ធនាគារអភិវឌ្ឍន៍អាស៊ី (ADB) បានអនុម័តប្រាក់កម្ចីចំនួន៩៥លានដុល្លារ ដើម្បីជួយរដ្ឋាភិបាលកម្ពុជាក្នុងដំណើរការចាក់វ៉ាក់សាំងប្រឆាំងជំងឺកូវីដ-១៩ ជូនប្រជាពលរដ្ឋពីឆ្នាំ២០២២ ដល់ឆ្នាំ២០២៣។
យោងតាមសេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី នៅថ្ងៃទី១៥ ខែកុម្ភៈនេះ បានឱ្យដឹងថា កម្ចីនេះនឹងផ្ដោតលើសកម្មភាព រួមមាន ការចាក់វ៉ាក់សាំងជំរុញប្រចាំឆ្នាំសម្រាប់អ្នកដែលបានចាក់វ៉ាក់សាំងរួច និងការចាក់វ៉ាក់សាំងមូលដ្ឋានសម្រាប់កុមារអាយុក្រោម៥ឆ្នាំ ជាដើម។
សេចក្ដីប្រកាសព័ត៌មានបានស្រង់សម្ដីលោក Rikard Elfving អ្នកឯកទេសជាន់ខ្ពស់ផ្នែកសង្គមរបស់ ADB មានប្រសាសន៍ថា៖ «គម្រោងនេះនឹងជួយកម្ពុជាដើម្បីសង្គ្រោះជីវិត ដោយកាត់បន្ថយចំនួនករណីឆ្លងមេរោគធ្ងន់ធ្ងរ និងបង្កើនល្បឿននៃការស្ដារសេដ្ឋកិច្ចរបស់ប្រទេសពីជំងឺរាតត្បាតមួយនេះ។ ADB ក៏នឹងផ្ដល់ជំនួយបច្ចេកទេសចំនួន១លានដុល្លារផងដែរ ដើម្បីជួយកម្ពុជាបង្កើនប្រសិទ្ធភាពនៃប្រព័ន្ធដឹកជញ្ជូននិងផ្គត់ផ្គង់វ៉ាក់សំាង ព្រមទាំងកាត់បន្ថយបញ្ហាប្រឈមក្នុងការទទួលបានវ៉ាក់សំាងក្នុងចំណោមស្ត្រី កុមារី កុមារតូច និងក្រុមពលរដ្ឋដែលនៅឆ្ងាយ»។
ប្រភពដដែលបន្តថា ប្រទេសកម្ពុជាទទួលបានជោគជ័យយ៉ាងធំធេងក្នុងការគ្រប់គ្រងការរីករាលដាលនៃកូវីដ-១៩ ក្នុងឆ្នាំ២០២០។ ប៉ុន្តែការផ្ទុះរីករាលដាលនៃការឆ្លងនៅឆ្នាំ២០២១ បានបង្កជាសម្ពោធយ៉ាងធ្ងន់ធ្ងរដល់ប្រព័ន្ធថែទាំសុខភាព ហើយបណ្ដាលឱ្យមានការបិទសាលារៀន និងអាជីវកម្មជាច្រើនមួយរយៈពេលធំក្នុងឆ្នាំនោះ។
សេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី ADB បានឱ្យដឹងថា បន្ថែមពីលើប្រាក់កម្ចីដែលបានមកពីមូលនិធិ APVAX (Asia Pacific Vaccine Access Facility) ធនាគារអភិវឌ្ឍន៍អាស៊ីមួយនេះក៏នឹងជួយសម្របសម្រួលប្រាក់កម្ចីចំនួន៥0លានដុល្លារពីធនាគារវិនិយោគហេដ្ឋារចនាសម្ព័ន្ធអាស៊ី (Asian Infrastructure Investment Bank ឬហៅកាត់ថា AIIB) សម្រាប់កម្ពុជាផងដែរ។ ប្រាក់កម្ចីទាំងនេះជាថវិការួមសម្រាប់ការទិញវ៉ាក់សាំងរហូតដល់១៤លាន៥សែនដូស ព្រមទាំងជួយគាំទ្រដល់ការដឹកជញ្ជូនចាំបាច់នានា។
ប្រទេសកម្ពុជាបានផ្ដល់ការចាក់វ៉ាក់សាំងយ៉ាងពេញលេញដល់ប្រជាពលរដ្ឋប្រមាណ ៨០% នៃប្រជាពលរដ្ឋសរុបជាង១៦លាននាក់ ចាប់តាំងពីការចាប់ផ្ដើមយុទ្ធនាការចាក់វ៉ាក់សាំងថ្នាក់ជាតិ នៅថ្ងៃទី១0 ខែកុម្ភៈ ឆ្នាំ២០២១មក។
ជាមធ្យម ពលរដ្ឋកម្ពុជាច្រើនជាងម្នាក់ ក្នុងចំណោមពលរដ្ឋប្រាំនាក់ ឬជិត២២ភាគរយ (២១,៨%) បានទទួលការចាក់វ៉ាក់សាំងដូសជំរុញ។ ទោះបីជាយ៉ាងនេះក្ដី ប្រព័ន្ធសុខាភិបាលរបស់ប្រទេសនៅតែងាយរងគ្រោះចំពោះការកើនឡើងការឆ្លងថ្មីនៃមេរោគបំប្លែងខ្លួន ដូចជា Delta និង Omicron ជាដើម។
គម្រោងខាងលើ ជាការគាំទ្របន្ថែមទៅលើជំនួយទាក់ទងនឹងកូវីដ-១៩កន្លងទៅរបស់ ADB ដល់កម្ពុជា។ កាលពីថ្ងៃទី៨ ខែកក្កដា ឆ្នាំ២០២០ ADB បានផ្ដល់ប្រាក់កម្ចីចំនួន២៥០លានដុល្លារ ដើម្បីជួយរដ្ឋាភិបាលកម្ពុជាក្នុងការកាត់បន្ថយផលប៉ះពាល់ធ្ងន់ធ្ងរដល់សុខភាព សង្គម និងសេដ្ឋកិច្ចនៃជំងឺរាតត្បាតនេះ។ លើសពីនេះ ADB ក៏បានផ្ដល់ឧបករណ៍ការពារខ្លួនប្រមាណ១លាន៧សែនគ្រឿងដល់កម្ពុជាក្នុងឆ្នាំ២០២១ផងដែរ៕