មន្ត្រីជាន់ខ្ពស់របស់គណបក្សប្រជាជនកម្ពុជា អះអាងថា គោលនយោបាយឃុំ-សង្កាត់សម្រាប់ប្រកួតប្រជែងការបោះឆ្នោតនៅអាណត្តិទី៥ខាងមុខនេះ នៅតែផ្ដោតសំខាន់លើការបង្ក្រាបគ្រឿងញៀន។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា គោលនយោបាយឃុំ-សង្កាត់សម្រាប់ឆ្នាំ២០២២ដល់២០២៧ គណបក្សប្រជាជនកម្ពុជាបានរៀបចំរួចហើយ ដែលមានកម្រាស់ជាង២០ទំព័រ។ លោកបន្តថា គោលនយោបាយទាំងនោះបានផ្ដោតលើបញ្ហាជាច្រើនដែលពាក់ព័ន្ធការអភិវឌ្ឍនិងពង្រឹងសន្តិសុខសណ្ដាប់ធ្នាប់ ហើយចំណុចសំខាន់ជាងគេគឺការបង្រ្កាបគ្រឿងញៀន។
លោក សុខ ឥសាន ថ្លែងថា៖ «បញ្ហាគ្រឿងញៀនក៏ជាបញ្ហាក្ដៅដែលគណបក្សប្រជាជនបានយកចិត្តទុកដាក់ អាស្រ័យទៅដោយមានបញ្ហាស្មុគស្មាញកាន់តែច្រើន ឃើញថាវាមានឆ្លងកាត់ វាមានលួច ការលួចផលិតអី។ល។ អ៊ីចឹងទេ គឺថាគោលនយោបាយកម្ចាត់គ្រឿងញៀននេះ គឺជាគោលនយោបាយអាទិភាពជាងគេរបស់គណបក្សប្រជាជនកម្ពុជា»។
លោក សុខ ឥសាន បញ្ជាក់បន្ថែមទៀតថា បើទោះបីជាកន្លងមក អាជ្ញាធរប្រឹងប្រែងបង្ក្រាបគ្រឿងញៀនទ្រង់ទ្រាយធំបានជាបន្តបន្ទាប់ក៏ដោយ ក៏គណបក្សនេះនៅតែយកចិត្តទុកដាក់លើបញ្ហានេះដែរ។
លោកថា៖ «បទល្មើសធំៗ បើទោះបីជាយើងមានការបង្ក្រាបដូចគ្រឿងញៀនអ៊ីចឹង យើងចាប់បានរាប់រយគីឡូ រាប់តោនអ៊ីចឹងក៏ពិតមែន ក៏ប៉ុន្តែយើងអត់មានធ្វេសប្រហែសទេ យើងនៅតែប្រុងប្រយ័ត្ន ហើយនឹងបង្កើនវិធានសកម្មភាពបង្ក្រាបទប់ស្កាត់តទៅមុខទៀត»។
នាយកប្រតិបត្តិសមាគមសង្គ្រោះជនរងគ្រោះដោយសារគ្រឿងញៀនកម្ពុជា លោក មាស សុវណ្ណ មានប្រសាសន៍ថា ស្ថានភាពគ្រឿងញៀននៅតែមានភាពស្មុគស្មាញ និងមានការកើនឡើង។ លោកបន្តថា សមាគមរបស់លោកដែលទទួលបន្សាបគ្រឿងញៀនក៏កើនឡើងដែរ។
លោកថា៖ «មានការកើនឡើង ដោយសារតែមានការរឹតបន្តឹងក្នុងករណីកូវីដ ក៏ត្រួតពិនិត្យមើលទៅរកឃើញគ្រឿងញៀនដែរ។ នៅតាមមណ្ឌលក៏កើនឡើងដែរ នេះស្ថានភាពជាក់ស្ដែង កន្លែងខ្ញុំធ្លាប់តែ១៣០ ឥលូវឡើងដល់១៨០ជិត២០០ហើយ»។
