តំណាងពលរដ្ឋ២៤៤គ្រួសារ នៅខណ្ឌឫស្សីកែវ រាជធានីភ្នំពេញ ព្រមានដង្ហែញត្តិទៅតវ៉ាដល់មុខផ្ទះនាយករដ្ឋមន្ត្រី ប្រសិនបើអាជ្ញាធរខណ្ឌមិនព្រមដោះស្រាយរឿងបណ្ណកម្មសិទ្ធិដីធ្លីឱ្យពួកគាត់។
ការព្រមាននេះធ្វើឡើងស្របពេលអាជ្ញាធរខណ្ឌឫស្សីកែវ នៅថ្ងៃទី១១ ខែវិច្ឆិកានេះ បានអញ្ជើញពលរដ្ឋដែលរងផលប៉ះពាល់ពីការស្ថាបនាផ្លូវ ៣០ម៉ែត្រ នៅភូមិឡកំបោរ សង្កាត់ស្វាយប៉ាក ខណ្ឌឫស្សីកែវ ដើម្បីប្រជុំផ្សព្វផ្សាយពីការដោះស្រាយគោលនយោបាយស្ថាបនាផ្លូវនេះ។
ក្រោយការប្រជុំរយៈពេលជាង២ម៉ោង ដែលមានអ្នកចូលរួមប្រមាណ២០០នាក់ អាជ្ញាធរលើកឡើងថានឹងពិភាក្សានូវអ្វីដែលពលរដ្ឋលើកឡើង ដូចជា ការទាមទារផ្ដល់នូវបណ្ណកម្មសិទ្ធិដីធ្លី ឬករណីទាមទារសំណងជាថវិកាសមរម្យតាមគោលនយោបាយឯកជន ជាមួយរដ្ឋបាលរាជធានីភ្នំពេញ ដើម្បីរកដំណោះស្រាយជូនពលរដ្ឋទាំងនោះ។
ពលរដ្ឋម្នាក់ដែលអះអាងថាជាតំណាងអ្នកភូមិដែលមានជម្លោះដីធ្លី រស់នៅភូមិឡកំបោរ អ្នកស្រី រឿង អូន និយាយថា គាត់មិនទាន់ជឿជាក់លើសម្ដីរបស់អាជ្ញាធរ ចំពោះការសន្យាថានឹងជួយរកដំណោះស្រាយជូនអ្នកភូមិនោះទេ។ អ្នកស្រីបារម្ភថា មន្ត្រីខណ្ឌអាចនឹងនិយាយមិនពិត ហើយប្រែក្រឡាស់នៅពេលក្រោយទៀត។
យ៉ាងណា តំណាងពលរដ្ឋរូបនេះបង្ហាញជំហរថា នឹងហែញត្តិទៅតវ៉ាដល់មុខផ្ទះលោកនាយករដ្ឋមន្រ្តី ហ៊ុន សែន ដើម្បីសុំកិច្ចអន្តរាគមន៍ ប្រសិនបើអាជ្ញាធរខណ្ឌមិនអាចរកដំណោះស្រាយឱ្យបានសមរម្យ ឬមិនអាចផ្ដល់សំណងដែលស្របតាមដីតម្លៃទីផ្សារឯកជនទេនោះ។
អ្នកស្រីលើកឡើងថា៖ «ខ្ញុំមិនទាន់ជឿជាក់ ១០០% ទេ! ព្រោះអីខ្ញុំខ្លាចគាត់និយាយក្នុងន័យថាកុហកយើងឬយ៉ាងណា! ខ្ញុំមិនទាន់ដឹងទេ! ប៉ុន្តែបើគាត់សន្យាជាមួយពលរដ្ឋហើយ គាត់ប្រែក្រឡាស់ មិននិយាយការពិត ខ្ញុំនិងប្រជាពលរដ្ឋទាំងអស់នឹងតស៊ូទៅមុខទៀត នឹងតស៊ូដល់សម្ដេចនាយករដ្ឋមន្រ្តី។ ឡើងទៅតវ៉ាឱ្យគាត់ជួយអន្តរាគមន៍ ទៅដេក ទៅលូនក្រាបនៅហ្នឹង [មុខផ្ទះនាយករដ្ឋមន្ត្រី]។ ខ្ញុំចង់បានតែបណ្ណកម្មសិទ្ធិ ឬដោះដូរជាលុយទិញតាមទីផ្សារឯកជនដែលពួកខ្ញុំអាចទទួលយកបាន។»
ពលរដ្ឋម្នាក់ទៀត លោក នេត្រ សុភារ៉ាម អះអាងថា កន្លងមក អាជ្ញាធរមូលដ្ឋានធ្លាប់បាននិយាយធ្វើឱ្យពលរដ្ឋមានភាពភ័យខ្លាច ដើម្បីកុំឱ្យពួកគាត់ចេញតវ៉ារឿងដីធ្លីមួយនេះ។
លោក នេត្រ សុភារ៉ាម ប្រាប់ថា៖ «គេមានធ្វើប្រជាភិថុតរួចហើយ គេធ្វើឱ្យយើងមានការភ័យខ្លាច មានការខ្លបខាច កុំឱ្យតវ៉ាអីហ្នឹង គេមានហើយ! ឧទាហរណ៍ គេនិយាយថា ទៅតវ៉ាធ្វើអី ដីប្រឡាយទឹកហ្នឹង! អាជ្ញាធរដែនដីភូមិ-ឃុំតំបន់ហ្នឹង គេថាដីនៅកន្លែងហ្នឹងមិនអាចរស់នៅបានទេ។ តែហេតុអីបានបុរី គេនៅបាន?»
