អាជ្ញាធរខេត្តកំពង់ឆ្នាំង បាននិងកំពុងស្រាវជ្រាវរកជនល្មើសដែលទន្ទ្រានយកដីគម្របព្រៃឈើជាង៧០០ហិកតា ស្ថិតក្នុងស្រុកទឹកផុស ដើម្បីចាត់វិធានការតាមផ្លូវច្បាប់។
អភិបាលរងខេត្តកំពង់ឆ្នាំង លោក សាន់ យូ ប្រាប់ វីអូឌី នៅថ្ងៃពុធនេះថា កាលពីដើមសប្ដាហ៍នេះ រូបលោកនិងអាជ្ញាធរពាក់ព័ន្ធបានចុះទប់ស្កាត់បទល្មើសឈូសឆាយដីគម្របព្រៃឈើឆ្នាំ២០០១ ស្ថិតក្នុងឃុំក្រាំងស្គារ ស្រុកទឹកផុស ដោយបានឃាត់ជនល្មើសម្នាក់ ត្រាក់ទ័រចំនួន២គ្រឿង និងដកហូតដីប្រមាណ៦០ហិកតា ខណៈមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានរកឃើញករណីទន្ទ្រានយកដី៧១១ហិកតា ក្នុងដែនគម្របព្រៃឈើឆ្នាំ២០០២។
លោកបន្តថា ក្រោយការចុះបង្ក្រាបករណីនេះ រដ្ឋបាលព្រៃឈើក៏បាននិងកំពុងកសាងសំណុំរឿង ដើម្បីចាត់ការតាមនីតិវិធីច្បាប់ផងដែរ។
លោកលើកឡើងថា៖ «ចំពោះនីតិវិធីបែបណា ចាំរដ្ឋបាលព្រៃឈើនឹងចេញរបាយការណ៍តាមនីតិវិធីរបស់គាត់។ បើនិយាយពីម្ចាស់ហ្នឹង គឺជាបឋម យើងរកឃើញតែមួយម្ចាស់ទេ»។
កាលពីថ្ងៃទី១១ ខែវិច្ឆិកា ឆ្នាំ២០២១ មន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានចេញសេចក្ដីជូនដំណឹងមួយឱ្យជនទាំងឡាយណាដែលបានឈូសឆាយដីគម្របព្រៃឈើចំនួន៧១១ហិកតា ស្ថិតក្នុងឃុំក្រាំងស្គារ និងឃុំជៀប ស្រុកទឹកផុស ត្រូវចូលមកបង្ហាញខ្លួននៅខណ្ឌរដ្ឋបាលព្រៃឈើខេត្ត និងភ្ជាប់មកជាមួយឯកសារពាក់ព័ន្ធផ្សេងៗក្នុងរយៈពេល៣០ថ្ងៃ។
ប្រធានមន្ទីរកសិកម្មខេត្តកំពង់ឆ្នាំង លោក ងិន ហ៊ុន បានព្រមានចាត់វិធានការច្បាប់តឹងរ៉ឹង ប្រសិនបើជនល្មើសដែលពាក់ព័ន្ធមិនព្រមបង្ហាញខ្លួន។
លោកបន្ថែមថា៖ «នៅក្នុងសេចក្ដីជូនដំណឹង យើងបានបញ្ជាក់ហើយថា បើគាត់មានឯកសារពាក់ព័ន្ធអីត្រូវបង្ហាញ ឱ្យគាត់យកមកបង្ហាញមក! បើបង្ហាញទៅ ឃើញទិដ្ឋភាពខុសច្បាប់ យើងនឹងដកហូតយកជាទ្រព្យសម្បត្តិរបស់រដ្ឋ»។
