ស្ថានបេសកកម្មអចិន្រ្តៃយ៍កម្ពុជាប្រចាំនៅទីក្រុងហ្សឺណែវ បានបដិសេធយ៉ាងដាច់អហង្ការចំពោះសេចក្ដីថ្លែងការណ៍របស់អ្នកជំនាញផ្នែកសិទ្ធិមនុស្សអង្គការសហប្រជាជាតិ (UN) ចំនួន៣រូប ជុំវិញការរិះគន់លើអនុក្រឹត្យស្ដីពី «ច្រកទ្វារអ៊ីនធឺណិតជាតិ»។
ប្រតិកម្មនេះធ្វើឡើងក្រោយអ្នកជំនាញអង្គការសហប្រជាជាតិ ៣រូប បានចេញសេចក្ដីថ្លែងការណ៍ទទូចឱ្យអាជ្ញាធរកម្ពុជាបញ្ឈប់ផែនការអនុវត្តអនុក្រឹត្យស្ដីពី «ច្រកទ្វារអ៊ីនធឺណិតជាតិ» ដោយអះអាងថា អនុក្រឹត្យនេះមានការរឹតត្បិត ព្រមទាំងធ្វើឱ្យប៉ះពាល់ដល់សិទ្ធិឯកជន និងសេរីភាពបែបប្រជាធិបតេយ្យនៅប្រទេសកម្ពុជា។
សេចក្ដីថ្លែងការណ៍របស់តំណាងស្ថានបេសកកម្មអចិន្រ្តៃយ៍កម្ពុជាប្រចាំនៅអង្គការសហប្រជាជាតិ ចុះថ្ងៃទី១ ខែកុម្ភៈ បានចាត់ទុកការលើកឡើងរបស់អ្នករាយការណ៍ពិសេសអង្គការសហប្រជាជាតិទាំង៣រូប ថាមើលឃើញតែមួយជ្រុង ធ្វើនយោបាយូបនីកម្ម បែបស្រមើស្រមៃ និងបង្កការភ័ន្តច្រឡំ ខណៈខ្លួនពុំមែនជាបុគ្គលិកអង្គការសហប្រជាជាតិ ពាក់ព័ន្ធនឹង «ច្រកទ្វារអ៊ីនធឺណិតជាតិ» នៅកម្ពុជា។
ស្ថានបេសកកម្មអចិន្រ្តៃយ៍កម្ពុជាប្រចាំនៅទីក្រុងហ្សឺណែវបន្តថា ការបង្កើតអនុក្រឹត្យស្ដីពី «ច្រកទ្វារអ៊ីនធឺណិតជាតិ» នេះ ពុំមែនមិនធ្លាប់មានក្នុងពិភពលោកនេះឡើយ។
តំណាងកម្ពុជាបន្ថែមថា ឧបករណ៍ដ៏សំខាន់នេះត្រូវបានអនុម័តសម្រាប់គោលដៅស្របច្បាប់ ដើម្បីជួយសម្រួលនិងគ្រប់គ្រងការតភ្ជាប់អ៊ីនធឺណិត ពង្រឹងសន្តិសុខជាតិ និងការប្រមូលពន្ធ និងជួយរក្សាសណ្ដាប់ធ្នាប់សង្គម និងការពារវប្បធម៌ជាតិ។
តំណាងកម្ពុជាគូសបញ្ជាក់ថា៖ «គ្មានកថាខណ្ឌណាមួយក្នុងអនុក្រឹត្យស្ដីពីច្រកទ្វារអ៊ីនធឺណិតជាតិ អនុញ្ញាតឱ្យមានការប្រមូលទិន្នន័យអ្នកប្រើប្រាស់ ឬការឃ្លាំមើលលើបុគ្គលឡើយ។ ការតភ្ជាប់ ឬប្រតិបត្តិការបច្ចេកទេសទាំងអស់ត្រូវបានធ្វើឡើងដោយមានការធានាសន្តិសុខ និងរក្សាទុកក្នុងប្រព័ន្ធសុវត្ថិភាព ស្របទៅតាមបទដ្ឋានអន្តរជាតិ។ ដើម្បីការពារសិទ្ធិឯកជនភាពរបស់បុគ្គល ច្បាប់ស្ដីពីការការពារទិន្នន័យបុគ្គលនឹងត្រូវបានតាក់តែងឡើង និងឆ្លងកាត់ការពិគ្រោះយោបល់ពីសំណាក់ភាគីពាក់ព័ន្ធជាច្រើន»។
តំណាងកម្ពុជានៅទីក្រុងហ្សឺណែវ បានបន្ថែមថា រដ្ឋាភិបាលកម្ពុជានៅតែប្តេជ្ញាការពារឯកជនភាពនិងសេរីភាពក្នុងការបញ្ចញមតិតាមរយៈប្រព័ន្ធអ៊ីនធឺណិត។
រដ្ឋលេខាធិការក្រសួងប្រៃសណីយ៍ និងទូរគមនាគមន៍ លោក សូ វិសុទ្ធី ចាត់ទុកការលើកឡើងរបស់សង្គមស៊ីវិល ដែលថាអនុក្រឹត្យស្ដីពីការបង្កើត «ច្រកទ្វារអ៊ីនធឺណិតជាតិ» ជាចេតនារបស់រដ្ឋាភិបាលក្នុងការចាប់យកទិន្នន័យផ្ទាល់ខ្លួនរបស់អ្នកប្រើប្រាស់ ថាជារឿងយល់ច្រឡំ។
