សាលាដំបូងរាជធានីភ្នំពេញ ប្រកាសថា នឹងបន្តនីតិវិធីលើឧត្ដមសេនីយ៍ផ្កាយ៣ លោកឧកញ៉ា ឌួង ងៀប ដោយសម្អាងថា កុំឱ្យជនត្រូវចោទរូបនេះគេចវេះពីការទទួលខុសត្រូវចំពោះមុខច្បាប់។
ការដែលសាលាដំបូងប្រកាសជាចំហពីជំហរបែបនេះ ក្រោយពីជនត្រូវចោទជាមន្ត្រីផ្កាយ៣រូបនេះបានប្រើប្រាស់បណ្ដាញសង្គមអត្ថាធិប្បាយពីអំពើពុករលួយរបស់ចៅក្រមនៅសាលាដំបូងរាជធានីភ្នំពេញ ពាក់ព័ន្ធសំណុំរឿងចោទប្រកាន់គាត់ពីបទ «ឆបោកជនជាតិតៃវ៉ាន់» និងបានអំពាវនាវរកជំនួយ ពីនាយករដ្ឋមន្ត្រីឱ្យជួយរកយុត្តិធម៌ ក្រោមហេតុផលមិនបានប្រព្រឹត្តកំហុសដូចការចោទប្រកាន់។
លោកថា៖ «ចូលតុលាការម្ដង យកលុយទៅម្ដង ពេលនេះខ្ញុំអស់លុយឱ្យទៀតហើយ»។
តាមរយៈវីដេអូឃ្លីបបង្ហោះលើហ្វេសប៊ុករបស់គាត់ដែលមានរយៈពេលជាង២០នាទី លោក ឌួង ងៀប បានបញ្ជាក់ថា លោកគ្មានប្រាក់៥លានដុល្លារ យកទៅតម្កល់នៅតុលាការតាមការបង្គាប់របស់ចៅក្រម ជាថ្នូរនឹងមិនឃុំខ្លួននៅពន្ធនាគារនោះទេ ហើយថា លោកសុខចិត្តដើរចូលពន្ធនាគារដោយខ្លួនឯង។
យ៉ាងណា សាលាដំបូងរាជធានីភ្នំពេញ តាមរយៈសេចក្ដីថ្លែងការណ៍ ចុះថ្ងៃទី១០ ខែកុម្ភៈនេះ បានបញ្ជាក់ថា៖ «សាលាដំបូងរាជធានីភ្នំពេញ នឹងបន្តអនុវត្តតាមនីតិវិធីជាធរមានចំពោះករណីនេះ ដោយមិនអនុញ្ញាតឱ្យជនត្រូវចោទ ឌួង ងៀប ប្រើប្រាស់ប្រព័ន្ធបណ្ដាញសង្គម ដើម្បីគេចវេះពីការទទួលខុសត្រូវរបស់ខ្លួនឡើយ»។
តុលាការបានបញ្ជាក់ថា លោក ឌួង ងៀប ពាក់ព័ន្ធនឹងករណីលក់ដីមួយកន្លែងដែលអ្នកទិញជាដើមបណ្ដឹងរដ្ឋប្បវេណី ឈ្មោះ CHIH YU និងឈ្មោះ YAO CHING KING បានប្រគល់ប្រាក់ថ្លៃដីគ្រប់ចំនួនជាង៧លានដុល្លារ (៧ ៣០៥ ០០០ដុល្លារ) រួចរាល់អស់ហើយ តែថាជនត្រូវចោទ ពុំមានដីប្រគល់ឱ្យម្ចាស់លុយឡើយ។ មួយវិញទៀត តុលាការបញ្ជាក់ថា ប្រាក់ជាង៥លានដុល្លារ (៥ ៣០៥ ០០០ដុល្លារ) ដែលចៅក្រមស៊ើបសួរតម្រូវឱ្យយកមកតម្កល់នៅសាលាដំបូងនោះ ធ្វើតាមដីកាសម្រេចចុះថ្ងៃទី១៣ ខែសីហា ឆ្នាំ២០២១ ដែលថាមានកាតព្វកិច្ចតម្រូវឱ្យជនត្រូវចោទដាក់ប្រាក់ធានាមិនឃុំខ្លួន។
យ៉ាងនេះក្ដី សេចក្ដីប្រកាសរបស់តុលាការមិនបានបដិសេធលើការអត្ថាធិប្បាយរបស់លោក ឌួង ងៀប ដែលថាបានចំណាយលុយក្រៅផ្លូវការច្រើន ឱ្យទៅមន្ត្រីតុលាការរហូតអស់លទ្ធភាពឱ្យនោះទេ។
លោក ឌួង ងៀប មិនទាន់អាចសុំការបញ្ជាក់បន្ថែមបាន ដោយអ្នកលើកទូរសព្ទអះអាងថា គាត់កំពុងជួបថ្នាក់ដឹកនាំ។
តែយ៉ាងណា កាលពីថ្ងៃម្សិលមិញ អ្នកនាំពាក្យក្រសួងយុត្តិធម៌ លោក ជិន ម៉ាលីន បានប្រាប់វីអូឌីថា ករណីនេះ លោក ឌួង ងៀប បានដាក់ពាក្យបណ្ដឹងជាផ្លូវការចូលទៅរដ្ឋបាលក្រសួងយុត្តិធម៌ហើយ តែថាក្រសួងមិនទាន់ផ្ដល់ចម្លើយយ៉ាងណានៅឡើយទេ៕