ពលរដ្ឋរងផលប៉ះពាល់ពីគម្រោងផ្លូវល្បឿនលឿនភ្នំពេញ-ព្រះសីហនុមួយចំនួន តាមបណ្ដោយមហាវិថីឈ្នះឈ្នះ ឬផ្លូវកប់ស្រូវ ក្នុងខណ្ឌពោធិ៍សែនជ័យ រាជធានីភ្នំពេញ ខកចិត្តចំពោះការដែលអាជ្ញាធរបានវាយកម្ទេចផ្ទះពួកគេ ដោយមិនព្រមផ្ដល់សំណងសមរម្យដែលអាចទទួលយកបាន។
អាជ្ញាធររាជធានីភ្នំពេញ កាលពីថ្ងៃពុធ ទី២៧ ខែតុលា ឆ្នាំ២០២១ បានបញ្ជូនកម្លាំងជាង២រយនាក់ និងគ្រឿងចក្រទៅរុះរើ វាយកម្ទេចផ្ទះប្រជាពលរដ្ឋរាប់សិបគ្រួសារ ដែលមានទីតាំងប៉ះចំគម្រោងផ្លូវល្បឿនលឿនភ្នំពេញ-ខេត្តព្រះសីហនុ ត្រង់ចំណុចតភ្ជាប់មហាវិថីឈ្នះឈ្នះ ស្ថិតនៅភូមិចែងម៉ែង សង្កាត់សម្រោងក្រោម ខណ្ឌពោធិ៍សែនជ័យ។
ប្រជាពលរដ្ឋរងផលប៉ះពាល់ម្នាក់ឈ្មោះ អ៊ី សុខនៅ ថ្លែងនៅថ្ងៃសុក្រ ទី២៩ ខែតុលា ថាផ្ទះ៤ល្វែងរបស់បងប្អូនអ្នកស្រី៦នាក់ ត្រូវបានអាជ្ញាធរប្រើគ្រឿងចក្រវាយកម្ទេចនិងឈូសឆាយចោលអស់ទាំងស្រុង ដោយមិនបានជូនដំណឹងជាមុនអ្វីឡើយ ដែលធ្វើឱ្យសម្ភារនិងព្រទ្យសម្បត្តិក្នុងផ្ទះត្រូវខូចខាតអស់ជាច្រើន។
ស្រ្តីវ័យ៤១ឆ្នាំ មានកូន២នាក់ក្នុងបន្ទុករូបនេះ បន្ថែមថា ផ្ទះទាំងនោះគឺពួកគាត់សុទ្ធតែខំប្រឹងប្រែងធ្វើការសន្សំប្រាក់រាប់ឆ្នាំ និងខ្ចីបុលពីធនាគារបន្ថែមដើម្បីសាងសង់ ដែលមួយល្វែងអស់ពីជាង២ម៉ឺនដុល្លារ (២០ ០០០ដុល្លារ) ទៅជាង៣ម៉ឺនដុល្លារ (៣០ ០០០ដុល្លារ) ប៉ុន្តែអាជ្ញាធរព្រមផ្ដល់សំណងត្រឹមពីជាង៣ម៉ឺន (៣០ ០០០ដុល្លារ) ទៅជាង៤ម៉ឺនដុល្លារ (៤០ ០០០ដុល្លារ)។ អ្នកស្រីថា ចំនួននេះគឺតិចតួចពេក ដែលពួកគាត់មិនអាចទិញដីធ្វើផ្ទះនៅកន្លែងផ្សេងបាន។
អ្នកស្រីថា៖ «ដីខ្ញុំរកស៊ីសំខាន់ខ្លាំងណាស់ វាដូចខ្សែជីវិតរបស់ខ្ញុំអ៊ីចឹង។ ខ្ញុំពឹងផ្អែកទៅលើកន្លែងហ្នឹងដើម្បីចិញ្ចឹមជីវិតផង ដើម្បីដូចថារកស៊ីផង និងយកលុយទៅបង់ធនាគារផង ព្រោះពួកខ្ញុំអត់មានអី មានតែប៉ុណ្ណឹងទេ ចែកបងប្អូនច្រើនណាស់។ អ៊ីចឹងសំណូមពរចង់បានតែកន្លែងរកស៊ីវិញ បើអត់បានដូចដើមទេ សូមថាបង់ធនាគាររួចទៅបានកន្លែងមួយកន្លែងនៅធម្មតាដូចគេដូចឯងក៏បានដែរ»។
