ប្រជាពលរដ្ឋមួយចំនួនដែលរស់នៅឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ បានអះអាងថា មានករណីកាប់បំផ្លាញព្រៃឈើរាល់ថ្ងៃនៅក្នុងតំបន់ដែនជម្រកសត្វព្រៃភ្នំឱរ៉ាល់។
ការអះអាងរបស់ប្រជាពលរដ្ឋនេះ បន្ទាប់ពីពួកគេបានពើបប្រទះនឹងគំនរឈើដែលទើបកាប់ថ្មីៗ និងឈើដែលបានដឹកជញ្ជូនចេញទាំងថ្ងៃទាំងយប់ ដែលពួកគេសន្មត់ថា អាជ្ញាធរដែលការពារនៅក្នុងតំបន់នេះ គឺជាអ្នកបើកដៃឱ្យអ្នកកាប់ និងឈ្មួញឈើធ្វើសកម្មភាពខុសច្បាប់ទាំងនេះ។
អ្នកនាំភ្ញៀវលើភ្នំឱរ៉ាល់ មានស្រុកកំណើត នៅភូមិល្ងឹម ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ លោក កាយ គិន បានឱ្យដឹងថា បទល្មើសព្រៃឈើនៅតំបន់ភ្នំឱរ៉ាល់ចាប់ពីជើងភ្នំរហូតដល់កំពូលភ្នំ មានការកាប់បំផ្លាញជារៀងរាល់ថ្ងៃដែលធ្វើឱ្យព្រៃឈើនៅតំបន់ភ្នំឱរ៉ាល់ស្ទើតែបាត់បង់។ លោកបន្តថា ការកាប់នេះពេលខ្លះមកពីអ្នកចំណូលថ្មីនិងអ្នកស្រុកភូមិដែលមានរបរជាអ្នកកាប់ឈើលក់ ខណៈដែលអាជ្ញាធរនិងមន្ទីរបរិស្ថានមិនមានការអើពើចំពោះបញ្ហានេះឡើយ។
លោកថា៖ «អាជ្ញាធរឬក្រសួងមន្ទីរបរិស្ថានអី គាត់អត់អើពើផង ចេញមួយយប់ៗច្រើនគោយន្ត មានការដឹកចេញរហូត»។
លោកបានសង្កេតឃើញថា ឈើដែលអាចដឹកចេញបានមកពីមន្ត្រីមិនបានយកចិត្តទុកដាក់ និងគុបគិតជាមួយឈ្មួញ។ លោកបន្ថែមថា ឈើប្រភេទល្អទីមួយ ស្ទើរតែបាត់បង់ហើយ នៅសល់តែប្រភេទឈើទីពីរ និងទីបីប៉ុណ្ណោះ។
លោកថា៖ «រាល់ថ្ងៃមានតែលុយហ្នឹង! បើអត់លុយមិនអាចចេញបានទេ តែគាត់ការពារឆ្នាំងបាយរបស់គាត់ដែរ ជួយរកហេតុផលវែកញែករឿងទប់ស្កាត់ធនធានធម្មជាតិ ជួយបន្តឹងបើអត់ទេ នៅតែចឹងរហូតព្រៃឈើកាន់តែអស់ ប្រជាពលរដ្ឋមានអី មានតែរងទុក្ខវេទនាហ្នឹង»។
លោក ហុង ប៊ុនហាន ប្រជាជនដែលរស់នៅភូមិឈើទាលជ្រុំ ឃុំត្រពាំងជោ ស្រុកឱរ៉ាល់ ថា ដោយសារមានការកាប់ព្រៃឈើលើភ្នំឱរ៉ាល់កើតឡើងស្ទើរតែរាល់ថ្ងៃ ហើយភាគច្រើនដែលមកពីគ្រប់តំបន់ប្រមាណជា ១០ គីប ឬ ស្មើ ៥៨០ សន្លឹកក្នុងមួយថ្ងៃៗ សម្រាប់តែឃុំត្រពាំងជោមួយ ដោយមិនគិតពីរឃុំផ្សេងទៀតនៃស្រុកឱរ៉ាល់នោះទេ។ លោកបន្តថា អាជ្ញាធរដែលពាក់ព័ន្ធក៏បានដឹងអំពីការកាប់ព្រៃឈើដែរ ឬអាចជាអ្នកទទួលសំណូកពីឈ្មួញផងដែរ។
លោកថា៖ «មិនមែនមិនដឹងទេលោកគ្រូអើយ! ដឹងហើយតែគ្រាន់ថា! ធម្មតាគេឱ្យលុយឱ្យកាក់តិចតួតទៅ គេចេះឱ្យឈើចេញចឹងទៅណា»។
លោកមានការបារម្ភថា ប្រសិនបើមិនមានការចូលរួមទប់ស្កាត់ទាំងអស់គ្នាទេ នោះតំបន់ភ្នំឱរ៉ាល់ប្រាកដជាមិនមានព្រៃឈើសម្រាប់មនុស្សជំនាន់ក្រោយនោះឡើយ។
លោកថា៖ «បើទៅអនាគតគ្មានសល់ទៀតទេ បើយើងមិនបានទប់ស្គាត់ការកាប់បំផ្លាញឱ្យបានរឹងមាំ គឺព្រៃឈើ គឺច្បាស់តែរលាយទៅអនាគត»។
