កងរាជអាវុធហត្ថខេត្តបាត់ដំបង បានបញ្ជូនមនុស្ស៧នាក់ទៅតុលាការ ពាក់ព័ន្ធនឹងការឈូសឆាយដីព្រៃលិចទឹកនៅតំបន់ការពារបឹងទន្លេសាប ក្រោយមានបទបញ្ជាពីលោកនាយករដ្ឋមន្ត្រី ហ៊ុន សែន។
កាលពីថ្ងៃទី២៨ ខែវិច្ឆិកា ឆ្នាំ២០២១ លោកនាយករដ្ឋមន្ត្រី ហ៊ុន សែន បានព្រមានចាត់វិធានការច្បាប់លើមន្ត្រីទាំងឡាយណាដែលពាក់ព័ន្ធការរំលោភដីព្រៃលិចទឹកនៅតំបន់បឹងទន្លេសាប និងបានបញ្ជាឱ្យអាជ្ញាធរពាក់ព័ន្ធមួយចំនួនចុះទប់ស្កាត់ជាបន្ទាន់ ចំពោះករណីទន្ទ្រានដីព្រៃលិចទឹកនេះ។
កម្លាំងកងរាជអាវុធហត្ថខេត្តបាត់ដំបង កាលពីថ្ងៃទី២៩ ខែវិច្ឆិកា បានចុះស្រាវជ្រាវនិងទប់ស្កាត់ការរំលោភបំពានដីព្រៃលិចទឹកក្នុងតំបន់៣ ដែលជាតំបន់ហាមឃាត់ ដោយឃាត់បានខ្លួនមនុស្ស៧នាក់ និងគ្រឿងចក្រមួយចំនួន ខណៈពលរដ្ឋទាំងនោះកំពុងប្រើគ្រឿងចក្រឈូសឆាយដី ដើម្បីបង្កបង្កើនផល ស្ថិតក្នុងភូមិអូរកំបុត ឃុំព្រែកឆ្ដោរ ស្រុកឯកភ្នំ ខេត្តបាត់ដំបង។
មេបញ្ជាការកងរាជអាវុធហត្ថខេត្តបាត់ដំបង លោក មាស សុវណ្ណ ប្រាប់ វីអូឌី នៅថ្ងៃពុធនេះថា ពលរដ្ឋ៧នាក់នោះត្រូវបានអាវុធហត្ថខេត្តបញ្ជូនទៅតុលាការហើយកាលពីថ្ងៃម្សិលមិញ និងកំពុងស្រាវជ្រាវតាមចាប់អ្នកផ្សេងទៀត។ លោកថា អ្នកដែលឃាត់ខ្លួននិងបញ្ជូនទៅតុលាការនោះជាពលរដ្ឋធម្មតា មានឈ្មោះ ងួន គក់, ងួន វណ្ណៈ, ប៉ិប ហាក់, គង់ សុរិន្ទ និងពលរដ្ឋផ្សេងទៀត ដោយពួកគេរស់នៅភូមិគោកដូង ឃុំពាមឯក ស្រុកឯកភ្នំ។
លោកបន្តថា ក្នុងប្រតិបត្តិការបង្ក្រាបនោះ សមត្ថកិច្ចក៏បានដកហូតសម្ភារមួយចំនួនផងដែរ ដូចជា ត្រាក់ទ័រ១គ្រឿង គោយន្តកន្ត្រៃ១គ្រឿង កាណូតស្មាច់មានម៉ាស៊ីន២គ្រឿង ម៉ាស៊ីនកាណូត១គ្រឿង និងវត្ថុតាងពាក់ព័ន្ធមួយចំនួនទៀត។
យ៉ាងណា លោក មាស សុវណ្ណ មិនទាន់អាចបញ្ជាក់ពីទំហំដីព្រៃលិចទឹកដែលពលរដ្ឋទាំងនោះឈូសឆាយរំលោភយកបាននៅឡើយទេ។