ប្រភពដដែលបន្តថា គ្រួសារគាត់មានបងប្អូនច្រើន ដូច្នេះឪពុកម្តាយមិនមានអ្វីចែកឱ្យក្រៅពីដីនោះទេ។ បងស្រីធំក្នុងគ្រួសាររូបនេះបន្ថែមថា ដើមឡើយ ដីពួកគាត់មានទំហំធំ ប៉ុន្តែដោយសាររដ្ឋត្រូវការពង្រីកផ្លូវ ក៏បានកាត់ដីគាត់ឱ្យរួមតូចចូលក្នុងអស់ជម្រៅជាង១០ម៉ែត្រ ហើយពួកគាត់មិនមានការតវ៉ានោះទេ ដោយសារនៅសល់ដីខ្លះ ប៉ុន្តែលើកនេះគឺបងប្អូនគាត់ត្រូវបាត់បង់ទាំងស្រុង។
អ្នកស្រីថា៖ «វាអយុត្តិធម៌សម្រាប់ពួកខ្ញុំជាប្រជាពលរដ្ឋស្មោះត្រង់ យកលុយពីធនាគារមកធ្វើ ជាកម្លាំងញើសឈាមសុទ្ធសាធតែម្តង ហើយមួយជីវិតហ្នឹងមានតែប៉ុណ្ណឹងគត់»។
អ្នកស្រីបន្ថែមថា៖ «បើអត់ព្រម មានតែបង្ខំឱ្យប្រជាជនស្លាប់! បើពួកខ្ញុំរស់នៅ ត្រូវបង់ធនាគារផង»។
ប្អូនស្រីអ្នកស្រីឈ្មោះ អ៊ី សុខនាង លើកឡើងថា អាជ្ញាធរបានប្រើគ្រឿងចក្រកាយកម្ទេចផ្ទះពលរដ្ឋម្ដងមួយៗ ចាប់ពីម៉ោងប្រមាណ៦នាទីព្រឹក និងចាប់ខ្លួនអ្នកដែលហ៊ានរារាំងសកម្មភាពឈូសឆាយ។ ស្ត្រីមេម៉ាយវ័យ៣៩ឆ្នាំរូបនេះបន្ថែមថា អាជ្ញាធរបានទុកពេលឱ្យគាត់៥នាទី ដើម្បីសម្រេចចិត្តផ្ដិតមេដៃទទួលយកសំណង៤ម៉ឺន៥ពាន់ដុល្លារ (៤៥ ០០០ដុល្លារ) សម្រាប់ផ្ទះកម្ពស់២ជាន់របស់គាត់។
ប្រភពដដែលបន្ថែមថា ចំនួននេះគឺបានត្រឹមឱ្យគាត់យកទៅសងប្រាក់ធនាគារដែលខ្ចីសម្រាប់សាងសង់ផ្ទះ និងសល់ត្រឹម៦ទៅ៧ពាន់ដុល្លារ ខណៈពួកគាត់ត្រូវបាត់បង់មុខរបរនិងប្រាក់ចំណូលទាំងស្រុង។
អ្នកស្រីនិយាយថា៖ «ខ្ញុំអត់ពេញចិត្តចំពោះសកម្មភាពអ៊ីចឹង ព្រោះអីដូចឃោរឃៅពេក មកបិទផ្លូវបិទអីអ៊ីចឹង ហើយយកអាអ៊ិចជ្រលរឱ្យផ្ដិតមេដៃអ៊ីចឹង។ ដាក់ប៉ែលអាអ៊ិចជ្រលរលើផ្ទះខ្ញុំ ហើយឱ្យផ្ដិតមេដៃទទួលយកសំណងប៉ុណ្ណឹង។ ខ្ញុំអត់ផ្ដិតទេ! ព្រោះអីទទួលយកអត់បានទេ ព្រោះអីជំពាក់ធនាគារផងអីផង»។
អ្នកស្រី អ៊ី សុខនាង បន្ថែមថា៖ «ខ្ញុំលំបាកខ្លាំងណាស់ អត់មានលុយមួយរៀល។ ចំណូលអត់ចូលគ្រប់កន្លែងទាំងអស់ ជួលឃ្លាំងគេ ប្រហែលជាបានតែកន្លះខែទេ អត់កន្លែងនៅ ត្រូវរកកន្លែងថ្មីនៅ អត់មានផ្ទះ»។
