មន្ត្រីសង្គមស៊ីវិលជំរុញទៅរដ្ឋាភិបាលបង្ហាញរបាយការណ៍បង្ក្រាបជនសង្ស័យនិងចំនួនដីព្រៃលិចទឹកដែលរឹបអូសបានជាសាធារណៈឱ្យមានតម្លាភាព ខណៈរបាយការណ៍ដែលស្ថាប័នរដ្ឋបង្ហាញកន្លងមកមិនទាន់មានសុក្រឹតភាពនៅឡើយ។
ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង មានប្រសាសន៍នៅថ្ងៃចន្ទនេះថា កាលពីថ្ងៃទី២៧ ខែធ្នូ ឆ្នាំ២០២១ អង្គភាពប្រឆាំងអំពើពុករលួយបានបង្ហាញរបាយការណ៍ថា អតីតអភិបាលខេត្តកំពង់ឆ្នាំង លោក ឈួរ ចាន់ឌឿន ដែលបច្ចុប្បន្នជាអនុរដ្ឋលេខាធិការក្រសួងមហាផ្ទៃ បានទន្ទ្រានកាន់កាប់ដីព្រៃលិចទឹកក្នុងភូមិសាស្ត្រខេត្តនេះទំហំ២ ០០០ហិកតា ខណៈលោក ស៊ុំ សុជាតិ ស្នងការរងនគរបាលខេត្តកំពង់ឆ្នាំង បានកាន់កាប់និងទន្ទ្រានដីចំនួន៣៨ទីតាំង មានទំហំ៩៥ ២០២ហិកតា និងលក់ដូរបានប្រាក់ជាង៥១ម៉ឺនដុល្លារ ប៉ុន្តែស្នងការរងរូបនេះបានធ្វើលិខិតប្រគល់ដីជូនរដ្ឋវិញត្រឹមតែ៦៧៥ហិកតាប៉ុណ្ណោះ។
ករណីនេះ លោក ហេង គឹមហុង ជំរុញទៅរដ្ឋាភិបាល ជាពិសេសក្រសួងពាក់ព័ន្ធ ដូចជា ក្រសួងរៀបចំដែនដី នគរូបនីយកម្ម និងសំណង់, ក្រសួងកសិកម្ម រុក្ខាប្រមាញ់ និងនេសាទ រួមទាំងអង្គភាពប្រឆាំងអំពើពុករលួយ ត្រូវបង្ហាញរបាយការណ៍បង្ក្រាបជនសង្ស័យនិងចំនួនដីព្រៃលិចទឹកដែលរឹបអូសបានជាសាធារណៈឱ្យមានតម្លាភាព ទើបទប់ស្កាត់បទល្មើសទាំងនេះទទួលបានប្រសិទ្ធភាពខ្ពស់ ។
លោកមានប្រសាសន៍ថា៖ «ដើម្បីបង្ហាញពីតម្លាភាពនៃការងារ គណៈកម្មាធិការត្រូវបង្ហាញរបាយការណ៍ចុងក្រោយ ឬក៏របាយការណ៍អំពីការឃាត់ខ្លួនជនទាំងឡាយដែលមានការពាក់ព័ន្ធ មានការបំផ្លិចបំផ្លាញធនធានធម្មជាតិនេះ និងដីព្រៃលិចទឹកដែលមានសារៈប្រយោជន៍ជាសាធារណៈ។ ហើយទី២ គួរតែធ្វើការផ្សព្វផ្សាយថាខ្លួនកំពុងបន្តបេសកកម្មក្នុងការស្វែងរកកំណត់ជនសង្ស័យបន្តទៀត ឬក៏បានបិទបញ្ចប់ហើយ បើទោះបីជាជនសង្ស័យមួយចំនួនដែលចង្អុលបង្ហាញដោយលោកនាយករដ្ឋមន្ត្រី ហ៊ុន សែន ហាក់បីដូចជាមិនទាន់បានឃាត់ខ្លួន»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត សង្កេតឃើញថា កន្លងមក អាជ្ញាធរដែលចុះបង្ក្រាបបទល្មើសព្រៃលិចទឹក មិនទាន់បង្ហាញរបាយការណ៍ចាប់ជនសង្ស័យ ជនល្មើស និងទំហំដីព្រៃលិចទឹក ដែលបានដកហូតមកវិញ ឱ្យសាធារណជនបានដឹងនៅឡើយទេ។
លោកបន្តថា អាជ្ញាធរបានអនុវត្តតាមបទបញ្ជារបស់លោកនាយករដ្ឋមន្ត្រី ដោយធ្វើការចុះបង្ក្រាបលើមន្ត្រីក្នុងជួររដ្ឋាភិបាលដែលទន្ទ្រានដីព្រៃលិចទឹកបានតិចតួចតែប៉ុណ្ណោះ ដែលករណីនេះធ្វើនាំឱ្យមានវប្បធម៌និទណ្ឌភាពបន្តកើតឡើង។