លោកបន្ថែមថា៖ «យើងបញ្ជូនទៅតុលាការហើយតាំងពីម្សិលមិញ។ ឥលូវយើងកំពុងស្រាវជ្រាវតាមចាប់ទៀត ដោយសារកាលយើងចុះទៅហ្នឹង គាត់ដឹងខ្លួន គាត់រត់គេចខ្លួនអស់»។
តែយ៉ាងណា អ្នកនាំពាក្យសាលាដំបូងខេត្តបាត់ដំបង លោក ដួង សារ៉ន មានប្រសាសន៍ថា លោកមិនទាន់ទទួលបានព័ត៌មាននេះនៅឡើយទេ។
អតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន ដែលលោកនាយករដ្ឋមន្ត្រី ហ៊ុន សែន បានលើកចំៗថា បានទន្ទ្រានដីព្រៃលិចទឹកនៅតំបន់បឹងទេន្លេសាបក្នុងខេត្តកំពង់ឆ្នាំង ជាង២ ០០០ហិកតាយកមកធ្វើជាកម្មសិទ្ធិផ្ទាល់ខ្លួន រហូតមកដល់ពេលនេះពុំទាន់មានការឃាត់ខ្លួននៅឡើយទេ។
ពាក់ព័ន្ធករណីនេះ មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត បានស្នើដល់រដ្ឋាភិបាលអនុវត្តច្បាប់ឱ្យបានស្មើភាពគ្នារវាងប្រជាពលរដ្ឋនិងមន្ត្រីមានលុយមានអំណាច ដែលបានទន្ទ្រានយកដីព្រៃលិចទឹកនៅតំបន់បឹងទន្លេសាបនេះ។
មន្ត្រីសិទ្ធិមនុស្សរូបនេះបន្តថា ប្រសិនបើរដ្ឋាភិបាលមិនអនុវត្តច្បាប់ឱ្យស្មើភាពគ្នារវាងពលរដ្ឋនិងងមន្ត្រីដែលធ្វើខុសនោះទេ នឹងធ្វើឱ្យខុសពីគោលការណ៍ច្បាប់។
លោកបន្ថែមថា៖ «ប្រជាពលរដ្ឋនិងអាជ្ញាធរត្រូវបានរដ្ឋាភិបាលចោទថារំលោភយកដីរដ្ឋដូចគ្នា តែពេលដែលអាជ្ញាធរចូលសារភាព ត្រូវបានលើកលែង ហើយប្រជាពលរដ្ឋបែរជាបញ្ជូនទៅតុលាការ។ នេះវាបង្ហាញពីវិសមភាពនៃសិទ្ធិនៅចំពោះមុខច្បាប់រវាងពលរដ្ឋនិងមន្ត្រីអាជ្ញាធរដែលធ្វើខុសហ្នឹង។ អ៊ីចឹងអាហ្នឹងធ្វើឱ្យប្រជាពលរដ្ឋកាន់មានសម្ពាធធ្ងន់ធ្ងរពីប្រព័ន្ធយុត្តិធម៌។ អ៊ីចឹងរដ្ឋាភិបាលត្រូវតែអនុវត្តឱ្យស្មើភាពគ្នា បើរដ្ឋាភិបាលធ្វើមិនស្មើភាពគ្នា វាខុសពីគោលការណ៍ច្បាប់ជាតិនិងអន្តរជាតិ»។
យ៉ាងណាក៏ដោយ លោកនាយករដ្ឋមន្ត្រី ហ៊ុន សែន បង្ហើបថា អ្នកដែលពាក់ព័ន្ធបទល្មើសទន្ទ្រានយកដីព្រៃលិចទឹកជុំវិញបឹងទន្លេសាបនេះ នឹងត្រូវបន្ធូរបន្ថយទោស ប្រសិនបើពួកគេចេញមកសារភាព៕