មន្ត្រីសម្របសម្រួលនៃសមាគមការពារសិទ្ធិមនុស្ស (ADHOC) ប្រចាំខេត្តកំពង់ឆ្នាំង លោក សំ ចាន់គា បានសាទរចំពោះចំណាត់ការរបស់អាជ្ញាធរខេត្តដែលប្រមូលយកដីព្រៃរបស់រដ្ឋមករក្សាទុកវិញនេះ ប៉ុន្តែលោកក៏បង្ហាញការសោកស្ដាយផងដែរ ចំពោះការបាត់បង់ព្រៃឈើ និងការបណ្ដែតបណ្ដោយឱ្យបទល្មើសកើតរួចយូរហើយ ហើយអាជ្ញាធរទើបចុះអនុវត្ត។
មន្ត្រីសិទ្ធិមនុស្សរូបនេះបានជំរុញទៅអាជ្ញាធរពាក់ពន្ធស្វែងរកចាប់ជនល្មើសមកផ្ដន្ទាទោសតាមច្បាប់ ដោយឈរគោលការណ៍យុត្តិធម៌និងស្មើភាពគ្នា មិនថាជនល្មើសជាអ្នកមានលុយមានអំណាច ឬពលរដ្ឋក្រក្រីឡើយ។ លោកថា កន្លងមក អាជ្ញាធរចាត់វិធានការបានតែប្រជាពលរដ្ឋក្រីក្រប៉ុណ្ណោះ ខណៈអ្នកមានលុយមានអំណាចមិនត្រូវបានផ្ដន្ទាទោសទេ។
លោកបន្ថែមថា៖ «ខ្ញុំសំណូមពរឱ្យការអនុវត្តច្បាប់ហ្នឹងមានភាពយុត្តិធម៌។ យើងបារម្ភខ្លាចដូចចំណាត់ការកន្លងមក យើងឃើញថា ការនាំខ្លួន ការកោះហៅ ការអនុវត្តហ្នឹង បានលើតែពលរដ្ឋទន់ខ្សោយទេ។ ឯអ្នកដែលមានអំណាចនិងមន្ត្រីរាជការដែលមានកំហុសធ្ងន់ធ្ងរហ្នឹង មិនត្រូវបាននាំមកដាក់ទោសទេ យើងឃើញនាំតែពលរដ្ឋក្រីក្រ។ អ៊ីចឹងយុទ្ធនាការនេះ យើងសង្ឃឹមថា រដ្ឋាភិបាលនឹងអនុវត្តជាទូទៅ ផ្ដល់ភាពយុត្តិធម៌ទាំងពលរដ្ឋនិងមន្ត្រីទាំងអស់»។
មាត្រា៩៧ នៃច្បាប់ស្ដីពីព្រៃឈើ ចែងថា ការកាប់រានព្រៃ ឬហ៊ុមព័ទ្ធកាន់កាប់ដីព្រៃ ត្រូវផ្ដន្ទាទោសពី៥ទៅ១០ឆ្នាំ និងត្រូវរឹបអូសវត្ថុតាំងទាំងអស់មកទុកជាសម្បត្តិរដ្ឋវិញ ដកហូតកិច្ចព្រមព្រៀង អាជ្ញាបណ្ណ លិខិតអនុញ្ញាត រួមទាំងកម្ទេចចោលវត្ថុតាងក្លែងបន្លំ។
ចំណែកមាត្រា១០០នៃច្បាប់ដដែលនេះ ចែងថា ប្រសិនបើបទល្មើសនោះប្រព្រឹត្តដោយមន្ត្រីអាជ្ញាធរដែនដី មន្ត្រីនគរបាល មន្ត្រីយោធា និងមន្ត្រីអាជ្ញាធរផ្សេងទៀត ដោយបានធ្វើអន្តរាគមន៍ ផ្ដល់ការអនុញ្ញាតឬប្រយោល ដើម្បីជួយដល់សកម្មភាពល្មើសគ្រប់យ៉ាង ត្រូវផ្ដន្ទាទោសដាក់ពន្ធនាគារពី១ឆ្នាំ ទៅ ៥ឆ្នាំ និងពិន័យពី១០លានរៀល ទៅ ១០០លានរៀល៕