ទីប្រឹក្សាក្រសួងការបរទេសអាមេរិក ធ្វើដំណើរទស្សនកិច្ចមកកាន់កម្ពុជា និងឥណ្ឌូនេស៊ី ដើម្បីពិភាក្សាអំពីតួនាទីកម្ពុជាក្នុងនាមជាប្រធានអាស៊ានប្ដូរវេន ពង្រឹងតួនាទីរបស់អាស៊ានទាក់ទងនឹងស្ថិរភាពក្នុងតំបន់ ព្រមទាំងដោះស្រាយវិបត្តិដែលកំពុងតែបន្តកើតឡើងនៅក្នុងប្រទេសភូមា។
ក្រសួងការបរទេសអាមេរិក នៅថ្ងៃទី០៨ ខែធ្នូ ម្សិលមិញនេះ បានផ្សាយនៅលើគេហទំព័ររបស់ខ្លួនថា ទីប្រឹក្សាក្រសួងការបរទេសអាមេរិក លោក Derek Chollet នឹងធ្វើដំណើរមកកម្ពុជា និងឥណ្ឌូនេស៊ី ចាប់ពីថ្ងៃទី៨ ដល់ទី១៣ ខែធ្នូ ដើម្បីជួបពិភាក្សាជាមួយអ្នកពាក់ព័ន្ធនានាលើបញ្ហាសំខាន់ៗក្នុងតំបន់ ដែលបូករួមទាំងវិបត្តិនៅក្នុងប្រទេសភូមាផងដែរ។
ប្រភពដដែលបន្តថា ដំណើរទស្សនកិច្ចរបស់ទីប្រឹក្សារូបនេះ ក៏នឹងពង្រឹងតួនាទីស្នូលរបស់អាស៊ាន (ASEAN centrality) និងតួនាទីសំខាន់របស់អាស៊ានក្នុងស្ថិរភាពតំបន់ កំណើនសេដ្ឋកិច្ច និងការរក្សាឱ្យបាននូវសណ្ដាប់ធ្នាប់ដែនសមុទ្រដែលផ្អែកលើច្បាប់ ជាពិសេសនៅឯសមុទ្រចិនខាងត្បូង។
ក្រសួងការបរទេសអាមេរិកគូសបញ្ជាក់ដែលមានន័យជាភាសាខ្មែរថា៖ «នៅក្នុងទីក្រុងភ្នំពេញ លោក Derek Chollet នឹងពិភាក្សាអំពីតួនាទីក្នុងនាមជាប្រធានអាស៊ានប្ដូរវេននាពេលខាងមុខរបស់កម្ពុជា។ ជាមួយគ្នានេះ លោកក៏នឹងពង្រឹងការគាំទ្ររបស់សហរដ្ឋអាមេរិកសម្រាប់សង្គមស៊ីវិល និងប្រជាជនកម្ពុជាផងដែរ»។
ទីប្រឹក្សាក្រសួងការបរទេសអាមេរិក លោក Derek Chollet បានចែករំលែក (share) ការផ្សាយរបស់ក្រសួងការបរទេសអាមេរិកនៅលើប្រព័ន្ធ twitter របស់លោក ហើយសរសេរខ្លឹមសារ (caption) ថាលោកនឹងធ្វើដំណើរទៅកាន់ប្រទេសកម្ពុជា និងឥណ្ឌូនេស៊ី ដើម្បីពិភាក្សាអំពីតួនាទីជាប្រធានអាស៊ានប្ដូរវេន ពង្រឹងអាស៊ាន និងផ្ដោតលើវិបត្តិនយោបាយនៅប្រទេសភូមា។
លោក Derek Chollet សរសេរដោយមានន័យជាភាសាខ្មែរថា៖ «ក្នុងសប្ដាហ៍នេះ ខ្ញុំនឹងធ្វើដំណើរទៅកាន់ប្រទេសកម្ពុជា និងឥណ្ឌូនេស៊ី ដើម្បីពិភាក្សាអំពីតួនាទីជាប្រធានអាស៊ានប្ដូរវេននាពេលខាងមុខរបស់កម្ពុជា ពង្រឹងតួនាទីរបស់អាស៊ានទាក់ទងនឹងស្ថិរភាពក្នុងតំបន់ ក៏ដូចជាដោះស្រាយវិបត្តិដែលកំពុងតែបន្តកើតឡើងនៅក្នុងប្រទេសភូមា»។