អភិបាលនៃគណៈអភិបាលខណ្ឌឫស្សីកែវ លោក ឯក ឃុនដឿន ប្រាប់ វីអូដី នាកន្លែងជួបជុំនៅថ្ងៃនេះថា ការដែលពលរដ្ឋចង់ដង្ហែញត្តិទៅមុខផ្ទះនាយករដ្ឋមន្ត្រីនោះ គឺជាសិទ្ធិរបស់ពួកគាត់ ប៉ុន្តែត្រូវអនុវត្តតាមច្បាប់កំណត់។ ទោះជាយ៉ាងណា លោកចង់ឱ្យប្រជាពលរដ្ឋចូលរួមរកដំណោះស្រាយ តាមរយៈការជជែកពិភាក្សាគ្នាវិញ។
លោក ឯក ឃុនដឿន មានប្រសាសន៍ថា៖ «ជាសិទ្ធិរបស់ពួកគាត់។ ប្អូនត្រូវយល់ថា ពេលខ្លះអ្វីដែលយើងចង់បាន មួយបូកមួយស្មើពីរ តែវាអត់បាន! តែកន្លែងខ្លះ វាអាចល្អជាងហ្នឹង ដែលពេលខ្លះយើងត្រូវការអង្គុយជជែកគ្នា ពិភាក្សាគ្នា។ ឧទាហរណ៍ ផ្ទះខ្លះ ផ្ទះតូច គាត់ទទួលយកអ្វីដែលអាជ្ញាធររាជធានីរៀបចំជូនគាត់ គាត់គិតថាសមរម្យសម្រាប់គាត់។ […] យើងចង់ឱ្យដឹងពិតប្រាកដនូវសំណូមពររបស់បងប្អូននៅតាមផ្ទះ មិនមែនជាការបំបែកបំបាក់សហគមន៍ទេ តែយើងចង់ជួយសហគមន៍ ចង់ជួយអ្នកក្រ»។
លោកបន្តថា បច្ចុប្បន្ន ពលរដ្ឋមានសិទ្ធិសេរីភាព ខណៈអាជ្ញាធរមិនដែលគំរាមកំហែងប្រជាពលរដ្ឋលើការបញ្ចេញមតិ ឬការសម្រេចចិត្តណាមួយរបស់ពួកគាត់ឡើយ។ លោកថា បើសិនមានការគំរាមកំហែងពីអាជ្ញាធរមូលដ្ឋានមែន ពលរដ្ឋអាចទៅរាយការណ៍ប្រាប់អាជ្ញាធរខណ្ឌបាន។
អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត ថ្លែងថា ក្នុងការសម្រេចអភិវឌ្ឍន៍គម្រោងអ្វីមួយ អាជ្ញាធរត្រូវតែកោះប្រជុំជាមួយភាគីដែលពាក់ព័ន្ធជាមុនសិន។
លោកលើកឡើងថា៖ «ប្រសិនបើធ្វើឯកតោភាគីអ៊ីចឹង អាហ្នឹងវាហាក់បីដូចជាគេហៅកាត់ក្បាលតម្រឹមមួក អាហ្នឹងវាពិបាកណាស់។ អ៊ីចឹងប្រជាពលរដ្ឋ គាត់ពិបាកទទួលយកណាស់ ភាគច្រើនអាជ្ញាធរច្រើនតែសម្រេចអីហើយៗ បានមកដាក់គំនាប ឬមួយក៏សំឡុតប្រជាពលរដ្ឋឱ្យទទួលយកដំណោះស្រាយហ្នឹងជាក្រោយ»។
កាលពីថ្ងៃទី៨ ខែវិច្ឆិកាកន្លងទៅ ក្រុមប្រជាពលរដ្ឋនៅភូមិឡកំបោរនេះ បានចេញតវ៉ាម្ដងរួចមកហើយ ដោយស្នើប្រមុខរដ្ឋាភិបាលធ្វើបណ្ណកម្មសិទ្ធិដីធ្លីជូនពួកគាត់ ដោយពួកគាត់អះអាងថា អាជ្ញាធរចេះតែគេចវេះម្ដងហើយម្ដងទៀត មិនព្រមដោះស្រាយ និងប្រាប់ឱ្យពលរដ្ឋដោះដូរដីក្នុងក្រុងទៅរស់នៅកន្លែងផ្សេងដែលមិនទាន់មានហេដ្ឋារចនាសម្ព័ន្ធត្រឹមត្រូវទៅវិញ។
បើតាមតំណាងពលរដ្ឋ ពួកគាត់មិនច្បាស់ពីទំហំដីសរុបរបស់អ្នកភូមិថាមានប៉ុន្មានហិកតានោះទេ ប៉ុន្តែដីរបស់អ្នកភូមិក្នុងគ្រួសារនីមួយៗ ភាគច្រើនមានទទឹងចន្លោះពី៧ទៅ១០ម៉ែត្រ និងបណ្ដោយពី១០ទៅ២០ម៉ែត្រ៕