លោកមានប្រសាសន៍ថា៖ «ឥលូវវាកំពុងតែនិទណ្ឌភាពហើយ អ៊ីចឹងបានខ្ញុំថា អ្នកមានអំណាច អ្នកដែលមានបុណ្យសក្តិខ្ពស់ អ្នកដែលមានខ្នងក្រាស់ ឬក្រុមហ៊ុនដែលមានខ្សែរយៈធ្វើធុរកិច្ច គប់គិតគ្នាជាប្រព័ន្ធ គឺថាអត់បានចាត់វិធានការឱ្យបានម៉ឺងម៉ាត់ទៅតាមច្បាប់ ដូចចាត់វិធានការទៅលើប្រជាពលរដ្ឋទេ។ អ៊ីចឹងបានថា នៅស្រុកខ្មែរ វាមានការអនុវត្តច្បាប់តែមួយ រដ្ឋតែមួយ តែអនុវត្តប្រព័ន្ធពីរផ្សេងគ្នា»។
ប្រធានសម្ព័ន្ធប្រជានេសាទកម្ពុជា លោក ឡុង សូចែត សាទរចំពោះវិធានការបង្ក្រាបនិងការទប់ស្កាត់ការទន្ទ្រានយកដីព្រៃលិចទឹកនៅពេលនេះ ពីព្រោះវាបានជួយកាត់បន្ថយបទល្មើសបានមួយចំនួនផងដែរ។
ប៉ុន្តែលោកក៏បង្ហាញការព្រួយបារម្ភពីប្រសិទ្ធភាពនិងតម្លាភាពផងដែរ ប្រសិនបើមន្ត្រីអនុវត្តច្បាប់មួយចំនួនគ្មានឆន្ទៈ ប្រកាន់បក្ខពួក ប្រព្រឹត្តអំពើពុករលួយ និងបង្ហាញរបាយការណ៍លាក់លៀមរដ្ឋាភិបាលនោះ ដែលករណីនេះអាចធ្វើឱ្យបញ្ហានៅតែបន្តកើតមាន។
លោកមានប្រសាសន៍ថា៖ «បើប្រកាន់បក្ខពួកហើយ វាចប់ហើយ! វាមុខតែមិនមានប្រសិទ្ធភាពទេ ពីព្រោះប្រជាពលរដ្ឋគាត់ចាំតែមើលគ្នាទេ ប្រជាពលរដ្ឋគាត់មើលតែគ្នាទេ ប្រសិនបើប្រជាពលរដ្ឋគាត់អាចចូលទន្ទ្រានបាន គេបន្តទៅទៀត វានៅមានបញ្ហាដែរ ព្រោះគាត់ត្រូវការដីធ្លី មិនមែនមានតែអ្នកមានឯណា បើគេទន្ទ្រានបាន អ្នកផ្សេងទៀតក៏គាត់មិននៅស្ងៀមដែរ»។
វីអូឌី មិនអាចសុំការអត្ថាធិប្បាយជុំវិញករណីនេះពីអ្នកនាំពាក្យក្រសួងរៀបចំដែនដី លោក សេង ឡូត និងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន និងអនុប្រធានអង្គភាពប្រឆាំងអំពើពុករលួយ លោក ឃាង សេង បានទេ នៅរសៀលថ្ងៃនេះ។
ទាក់ទិននឹងបញ្ហាព្រៃលិចទឹកនេះ ប្រធានរាជបណ្ឌិត្យសភាកម្ពុជា លោក សុខ ទូច ធ្លាប់លើកឡើងកាលពីថ្ងៃទី១៧ ខែធ្នូ ថាគ្រាន់តែក្នុងខេត្តកំពង់ធំមួយ ព្រៃលិចទឹកបានបាត់បង់ជាង១០ម៉ឺនហិកតា ប៉ុន្តែមន្ត្រីជំនាញបានធ្វើរបាយការណ៍ទៅរដ្ឋាភិបាលដោយដាក់តែជាង៣ ០០០ហិកតាប៉ុណ្ណោះ។ ករណីនេះ លោក សុខ ទូច បង្ហាញការមិនពេញចិត្ត និងទាមទារឱ្យគ្រប់ភាគីពាក់ព័ន្ធហ៊ានបង្ហាញការពិត ចៀសវាងក្មេងជំនាន់ក្រោយជេរស្ដីចំពោះការធ្វើឱ្យបាត់បង់ព្រៃលិចទឹកនិងមច្ឆជាតិ។
កាលពីថ្ងៃទី២៨ ខែវិច្ឆិកា ឆ្នាំ២០២១ លោកនាយករដ្ឋមន្ត្រី ហ៊ុន សែន បានបញ្ជាឱ្យបង្ក្រាបចំពោះការទន្ទ្រានកាន់កាប់ដីព្រៃលិចទឹកនៅជុំវិញបឹងទន្លេសាប បន្ទាប់ពីលោកទទួលបានរបាយការណ៍ពីលោក សុខ ទូច ជុំវិញការរំលោភកាន់កាប់ដីព្រៃលិចទឹករាប់ពាន់ហិកតាដោយខុសច្បាប់៕