ក្រសួងការបរទេសអាមេរិកថ្លែងនៅថ្ងៃព្រហស្បតិ៍នេះថា ពេលទៅទីក្រុងហ្សាកាតា លោក Derek Chollet នឹងផ្ដោតទៅលើភាពជាដៃគូយុទ្ធសាស្ត្ររវាងសហរដ្ឋអាមេរិក និងឥណ្ឌូនេស៊ី ឱ្យកាន់តែស៊ីជម្រៅបន្ថែមទៀត។
បើតាមក្រសួងការបរទេសអាមេរិក ក្នុងដំណើររបស់ទីប្រឹក្សារូបនេះ លោកក៏នឹងគូសបញ្ជាក់អំពីសារៈសំខាន់នៃការពង្រឹងកិច្ចសហប្រតិបត្តិការរវាងសហរដ្ឋអាមេរិក និងអាស៊ាន ដើម្បីជំរុញរបបយោធាភូមាឱ្យបញ្ឈប់នូវអំពើហិង្សា ដោះលែងអ្នកដែលត្រូវបានឃុំឃាំងដោយអយុត្តិធម៌ទាំងឡាយ អនុញ្ញាតឱ្យមានសកម្មភាពមនុស្សធម៌ចូលទៅកាន់ប្រទេសដោយមិនមានការរារាំង និងស្ដារឡើងវិញនូវលទ្ធិប្រជាធិបតេយ្យរបស់ភូមាផងដែរ។
អ្នកនាំពាក្យស្ថានទូតអាមេរិកប្រចាំនៅកម្ពុជា លោក Chad Roedemeier ប្រាប់ វីអូឌី តាមប្រព័ន្ធសារអេឡិចត្រូនិចអ៊ីម៉ែលនៅថ្ងៃនេះ ដូចអ្វីដែលក្រសួងការបរទេសអាមេរិកលើកឡើងដែរ។
លោក Chad Roedemeier សរសេរថា៖ «លោក Derek Chollet នឹងពិភាក្សាអំពីតួនាទីក្នុងនាមជាប្រធានអាស៊ានប្ដូរវេននាពេលខាងមុខរបស់កម្ពុជា។ លោកក៏នឹងពង្រឹងការគាំទ្ររបស់សហរដ្ឋអាមេរិកសម្រាប់សង្គមស៊ីវិល និងប្រជាជនកម្ពុជា។ […] លោក Derek Chollet នឹងផ្ដោតទៅលើភាពជាដៃគូយុទ្ធសាស្ត្ររវាងសហរដ្ឋអាមេរិក និងឥណ្ឌូនេស៊ី ឱ្យកាន់តែស៊ីជម្រៅបន្ថែមទៀត»។
អ្នកនាំពាក្យក្រសួងការបរទេសកម្ពុជា លោក កុយ គួង សុំមិនធ្វើអត្ថាធិប្បាយជុំវិញដំណើររបស់ទីប្រឹក្សាក្រសួងការបរទេសអាមេរិកមកកម្ពុជាទេ។
លោក កុយ គួង តបយ៉ាងខ្លីតាមតេលេក្រាមថា៖ «សុំមិនទាន់មានមតិសិន»។
ប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន ថ្លែងថា កម្ពុជាស្វាគមន៍ដំណើរទស្សនកិច្ចរបស់ទីប្រឹក្សាក្រសួងការបរទេសអាមេរិក ដោយថា នេះជាកិច្ចសហប្រតិបត្តិការទ្វេភាគីរវាងកម្ពុជាជាមួយសហរដ្ឋអាមរិក។
លោក ផៃ ស៊ីផាន មានជំនឿថា ប្រទេសទាំង២នឹងយល់ពីគ្នាទៅវិញទៅមក ក៏ដូចជាយល់ពីបញ្ហាប្រឈមរវាងគ្នាទៅវិញទៅមកផងដែរ។
លោកមានសុទិដ្ឋិនិយមថា អាមេរិកនឹងយល់ពីបំណងនៃទស្សនកិច្ចរបស់ប្រមុខរដ្ឋាភិបាលទៅភូមា ដោយថា នេះមិនមែនជាការទទួលស្គាល់ឬលើកតម្កើងភាគីណាមួយនោះទេ។
