សាច់ញាតិជនរងគ្រោះ បានសម្រេចដកពាក្យបណ្ដឹងវិញ ក្រោយទទួលបានមនុស្ស៣នាក់ដែលអះអាងថា ត្រូវថៅកែជនជាតិចិនលក់និងបង្ខំឱ្យធ្វើការងារនៅក្រុមហ៊ុនកាស៊ីណូមួយនៅខេត្តព្រះសីហនុ។
កាលពីថ្ងៃទី១ ខែវិច្ឆិកានេះ លោក ឃុត ហេង រស់នៅក្រុងប៉ោយប៉ែត ខេត្តបន្ទាយមានជ័យ បានដាក់បណ្ដឹងទៅស្នងការដ្ឋាននគរបាលខេត្តព្រះសីហនុ ដោយប្ដឹងជនជាតិចិនម្នាក់ដែលមានឈ្មោះហៅក្រៅ «អាឡុង» និងក្រុមហ៊ុនកាស៊ីណូមួយ ស្ថិតនៅភូមិ១ សង្កាត់៣ ក្រុងព្រះសីហនុ ដោយចោទថា បានយកប្អូនស្រី២នាក់និងប្អូនប្រុសម្នាក់របស់លោកទៅធ្វើការនៅក្រុមហ៊ុនរបស់ពួកគេដោយបង្ខំ។ លើសពីនេះ លោកថា ជនជាតិចិននោះបានលក់បន្តពីក្រុមហ៊ុនកាស៊ីណូមួយទៅក្រុមហ៊ុនកាស៊ីណូមួយទៀត និងពីមនុស្សម្នាក់ទៅមនុស្សម្នាក់ទៀត រួមទាំងរឹតត្បិតសិទ្ធិរបស់ពួកគេគ្រប់យ៉ាងថែមទៀតផង។
លោក ឃុត ហេង ប្រាប់ វីអូឌី នៅថ្ងៃព្រហស្បតិ៍នេះថា លោកបានដកពាក្យបណ្ដឹងនោះវិញហើយ ក្រោយយកបានប្អូនៗរបស់លោកមកវិញ កាលពីថ្ងៃទី៦ ខែវិច្ឆិកានេះ។ លោកថា ការសម្រេចដកពាក្យបណ្ដឹងនេះ ដោយសារខាងក្រុមហ៊ុនបានសុំសម្របសម្រួល ហើយលោកក៏មិនចង់ឱ្យមានរឿងនេះវែងឆ្ងាយ ក៏សម្រេចដកពាក្យបណ្ដឹងបញ្ចប់រឿងតែម្តង។
លោកលើកឡើងថា៖ «គាត់ចេញមកតាំងពីថ្ងៃទី០៦ ខែវិច្ឆិកា! ខ្ញុំយកតែប្អូនខ្ញុំចេញមកហើយ ខ្ញុំបានដកពាក្យបណ្ដឹងវិញហើយ ខាងក្រុមហ៊ុនសម្រួលគ្នា សម្រេចថាដកពាក្យបណ្ដឹងវិញ»។
ស្នងការនគរបាលខេត្តព្រះសីហនុ លោក ជួន ណារិន បញ្ជាក់ថា សមត្ថកិច្ចបានដោះស្រាយករណីនេះរួចរាល់ហើយ។ លោកបន្តថា ករណីនេះជារឿងតូចតាចដែលអាចសម្រុះសម្រួលគ្នាបាន ប៉ុន្តែប្រសិនបើដើមបណ្ដឹងចង់ប្ដឹងបន្តទៀត អាចទៅការិយាល័យលោកផ្ទាល់បាន។
លោកលើកឡើងថា៖ «ឥលូវអញ្ចេះ រាល់ការងារណាមួយដែលអាចសម្រុះសម្រួល និយាយឱ្យចំទៅ ករណីតូចតាចមិនបង្កឱ្យគ្រោះថ្នាក់សង្គម គ្រោះថា្នក់ដល់អាយុជីវិត ឬមិនបង្កខាតបង់ទ្រព្យសម្បត្តិអ្នកដទៃ ជារឿងកំប៉ិកកំប៉ុកទេ ឱ្យគាត់សម្របសម្រួលទៅ! ហើយយើងនឹងសុំការពិនិត្យដឹកនាំសម្របសម្រួលនីតិវិធីតាមព្រះរាជអាជ្ញា»។
យ៉ាងណា មន្ត្រីសង្គមស៊ីវិលផ្នែកសិទ្ធិមនុស្ស និងការងារ ធ្លាប់លើកឡើងថា ប្រសិនបើមានការលក់ដូរមនុស្សនិងបង្ខាំងឱ្យធ្វើការដូចការលើកឡើងរបស់ដើមបណ្ដឹងមែននោះ គឺជាទម្រង់នៃការជួញដូរមនុស្ស ការបង្ខាំងមនុស្សដោយខុសច្បាប់ និងកេងប្រវ័ញ្ចកម្លាំងពលកម្ម រួមទាំងរំលោភសិទ្ធិការងារ ដែលសមត្ថកិច្ចត្រូវតែស្វែងរកចាប់ជនល្មើសមកផ្ដន្ទាទោសទៅតាមច្បាប់ឱ្យខានតែបាន។
កាលពីខែកញ្ញា ឆ្នាំ២០២១ ក្រុមហ៊ុនកាស៊ីណូមួយឈ្មោះ ដឹសេនជូរី ស្ថិតនៅភូមិ៥ សង្កាត់លេខ៤ ក្រុងព្រះសីហនុ ក៏បានរងការចោទប្រកាន់ពីក្រុមបុគ្គលិកផងដែរ ថាបានបង្ខាំងពួកគេជាង៤០០នាក់ ឱ្យធ្វើការងារទាំងឈឺ ប៉ុន្តែការចោទប្រកាន់នេះត្រូវបានច្រានចោលដោយតំណាងក្រុមហ៊ុន៕
