របាយការណ៍ពីក្រសួងមហាផ្ទៃ ឱ្យដឹងថា សមត្ថកិច្ចជំនាញបានបង្ក្រាបបទល្មើសគ្រឿងញៀនសរុបចំនួន៥៣៩ករណី នៅក្នុងរយៈពេលពេញមួយខែកញ្ញា ឆ្នាំ២០២១ ដែលចំនួននេះមានការកើនឡើងជិត១០០ករណី ឬស្មើនឹង២២,៥ភាគរយ បើធៀបនឹងខែសីហា។
រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងពីរបាយការណ៍លទ្ធផលនៃកិច្ចប្រតិបត្តិការបង្ក្រាបគ្រឿងញៀនក្នុងខែកញ្ញា លើទំព័រហ្វេសប៊ុករបស់លោក នៅថ្ងៃម្សិលមិញថា សមត្ថកិច្ចជំនាញ បានបង្ក្រាបករណីគ្រឿងញៀនបានចំនួន៥៣៩ករណី ដែលចំនួននេះកើនឡើងជាងខែសីហា ចំនួន៩៩ករណី។
តែយ៉ាងណា លោកបន្តថា សម្រាប់គ្រឿងញៀនដែលរឹបអូសក្នុងបទល្មើសមានការថយចុះ ដោយនៅខែកញ្ញា សមត្ថកិច្ចរឹបអូសបានគ្រឿងញៀនសរុបជាង២៦គីឡូក្រាម ខណៈខែសីហា រឹបអូសបានជាង៥៧គីឡូក្រាម ដែលចំនួននេះថយចុះជាង៣១គីឡូក្រាម ស្មើនឹងជាង៥៤ភាគរយ។
លោក ស ខេង បន្តក្នុងហ្វេសប៊ុករបស់លោកថា ចំពោះប្រភេទគ្រឿងញៀនដែលបង្ក្រាបបាន រួមមាន មេតំហ្វេតាមីនក្រាមម្សៅ ជាង១៣គីឡូក្រាម, មេតំហ្វេតាមីនគ្រាប់ជាង១៣១ក្រាម, អ៊ិចស្តាស៊ីជាង៨គីឡូក្រាម, កេតាមីនជាង១គីឡូក្រាម, Nimetazepam ជាង១គីឡូក្រាម, សារធាតុគីមីផ្សំជាង៤គីឡូក្រាម និងកញ្ឆាស្ងួតជាង៤គីឡូក្រាម។
ក្រៅពីការរឹបអូសបានគ្រឿងញៀន លោកថា សមត្ថកិច្ចជំនាញក៏បានឃាត់ខ្លួនជនសង្ស័យសរុបចំនួន១ ០៣៩នាក់ (ស្រី៧៣នាក់) និងជនបរទេស៤១នាក់ ដែលចំនួននេះកើនលើស១៧៨នាក់ ស្មើនឹង២០,៦ភាគរយ បើធៀបនឹងខែសីហាដែលមានចំនួន៨៦១នាក់។
រដ្ឋមន្ត្រីក្រសួងមហាផ្ទៃ ក៏បានអំពាវនាវដល់សាធារណជនចូលរួមគាំទ្រនិងអនុវត្តពាក្យស្លោកជាតិ «៣ការពារ និង ១រាយការណ៍» ដើម្បីចូលរួមទប់ស្កាត់បទល្មើសគ្រឿងញៀនឱ្យមានប្រសិទ្ធភាព ក្នុងនោះមាន កុំពាក់ព័ន្ធ (កុំជួញដូរ កុំចែកចាយ កុំធ្វើខ្នងបង្អែក កុំគប់គិត និងកុំប្រើប្រាស់គ្រឿងញៀន) កុំអន្តរាគមន៍ (កុំរារាំងការអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឫមិត្តភក្តិក៏ដោយ) និងកុំលើកលែង (កុំបន្ធូរបន្ថយការអនុវត្តច្បាប់ចំពោះឧក្រិដ្ឋជនគ្រឿងញៀន ហើយសមត្ថកិច្ចពាក់ព័ន្ធទាំងអស់ត្រូវអនុវត្តច្បាប់ដោយម៉ឺងម៉ាត់និងស្មោះត្រង់វិជ្ជាជីវៈរបស់ខ្លួន ហើយជនគ្រប់រូបត្រូវគោរពនិងអនុវត្តច្បាប់) និង១រាយការណ៍ (ត្រូវរាយការណ៍ ផ្ដល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិតនិងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច)៕