លោក ផៃ ស៊ីផាន ថា៖ «ខ្ញុំជឿជាក់ថា កាលណាជួបគ្នា យើងយល់គ្នាហើយ យើងដឹងអំពីហ្នឹង ហើយយើងសង្ឃឹមថា ជំនួបនេះ អ្វីដែលយើងសង្ឃឹមទុក គឺថានៅពេលដែលយល់ សហរដ្ឋអាមេរិកហ្នឹងច្បាស់ជាជួយធ្វើឱ្យកម្ពុជាមានលទ្ធភាពអាចធ្វើឱ្យមានការវិលត្រលប់មកកាន់ដំណោះស្រាយនយោបាយណាមួយសមស្របរវាងភាគីពាក់ព័ន្ធទាំងអស់របស់ភូមា ហើយបញ្ចប់នូវឃាតកម្ម ការបញ្ចប់នូវសោកនាដកម្មរបស់ភូមានេះឯង»។
អ្នកស្រាវជ្រាវផ្នែកភូមិសាស្ត្រនយោបាយ លោក វណ្ណ ប៊ុនណា មើលឃើញថា ដំណើរទស្សនកិច្ចរបស់ទីប្រឹក្សាការបរទេសអាមេរិកមកកម្ពុជា និងឥណ្ឌូនេស៊ីនេះ ហេតុផលធំមួយគឺផ្ដោតសំខាន់លើបញ្ហាភូមា។ លោកថា លោក Derek Chollet មកទស្សនកិច្ចកម្ពុជា ខណៈកម្ពុជានឹងធ្វើជាប្រធានអាស៊ានប្ដូរវេននៅឆ្នាំ២០២២ រីឯឥណ្ឌូនេស៊ីគឺជាប្រទេសដែលគេមើលឃើញថាជាបងធំអាស៊ាន ជាប្រទេសនាំមុខផ្នែកការទូតលើវិបត្តិភូមា ដែលអាមេរិកត្រូវតែធ្វើការជាមួយ។
លោកបន្តថា អាមេរិកចង់ស្ទាបស្ទង់ពីដំណើរការដោះស្រាយបញ្ហាភូមាក្នុងយន្តការអាស៊ាន ស្របពេលប្រទេសមហាអំណាចមួយនេះចង់ដឹងថាខ្លួនអាចជួយអ្វីខ្លះដល់អាស៊ាន ហើយអាស៊ានត្រូវការឱ្យអាមេរិកជួយអ្វីខ្លះដែរ។
លោក វណ្ណ ប៊ុនណា ប្រាប់ថា៖ «ដំណើរទស្សនកិច្ចរបស់គាត់ ជារួមគឺផ្ដោតសំខាន់ទៅលើបញ្ហានៅភូមា។ ហើយអ្វីដែលគាត់ចង់ដឹង អាចប្រហែលជាចង់ដឹងពីជំហររបស់កម្ពុជាដែលវិវត្តចុងក្រោយទាក់ទងនឹងការអញ្ជើញរបស់មេដឹកនាំយោធា ជាពិសេសរដ្ឋមន្ត្រីការបរទេសរបស់ភូមាដែលអញ្ជើញមកកម្ពុជាកាលពីថ្ងៃមុន។ ហើយមួយទៀត ទាក់ទងពីគម្រោងទស្សនកិច្ចសិក្សារបស់លោកនាយករដ្ឋមន្ត្រី [ហ៊ុន សែន] នៅភូមានាខែក្រោយផងដែរ»។
តាមការគ្រោងទុក លោកនាយករដ្ឋមន្ត្រី ហ៊ុន សែន នឹងធ្វើទស្សនកិច្ចនៅប្រទេសភូមា នៅថ្ងៃទី៧-៨ ខែមករា ឆ្នាំ២០២២ខាងមុខនេះ តបតាមការអញ្ជើញរបស់មេដឹកនាំរបបយោធាប្រទេសនេះ លោក Min Aung Hlaing បន្ទាប់ពីរដ្ឋមន្ត្រីការបរទេសរបស់ខ្លួនបានមកបំពេញទស្សនកិច្ចនៅកម្ពុជាកាលពីថ្ងៃទី៧ ខែធ្នូនេះ៕
Looking forward to traveling to Cambodia and Indonesia this week, where I will discuss Cambodia’s upcoming chairmanship of @ASEAN, reinforce ASEAN’s role in regional stability, and address the ongoing crisis in Burma. https://t.co/srybluHzAt
— Derek Chollet (@CounselorDOS) December 8, 2021