ប្រធានាធិបតីហ្វីលីពីន លោក រ៉ូឌ្រីហ្គោ ឌុយទែរតេ (Rodrigo Duterte) បានថ្លែងឱ្យដឹងនៅថ្ងៃអង្គារម្សិលមិញនេះថា លោកនឹងមិនសុំទោសជាដាច់ខាតចំពោះការស្លាប់បាត់បង់ជីវិតរបស់អ្នកប្រើប្រាស់និងជួញដូរគ្រឿងញៀន នៅក្នុងសង្គ្រាមប្រឆាំងគ្រឿងញៀនរបស់លោកឡើយ។
ទីភ្នាក់ងារសារព័ត៌មាន Reuters បានស្រង់សម្ដីប្រធានាធិបតីហ្វីលីពីនរូបនេះ ដែលបានថ្លែងនៅក្នុងសុន្ទរកថាមួយប្រចាំសប្ដាហ៍ថា៖ «ខ្ញុំនឹងមិនសុំទោសជាដាច់ខាតចំពោះការស្លាប់ទាំងនេះ។ បើទោះបីជាត្រូវស្លាប់ឬចាប់ខ្ញុំដាក់គុក ក៏ខ្ញុំមិនធ្វើការសុំទោសឡើយ»។
យោងតាមទិន្នន័យរបស់រដ្ឋាភិបាលបង្ហាញថា ជនសង្ស័យដែលជាប់ពាក់ព័ន្ធនឹងករណីគ្រឿងញៀនជាង៦ ០០០នាក់បានស្លាប់បាត់បង់ជីវិតនៅក្នុងប្រតិបត្តិការប្រឆាំងគ្រឿងញៀន គិតចាប់តាំងពីលោក ឌុយទែរតេ ចូលកាន់តំណែងក្នុងខែមិថុនា ឆ្នាំ២០១៦ រហូតដល់ខែវិច្ឆិកា ឆ្នាំ២០២១។
ទាក់ទិននឹងករណីនេះ ប្រទេសហ្វីលីពីនក៏ទទួលរងសម្ពាធពីអង្គការសហប្រជាជាតិ ក្នុងការស៊ើបអង្កេតលើការចោទប្រកាន់ពីបទឃាតកម្មជាប្រព័ន្ធលើជនសង្ស័យគ្រឿងញៀនទាំងឡាយ ខណៈដែលតុលាការឧក្រិដ្ឋកម្មអន្តរជាតិ (ICC) កាលពីពេលកន្លងទៅ ក៏ធ្លាប់បានប្រកាសពីគោលបំណងក្នុងការស៊ើបអង្កេតយុទ្ធនាការប្រឆាំងគ្រឿងញៀនរបស់លោក ឌុយទែរតេ ដែលបានសម្លាប់មនុស្សរាប់ពាន់នាក់នេះផងដែរ៕
