លោកនាយករដ្ឋមន្ត្រី ហ៊ុន សែន បានលើកសំណើទៅកាន់រដ្ឋាភិបាលចិនឱ្យបើករោងចក្រផលិតវ៉ាក់សាំងការពារជំងឺកូវីដ-១៩ នៅក្នុងប្រទេសកម្ពុជា។
សំណើរបស់លោកនាយករដ្ឋមន្ត្រី ហ៊ុន សែន នេះបានធ្វើឡើងតាមរយៈឯកអគ្គរដ្ឋទូតចិនប្រចាំនៅកម្ពុជា នៅក្នុងពិធីប្រគល់និងទទួលជំនួយវ៉ាក់សាំងចិនចំនួន២លានដូសបន្ថែមទៀតមកកម្ពុជា នៅព្រឹកថ្ងៃទី១៧ ខែវិច្ឆិកា ឆ្នាំ២០២១។
លោកនាយករដ្ឋមន្ត្រី ហ៊ុន សែន បានលើកឡើងថា ការបង្កើតឱ្យមានរោងចក្រផលិតវ៉ាក់សាំងការពារជំងឺកូវីដ-១៩ (ផលិតផលសម្រេចចុងក្រោយ) នៅកម្ពុជា ដោយយកវត្ថុធាតុដើមពីក្រុមហ៊ុនចិន គឺដើម្បីផ្ដល់លទ្ធភាពឱ្យកម្ពុជាអាចទិញយកវ៉ាក់សាំងដែលផលិតនៅក្នុងរោងចក្រនៅកម្ពុជា ដើម្បីប្រើប្រាស់ក្នុងប្រទេសខ្លួនឯងផង និងដើម្បីលក់ទៅឱ្យប្រទេសជិតខាងផង។
លោកនាយករដ្ឋមន្ត្រី ហ៊ុន សែន បានប្រគល់ភារកិច្ចនេះបន្តទៅឱ្យក្រសួងសុខាភិបាល និងឯកអគ្គរដ្ឋទូតចិនប្រចាំនៅកម្ពុជា សហការគ្នាធ្វើការនៅក្នុងរឿងនេះ។
លោកបានថ្លែងថា៖ «ប្រទេសឥណ្ឌូនេស៊ី ក៏បានធ្វើដូច្នេះ ដូចអ្វីដែលខ្ញុំបាននិយាយ ប្រទេសថៃក៏បានធ្វើ [រោងចក្រ] អាស្ត្រាហ្សេណេកា ត្រូវបានផលិតនៅក្នុងប្រទេសថៃ តាមរយៈការដឹកជញ្ជូនមករៀបចំផលិតចុងក្រោយនៅប្រទេសថៃ។ យើងក៏មានលទ្ធភាពដើម្បីធ្វើករណីនេះ គឺដឹកស៊ីណូវ៉ាក់ ឬ ស៊ីណូហ្វាម មកផលិត មករៀបចំដំណាក់កាលចុងក្រោយចេញពីកម្ពុជា»។
គួរជម្រាបជូនថា ប្រទេសចិនបានក្លាយជាប្រទេសឈានមុខគេក្នុងការផ្គត់ផ្គង់វ៉ាក់សាំងបង្ការជំងឺកូវីដ-១៩ មកដល់ប្រទេសកម្ពុជា។
គិតចាប់តាំងពីការផ្ដល់ជូនលើកដំបូងដល់កម្ពុជានៅថ្ងៃទី៧ ខែកុម្ភៈ ឆ្នាំ២០២១មក កម្ពុជាបានទទួលជំនួយវ៉ាក់សាំងការពារជំងឺកូវីដ-១៩ ពីរដ្ឋាភិបាលចិនចំនួនជាង៦លានដូស និងបានបញ្ជាទិញពីក្រុមហ៊ុនចិនសរុបចំនួនជាង៣៤លានដូស៕
