តុលាការខេត្តមណ្ឌលគិរី សម្រេចចោទប្រកាន់មនុស្ស៦នាក់ពីបទ «ឃាតកម្មគិតទុកជាមុន» និងបទ «ផ្ដើមគំនិតក្នុងអំពើឃាតកម្មគិតទុកជាមុន» ដែលកើតឡើងទៅលើពលរដ្ឋមួយគ្រួសារ បណ្ដាលឱ្យមនុស្សយ៉ាងហោចណាស់៥នាក់ស្លាប់ និងម្នាក់រងរបួសធ្ងន់។
កាលពីថ្ងៃទី១ ខែកុម្ភៈ ឆ្នាំ២០២២ ករណីឃាតកម្មមួយបានកើតឡើងនៅចំណុចស្រែចោល ក្នុងភូមិមេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី បណ្ដាលឱ្យមនុស្ស៥នាក់ស្លាប់ និងម្នាក់រងបួសធ្ងន់ ដោយជនជាប់ចោទថា គ្រួសារជនរងគ្រោះនោះចេះអំពើអាបធ្មប់ និងបានធ្វើអំពើទៅលើក្រុមគ្រួសារពួកគេ។
ព្រះរាជអាជ្ញារងអមសាលាដំបូងខេត្តមណ្ឌលគិរី លោក ស៊ាវ ងីឈាន់ បានឱ្យ វីអូឌី ដឹងនៅថ្ងៃអង្គារនេះថា មនុស្ស៦នាក់នោះត្រូវបានចោទប្រកាន់ពីបទឃាតកម្មគិតទុកជាមុន និងបទផ្ដើមគំនិតក្នុងអំពើឃាតកម្មគិតទុកជាមុន តាមមាត្រា២៨ និងមាត្រា២០០ នៃក្រមព្រហ្មទណ្ឌ។
លោកថា ក្នុងចំណោមពួកគេទាំងនោះ មានពីរនាក់ រួមមានឈ្មោះ ក្លឹង ចន្ធី ភេទប្រុស អាយុ៤០ឆ្នាំ ជនជាតិពូនង និងឈ្មោះ នួន វណ្ណា ភេទប្រុស អាយុ៥៤ឆ្នាំ ជនជាតិខ្មែរ ដែលពួកគេទាំងពីរនាក់ជាអ្នកបញ្ជាឱ្យសម្លាប់ ត្រូវបានតំណាងអយ្យការចោទប្រកាន់ពីបទ «ផ្ដើមគំនិតក្នុងអំពើឃាតកម្មគិតទុកជាមុន»។
លោកបន្តថា ដោយឡែកមនុស្ស៤នាក់ទៀត រួមមាន ឈ្មោះ ចន្ធី ព្វិត ហៅ ពាត, ចន្ធី ផ្វិត, នឹម រខិន ហៅ ខ្លារខិន និងឈ្មោះ រឹម ធា ត្រូវបានតុលាការចោទប្រកាន់ពី «បទឃាតកម្មគិតទុកជាមុន»។
យ៉ាងនេះក្ដី លោកមិនទាន់អាចបញ្ជាក់បានទេ ថាតើជនជាប់ចោទទាំងនោះត្រូវបានបញ្ជូនទៅឃុំនៅពន្ធនាគារឬយ៉ាងណា ដោយថា រឿងនេះបានបញ្ជូនបន្តទៅចៅក្រមស៊ើបរួចរាល់ហើយ។
ស្នងការនគរបាលខេត្តមណ្ឌលគិរី លោក ឡោ សុខា បានប្រាប់ VOD ថាសំណុំរឿងករណីឃាតកម្មនេះ សមត្ថកិច្ចបានបញ្ជូនជនសង្ស័យទាំង៦នាក់ទៅសាលាដំបូងខេត្តកាលពីរសៀលថ្ងៃចន្ទ ទី៧ ខែកុម្ភៈ ម្សិលមិញ ក្រោយពីសមត្ថកិច្ចឃាត់ខ្លួនពួកគេបានកាលពីថ្ងៃទី៥ ខែកុម្ភៈ។
លោកបន្ថែមថា ក្នុងចំណោមមនុស្ស៦នាក់នោះ ជាជនជាតិខ្មែរ៣នាក់ និង៣នាក់ទៀតជាជនជាតិពូនង។ លោកអះអាងថា ក្នុងចំណោមពួកគេទាំងនោះ មាន២នាក់ជាអ្នកបញ្ជា ឬមេគំនិត ហើយ៤នាក់ទៀតគឺជាជនដៃដល់។
លោក ឡោ សុខា និយាយថា៖ «ជនសង្ស័យ និងជនរងគ្រោះមានទីលំនៅជិតគ្នា ហើយពួកគេក៏ត្រូវជាសាច់ញាតិនឹងគ្នាដែរ»។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ប្រចាំខេត្តមណ្ឌលគិរី អ្នកស្រី យុន រ៉ាវី មានប្រសាសន៍ថា ក្នុងចំណោមជនរងគ្រោះដែលស្លាប់ទាំង៥នាក់ គឺមានម្នាក់ជាប្អូនបង្កើតជនជាប់ចោទ។
ដោយឡែក ក្មេងប្រុសដែលរងរបួសធ្ងន់មានអាយុ៧ឆ្នាំនោះ អ្នកស្រីថា បច្ចុប្បន្នកំពុងសម្រាកព្យាបាលនៅមន្ទីរពេទ្យគន្ធបុប្ផា រាជធានីភ្នំពេញ ហើយអ្នកស្លាប់ក៏ត្រូវបានសាច់ញាតិយកទៅធ្វើបុណ្យតាមប្រពៃណីផងដែរ៕
