កញ្ញា កឹម មនោវិទ្យា កូនស្រីច្បងរបស់លោក កឹម សុខា បានអះអាងថា ឪពុករបស់ខ្លួនមានសិទ្ធិក្នុងការបញ្ចេញមតិ ដើម្បីប្រាប់ដៃគូរបស់លោកឱ្យបញ្ឈប់ការកេងចំណេញនិងបោកប្រាស់សាធារណជនតទៅទៀត។
តាមរយៈសំណេរជាភាសាអង់គ្លេសដែលផ្សព្វផ្សាយនៅលើបណ្ដាញសង្គម (Twitter) នៅរសៀលថ្ងៃអង្គារនេះ កញ្ញា កឹម មនោវិទ្យា បានសរសេរយ៉ាងដូច្នេះថា៖ «ឪពុករបស់ខ្ញុំ លោក កឹម សុខា មានសិទ្ធិក្នុងការបញ្ចេញមតិ ដើម្បីប្រាប់ដៃគូបោកប្រាស់របស់លោកឱ្យបញ្ឈប់ការកេងចំណេញនិងបោកប្រាស់សាធារណជនតទៅទៀត»។
កញ្ញាបន្តថា៖ «ភាពជាដៃគូត្រូវបានបញ្ចប់ដោយប្រសិទ្ធភាពរួចទៅហើយ នៅពេលដែលដៃគូរបស់លោក [កឹម សុខា] បានអំពាវនាវឱ្យគណបក្សនិងប្រជាជននៅក្នុងប្រទេសកម្ពុជាបោះបង់ចោលរូបលោកក្នុងពេលដែលលោកជាប់ពន្ធនាគារ និងនៅពេលដែលពួកគេដឹកនាំយុទ្ធនាការមួយដែលពោរពេញទៅដោយការបោកប្រាស់»។
ការចេញមកអះអាងរបស់កញ្ញា កឹម មនោវិទ្យា នៅពេលនេះ គឺទំនងជាបានឆ្លើយតបទៅកាន់លោក សម រង្ស៊ី ដោយបានចាត់ទុកការបង្ហោះសារនយោបាយរបស់លោក កឹម សុខា កាលពីថ្ងៃទី២៨ ខែវិច្ឆិកា ថាធ្វើឡើងក្រោមការគំរាមកំហែងពីលោកនាយករដ្ឋមន្ត្រី ហ៊ុន សែន។
លោក កឹម សុខា ប្រធានអតីតគណបក្សសង្គ្រោះជាតិ បានលើកឡើងលើបណ្ដាញសង្គមហ្វេសប៊ុករបស់លោក កាលពីថ្ងៃទី២៨ ខែវិច្ឆិកា ថាសកម្មភាពរបស់លោក សម រង្ស៊ី និងសហការីរបស់ខ្លួនកន្លងមក ជាពិសេសសកម្មភាពថ្មីៗនេះ បានបញ្ជាក់ឱ្យឃើញថា លោក សម រង្ស៊ី និងលោក កឹម សុខា មិនមែនជាមនុស្សតែមួយទេ ព្រោះសកម្មភាពទាំងអស់នោះមិនមានការគាំទ្រ ឬជាជំហររបស់លោកនោះឡើយ៕
My father #KemSokha is entitled to his opinion to call his deceitful partner to stop exploiting him & deceiving the public. The partnership was effectively over when his partner called on the party/people in #Cambodia to abandon him when he’s imprisoned & led a deceitful campaign https://t.co/aqxSk2A0EF
— Monovithya Kem (@KemMnv) November 30, 2021