវរបស់អ្នកពាក់ព័ន្ធ ខណៈវិបត្តិអាកាសធាតុកាន់តែអាក្រក់ទៅៗជារៀងរាល់ថ្ងៃ។
ប្រធានធនាគារអភិវឌ្ឍន៍អាស៊ី លោក Masatsugu Asakawa មានប្រសាសន៍ថា៖ «ការប្រយុទ្ធប្រឆាំងនឹងការប្រែប្រួលអាកាសធាតុនៅអាស៊ីនិងប៉ាស៊ីហ្វិក នឹងឈ្នះឬក៏ចាញ់។ វិបត្តិអាកាសធាតុកាន់តែអាក្រក់ទៅៗជារៀងរាល់ថ្ងៃ ដែលជំរុញឱ្យអ្នកពាក់ព័ន្ធជាច្រើនអំពាវនាវឱ្យមានការបង្កើនហិរញ្ញវត្ថុគាំទ្រផ្នែកអាកាសធាតុ។ យើងកំពុងចាត់វិធានការ ដើម្បីឆ្លើយតបតាមការអំពាវនាវនេះ ដោយបង្កើនមហិច្ឆតារបស់យើងដល់១០០ពាន់លានដុល្លារសម្រាប់ហិរញ្ញវត្ថុអាកាសធាតុ ត្រឹមឆ្នាំ២០៣០ ដោយប្រើធនធានរបស់យើងផ្ទាល់»។
តាមសេចក្ដីប្រកាសព័ត៌មានដដែល ADB អះអាងថា កាលពីឆ្នាំ២០១៨ ខ្លួនបានប្ដេជ្ញាធានាយ៉ាងហោច ៧៥% នៃចំនួនប្រតិបត្តិការសរុបរបស់ខ្លួនគាំទ្រសកម្មភាពទាក់ទងនឹងអាកាសធាតុ ហើយធនធានហិរញ្ញវត្ថុអាកាសធាតុរបស់ខ្លួនឈានដល់យ៉ាងហោចណាស់៨០ពាន់លានដុល្លារនៅឆ្នាំ២០៣០។
បើតាមសេចក្ដីប្រកាសព័ត៌មាន ADB ថាមហិច្ឆតាហិរញ្ញវត្ថុដែលបានបង្កើននេះ គឺជាផ្នែកសំខាន់នៃកិច្ចខិតខំប្រឹងប្រែងរបស់ ADB ក្នុងការគាំទ្រដល់ប្រទេសកំពុងអភិវឌ្ឍន៍ជាសមាជិករបស់ខ្លួន (DMCs) ជាមួយការប្រឈមមុខនឹងបញ្ហាប្រទាក់ក្រឡាគ្នានៃជំងឺរាតត្បាតកូវីដ-១៩ និងវិបត្តិអាកាសធាតុ ដែល DMCs ជាច្រើនកំពុងចាត់វិធានការយ៉ាងម៉ឺងម៉ាត់ ដើម្បីលើកកម្ពស់ការងើបឡើងវិញប្រកបដោយពណ៌បៃតង ធន់ និងបរិយាប័ន្ន៕