អ្នកស្រី ឃន ផាន អាយុ៦៥ រស់នៅភូមិពោមារ ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ បានសង្កេតឃើញថា នៅព្រៃសហគមន៍ដែលហៅថាព្រៃមាតាធម្មជាតិជិតតំបន់ភ្នំឱរ៉ាល់ ក៏មានការកាប់បំផ្លាញរាល់ថ្ងៃ រហូតដល់ថ្ងៃខ្លះការកាប់ឈើឈានដល់៥ហិកតាក្នុងមួយថ្ងៃ ចំណែកឯការកាប់នេះសុទ្ធតែបានការពារពីសំណាក់អាជ្ញាធរទៅវិញ។
អ្នកស្រីថា៖ «បើតាមខ្ញុំដែលពិនិត្យផ្ទាល់ ជួបផ្ទាល់ហ្មង គេឃុបឃិតតាំងពីភូមិដល់ឃុំ តាំងពីឃុំដល់ស្រុកខេត្ត»។
លោកស្រីបន្តថា បច្ចុប្បន្នមានតែប្រជាពលរដ្ឋទេ ដែលជាអ្នករួមគ្នាការពានិងតវ៉ាការកាប់បំផ្លាញព្រៃឈើក្នុងព្រៃសហគមន៍ ទោះបីជាមិនមានប្រសិទ្ធភាពច្រើនក៏ដោយ។
អ្នកស្រីថា៖ «មួយរយៈនេះយើងនាំប្រជាពលរដ្ឋគ្រប់ភូមិទាំងអស់ផ្ដិតមេដៃឡើងទៅឱ្យឈប់កាប់ហ្មង អត់ឱ្យហ្មងការពារទុករហូតដល់ក្មេងជំនាន់ក្រោយបើនៅបំផ្លាញទៀតយើងតវ៉ារហូតហ្មង»។
មន្ត្រីជាន់ខ្ពស់ប្រព័ន្ធផ្សព្វផ្សាយនៃសមាគមបណ្ដាញយុវជនកម្ពុជា លោក ម៉ា ចិត្រា បានលើកឡើងថា បទល្មើសព្រៃឈើនៅតំបន់ឱរ៉ាល់នៅតែបន្តកើតមានដោយសារបញ្ហាចម្បងមកពីមានអំពើពុករលួយនិងអាជ្ញាធរអសមត្ថភាពនៅក្នុងការគ្រប់គ្រងតំបន់នោះ ទន្ទឹមនឹងនេះក៏មានការយកលុយពីអ្នកកាប់ឈើជាដើមដែលជាមូលហេតុនៅតែបន្តកើតមាន។
លោកថា៖ «អ្វីដែលសំខាន់នោះ គឺវាអាចមាន មិនអាចដោះស្រាយបានទេ ព្រោះវាកើតទៅជាប្រព័ន្ធទៅហើយ មិនថាតំបន់ឱរ៉ាល់ទេ សូម្បីតែកន្លែងតំបន់ផ្សេងទៀតហ្នឹងក៏ដោយ ជួនណាទៅ ខាងរដ្ឋហ្នឹង គេយកហេតុផលថា ដោយសារតែសេដ្ឋកិច្ចពលរដ្ឋអ៊ីចឹងជាដើម យើងមើលទៅមិនអាចទប់ស្កាត់បានទេ បើសិនជារដ្ឋាភិបាលគាត់មិនព្រមផ្លាស់ប្ដូរឥរិយាបថក្នុងការគ្រប់គ្រងព្រៃឈើឱ្យបានល្អ»។
លោកបានបន្ថែមថា ដើម្បីថែរក្សាព្រៃឈើឱ្យនៅគង់វង្សរដ្ឋាភិបាលគួរតែមានការប្ដេជ្ញាចិត្តនៅក្នុងការការពារពិតប្រាកដ មិនមែនយកតួនាទីការការពារព្រៃឈើទៅរកលុយពីអ្នកកាប់ឈើដើម្បីភាពមានបានខ្លួនឯងឬបក្សពួកខ្លួនឯងនោះទេ។ លោកបន្តថា លុះត្រាតែមន្រ្តីយកតួនាទីរបស់ខ្លួនឯងការពារព្រៃឈើពិតប្រាកដទើបមានការការពារបាន ចំណែកប្រជាពលរដ្ឋត្រូវចាត់ទុកព្រៃឈើជារបស់ខ្លួននិងចូលរួមការពារព្រៃយ៉ាងសកម្មផងដែរ បានអាចការពារបានតទៅមុខទៀត។
លោកថា៖ «ដើម្បីរក្សាការពារព្រៃឈើឱ្យបានគង់វង្សទាល់តែមន្ត្រីរាជការមានការប្ដេជ្ញាចិត្តក្នុងការការពារមែនទែន មិនមែនយកតួនាទីការពារព្រៃឈើដើម្បីទៅរកលុយបំពាក់បំប៉នបក្សពួក គូកនយកតួនាទីអ្នកការពារព្រៃឈើហ្នឹងទៅយកលុយពីអ្នកកាប់ព្រៃឈើដើម្បីភាពមានបានក្រុមគ្រួសារខ្លួនឯកបក្សពួកខ្លួនឯងទេ»។
វីអូឌីមិនអាចសុំការឆ្លើយតបពី អ្នកនាំពាក្យក្រសួងបរិស្ថាន លោក នេត្រ ភក្រ្តា និងប្រធានមន្ទីរបរិស្ថានខេត្តកំពង់ស្ពឺបាននោះទេ។ គួរបញ្ជាក់ថា ភ្នំឱរ៉ាល់ គឺជាកំពូលភ្នំខ្ពស់ជាងគេនៅកម្ពុជា មានកំពស់ ១,៨១៣ ម៉ែត្រ ស្ថិតនៅផ្នែកខាងកើតនៃជួរភ្នំក្រវាញនិងជាតំបន់ការពារភ្នំដែនជម្រកសត្វព្រៃភ្នំឱរ៉ាល់ដែលចេញដោយព្រះរាជក្រឹត្យកាលពីឆ្នាំ១៩៩៣ មានផ្ទៃដី២៥៣,៧៥០ហិចតា៕