លោកប្រាប់ វីអូឌី តាមតេឡេក្រាមថា៖ «មានការយល់ច្រឡំ និងលើកឡើងជាបន្តបន្ទាប់ថា អនុក្រឹត្យស្ដីពីការបង្កើតច្រកទ្វារអ៊ីនធឺណិតជាតិ ជាចេតនារបស់រាជរដ្ឋាភិបាល ដែលអាចចាប់យកទិន្នន័យផ្ទាល់ខ្លួនរបស់អ្នកប្រើប្រាស់ រឹតត្បិតសេរីភាពក្នុងការបញ្ចេញមតិ និងសេរីភាពសារព័ត៌មាន។ល។»
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា (CamboJA) លោក ណុប វី យល់ថា ការផ្ដល់យោបល់ណាមួយតែងតែមានហេតុផល ហើយកម្ពុជាគួរពិចារណាថាតើហេតុផលដែលអ្នករាយការណ៍ពិសេសបានលើកឡើងនោះមានភាពសមស្របនឹងបរិបទសង្គម និងមានផលប្រយោជន៍សម្រាប់សិទ្ធិមនុស្ស និងសេរីភាពមូលដ្ឋានរបស់ពលរដ្ឋនៅក្នុងសង្គមប្រជាធិបតេយ្យដែរឬយ៉ាងណា។
លោកបន្ថែមថា អនុក្រឹត្យស្ដីពីការបង្កើត «ច្រកទ្វារអ៊ីនធឺណិតជាតិ» នេះ តម្រូវឱ្យក្រុមហ៊ុនគ្រប់គ្រងអ៊ីនធឺណិតនៅកម្ពុជាទាំងអស់ប្រតិបត្តការបណ្ដាញរបស់ខ្លួនតាមច្រកទ្វារមួយដែលគ្រប់គ្រងដោយរដ្ឋាភិបាល ហើយក្រុមហ៊ុនទាំងនោះអាចមានសិទ្ធិតាមដានអ្នកប្រើប្រាស់អ៊ីនធឺណិតគ្រប់រូប។
លោក ណុប វី មានប្រសាសន៍ថា៖ «អ្វីដែលយើងបារម្ភ គឺខ្លាចថាអ្នកដែលគាត់ចង់ចូលរួមបញ្ចេញមតិអីហ្នឹង គឺគាត់លែងអាចបញ្ចេញមតិបាន ដោយសារគាត់មានការភ័យខ្លាចៗ អ៊ីចឹងគាត់មាន censorship [ការចាប់ពិរុទ្ធ]»។
លោកបន្តថា៖ «ខ្លឹមសារដែលមាននៅក្នុងអនុក្រឹត្យ គឺមានភាពទូលំទូលាយពេក ដោយសារតែនៅពេលដែលរដ្ឋាភិបាលមានការព្រួយបារម្ភ ឬមួយក៏គាត់មើលឃើញការទំនាក់ទំនងណាដែលគាត់បារម្ភរឿងទាក់ទងជាមួយនឹងផលប្រយោជន៍ ដូចជា សណ្ដាប់ធ្នាប់សាធារណៈ សន្តិសុខជាតិ ឬមួយក៏បញ្ហាផ្សេងៗ វប្បធម៌ សីលធម៌ សង្គមអីហ្នឹង គឺគាត់អាចកាត់ផ្ដាច់ការប្រើប្រាស់បណ្ដាញ [របស់អ្នកប្រើ] ហ្នឹងបាន»។
លោក ណុប វី ចង់ឃើញមន្ត្រីអង្គការសហប្រជាជាតិ សង្គមស៊ីវិល និងរដ្ឋាភិបាលកម្ពុជា ជួបជជែកគ្នាលើបញ្ហានេះ ទទួលយោបល់ទៅវិញទៅមក ដើម្បីធានានូវភាពវិជ្ជមានដល់សង្គម។
ក្រុមអ្នកជំនាញអង្គការសហប្រជាជាតិ កាលពីថ្ងៃទី៣១ ខែមករា បានចេញសេចក្ដីថ្លែងការណ៍មួយជំរុញឱ្យអាជ្ញាធរកម្ពុជាផ្អាកផែនការអនុវត្តអនុក្រឹត្យស្ដីពី «ច្រកទ្វារអ៊ីនធឺណិតជាតិ» ដែលគ្រោងនឹងចូលជាធរមាននៅថ្ងៃទី១៦ ខែកុម្ភៈ ខាងមុខនេះ ដោយអះអាងថា អនុក្រឹត្យនេះមានការរឹតត្បិត ព្រមទាំងធ្វើឱ្យប៉ះពាល់ដល់សិទ្ធិឯកជន និងសេរីភាពបែបប្រជាធិបតេយ្យនៅប្រទេសកម្ពុជា។
បើតាមអ្នកជំនាញ អនុក្រឹត្យនេះនឹងអនុញ្ញាតឱ្យរដ្ឋាភិបាលកម្ពុជាអាចតាមដានសកម្មភាពលើប្រព័ន្ធអ៊ីធឺណិត ស្កាត់ចាប់យក និងត្រួតពិនិត្យការប្រាស្រ័យទាក់ទងតាមប្រព័ន្ធបច្ចេកវិទ្យា ព្រមទាំងប្រមូល រក្សាទុក និងចែករំលែកព័ត៌មានបុគ្គលរបស់អ្នកប្រើប្រាស់នីមួយៗ៕