លោក មាស សុវណ្ណ មើលឃើញថា ជាចំណុចល្អដែលសមត្ថកិច្ចពាក់ព័ន្ធប្រឹងប្រែងបង្ក្រាបបទល្មើសគ្រឿងញៀនធំៗបាន។
នាយកប្រតិបត្តិនៃមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព (PDP) លោក យង់ គិមអេង មើលឃើញថា ស្ថានភាពគ្រឿងញៀនកំពុងរាលដាលពេញផ្ទៃប្រទេស ហើយបានបង្កទុក្ខលំបាកច្រើនដល់ប្រជាពលរដ្ឋ។
លោកថា៖ «គ្រឿងញៀនបានធ្វើឱ្យយុវជនជាច្រើនបោះបង់ការសិក្សា ធ្វើឱ្យគ្រួសារជាច្រើនឈឺចាប់ ដោយសមាជិករបស់ខ្លួនប្រើប្រាស់គ្រឿងញៀន។ ឃាតកម្មជាច្រើនដែលកើតឡើងដោយសារតែការប្រើប្រាស់គ្រឿងញៀន ជួនកាលមានរហូតដល់កូនសម្លាប់ម្ដាយ បងសម្លាប់ប្អូន មានរហូតដល់ប្ដីសម្លាប់ប្រពន្ធ ធ្វើឱ្យមានបញ្ហាសង្គមកើតឡើងដោយឈឺចាប់»។
លោក យង់ គិមអេង បន្ថែមថា ការអនុវត្តទប់ស្កាត់បង្ក្រាបគ្រឿងញៀន មិនទាន់មានប្រសិទ្ធភាពទេ។
លោកថា៖ «ការអនុវត្តកន្លងមក មិនទាន់សមល្មមក្នុងការបង្ក្រាបគ្រឿងញៀនឱ្យបានតែទៅតាមគោលនយោបាយនៅឡើយទេ»។
រដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា បានបង្កើតគោលនយោបាយភូមិឃុំមានសុវត្ថិភាពចំនួន៩ចំណុច ក្នុងនោះ ចំណុចទី២ បានចែងពីការទប់ស្កាត់ការផលិត ការចរាចរ ការជួញដូរ ការចែកចាយ និងការប្រើប្រាស់គ្រឿងញៀនដោយខុសច្បាប់។
របាយការណ៍ក្រសួងមហាផ្ទៃ បង្ហាញថា ការបង្ក្រាបគ្រឿងញៀននៅឆ្នាំ២០២១ រឹបអូសបានគ្រឿងញៀនជាង៨០តោន និងម៉ាស៊ីនផលិតកែច្នៃគ្រឿងញៀនទំនើបៗជាច្រើនគ្រឿងទៀត។ ចំណែកនៅដើមខែកុម្ភៈ ឆ្នាំ២០២២នេះ ក្រសួងមហាផ្ទៃក៏បានបញ្ជាក់ថា មានការនាំចូលសារធាតុញៀនចំនួនជាង១០០តោន។
រដ្ឋមន្ត្រីក្រសួងមហាផ្ទៃ លោក ស ខេង ក៏បានបញ្ជាក់ដែរថា ឆ្នាំ២០២១ ក្នុងចំណោមអ្នកជាប់ពន្ធនាគារប្រមាណជិត៤ម៉ឺននាក់ គឺមាន៥១ភាគរយពាក់ព័ន្ធជាមួយគ្រឿងញៀន។ លោកក៏បានបញ្ជាក់ថា បញ្ហាគ្រឿងញៀនឈានដល់ចំណុចប្រកាសអាសន្ន ដែលត្រូវមានវិធានការទប់ស្កាត់បន្ទាន់ និងត្រូវមានការចូលរួមសហការគ្នាពីគ្រប់ភាគីទាំងអស់៕