ពលរដ្ឋរងផលប៉ះពាល់ម្នាក់ទៀត លោក ចែ ស៊ាម ថ្លែងថា លោកបានទិញផ្ទះពីអ្នកភូមិក្នុងឆ្នាំ២០១៥ តម្លៃ១៤ម៉ឺនដុល្លារ (១៤០ ០០០ដុល្លារ) និងចំណាយលើថ្លៃជួសជុល ៤ម៉ឺនដុល្លារ (៤០ ០០០ដុល្លារ) ទៀត សម្រាប់ឱ្យកូនស្រីរបស់គាត់រស់នៅនិងប្រកបរបរ។ លោកថា ប្រាក់ទាំងនេះ គឺលោកបានមកពីកម្ចីធនាគារទាំងអស់ ប៉ុន្តែអាជ្ញាធរបានយល់ព្រមផ្ដល់សំណងត្រឹមពាក់កណ្ដាលនៃថ្លៃផ្ទះនិងដីនោះប៉ុណ្ណោះ។
លោកថា លោកបានដាក់ពាក្យស្នើសុំអន្តរាគមន៍ពីគ្រប់ស្ថាប័នរដ្ឋាភិបាលដែលពាក់ព័ន្ធ ដើម្បីទាមទារសំណងសមរម្យមួយ បន្ទាប់ពីមានការជូនដំណឹងពីអាជ្ញាធរជាលើកដំបូង នៅខែមិថុនា ឆ្នាំ២០២១ ហើយលោកក៏បានស្នើឱ្យអាជ្ញាធរពន្យារពេលអនុវត្តវិធានការរុះរើផងដែរ ប៉ុន្តែមិនទទួលបានការឆ្លើយតបណាមួយឡើយ។
លោក ចែ ស៊ាម ថ្លែងថា៖ «ចេះតែខំប្រឹងដើរឈ្មុសឈ្មុលសុំកិច្ចអន្តរាគមន៍គ្រប់ច្រកល្ហក សុំអន្តរាគមន៍ហ្នឹង អន្តរាគមន៍សំណងហ្នឹងទេ មិនមានចិត្តអីជំទាស់ថារារាំងកិច្ចអភិវឌ្ឍរបស់ប្រទេសជាតិ របស់រដ្ឋាភិបាល មិនមានវិធានការនោះទេ ប៉ុន្តែខ្ញុំចង់បានសំណងមួយឱ្យវាសមរម្យនោះទេ ដូចថារកទីតាំងថ្មី»។
លោកបន្ថែមថា៖ «ខ្ញុំនឹកស្មានមិនដល់ដែរ លើការសន្និដ្ឋានរបស់ខ្ញុំ។ ស្មានថារដ្ឋាភិបាលលោកមិនធ្វើអ៊ីចឹង ប៉ុន្តែដល់ជួបអ៊ីចឹង ខ្ញុំក៏មិនដឹងធ្វើម៉េច មានតែឈរមើលសម្រក់ទឹកភ្នែក មើលគេវាយផ្ទះខ្លួនឯង»។
វីអូឌី មិនអាចទាក់ទងសុំការអធិប្បាយពីមន្រ្តីអន្តរក្រសួងទទួលបន្ទុកដោះស្រាយផលប៉ះពាល់ពីគម្រោងអភិវឌ្ឍន៍ផ្លូវល្បឿនលឿនភ្នំពេញ-ព្រះសីហនុ លោក សយ ជីវិន (Soy Chivin) និងអភិបាលខណ្ឌពោធិ៍សែនជ័យ លោក ហែម ដារិទ្ធិ បានទេ នៅថ្ងៃសុក្រនេះ។
យ៉ាងណា អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី ថ្លែងថា វិធានការរបស់អាជ្ញាធរក្រុង គឺធ្វើឡើងជាជម្រើសចុងក្រោយ ដើម្បីពន្លឿនការអភិវឌ្ឍ ដើម្បីផលប្រយោជន៍សេដ្ឋកិច្ចរួមរបស់ពលរដ្ឋ បន្ទាប់ពីអាជ្ញាធរពាក់ព័ន្ធបានខិតខំសម្របសម្រួលជាមួយប្រជាពលរដ្ឋទាំងនោះអស់ជាច្រើនខែមក។
លោក ម៉េត មាសភក្តី មានប្រសាសន៍ថា៖ «មិនមែនមានន័យថា គ្រាន់តែប៉ះភ្លាម ធ្វើការរុះរើភ្លាមទេ សូមយល់ចំណុចអស់នេះ។ ការសម្របសម្រួល ការដោះស្រាយ ការពន្យល់ ការពិភាក្សាអីហ្នឹង រាប់ខែរាប់អីមកហើយ។ នេះជាជម្រើសចុងក្រោយ ដែលយើងអត់មានអ្វីដែលអាចនេះបានក្នុងការពន្យារពេលបន្តទៅទៀត»។
មន្រ្តីអ្នកនាំពាក្យដដែល មិនអាចបញ្ជាក់ពីចំនួនគ្រួសារដែលរងផលប៉ះពាល់ពីគម្រោងផ្លូវល្បឿនលឿននៅសង្កាត់សំរោងក្រោមទាំងនោះទេ ប៉ុន្តែលោកថា មានគ្រួសារមិនដល់មួយភាគរយនោះទេដែលនៅមិនព្រមទទួលយកសំណងពីអាជ្ញាធរ។
រដ្ឋាភិបាលកម្ពុជាបានចាប់ផ្ដើមគម្រោងសាងសង់ផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងព្រះសីហនុ ប្រវែង១៩០គីឡូម៉ែត្រ នៅខែមីនា ឆ្នាំ២០១៩ ដោយគ្រោងចំណាយពេល៤ឆ្នាំ និងថវិកាកម្ចីពីក្រុមហ៊ុនចិនប្រមាណ២ពាន់លានដុល្លារ។
លោកនាយករដ្ឋមន្រ្តី ហ៊ុន សែន បានព្រមាននៅថ្ងៃបើកសម្ពោធថា នឹងចាត់វិធានការច្បាប់អស្សាមិករណ៍ ដើម្បីដកហូតកម្មសិទិ្ធលើអចលនទ្រព្យរបស់ពលរដ្ឋណាដែលរឹងទទឹងមិនព្រមទទួលយកសំណងពីគម្រោងអភិវឌ្ឍន៍ហេដ្ឋារចនាសម្ព័ន្ធរូបវ័ន្តសាធារណៈនានាដែលបម្រើប្រយោជន៍សាធារណៈនិងប្រទេសជាតិ។
តាមរយៈសារព្រមាននេះ សង្គមស៊ីវិលបារម្ភថា អ្នករងផលប៉ះពាល់អាចប្រឈមការដាក់សម្ពាធឱ្យព្រមទទួលយកសំណងតិចតួច ឬត្រូវបណ្ដេញចេញទាំងបង្ខំដូចដែលបានកើតឡើងកន្លងមកនៅតំបន់អភិវឌ្ឍន៍មួយចំនួន បើការដោះស្រាយផលប៉ះពាល់ត្រូវបានធ្វើឡើងក្រោមការគប់គិតគ្នាជាប្រព័ន្ធពីមន្ត្រីអនុវត្តច្បាប់៕
ចំណាំ៖ «អត្ថបទនេះត្រូវបានផលិតឡើងដោយមានការគាំទ្រពីមូលនិធិ Rosa Luxemburg ក្រោមជំនួយហិរញ្ញវត្ថុរបស់ក្រសួងសហព័ន្ធនៃកិច្ចសហប្រតិបត្តិការសេដ្ឋកិច្ច និងការអភិវឌ្ឍ»។
គាំទ្រដោយ៖
