មន្ត្រីជាន់ខ្ពស់សាលារាជធានីភ្នំពេញបានអះអាងថា អាជ្ញាធរអនុញ្ញាតឱ្យពលរដ្ឋរស់នៅលើទឹកក្នុងសង្កាត់ព្រែកព្នៅ អាចបន្តចិញ្ចឹមត្រីបានពី ២ទៅ ៣ឆ្នាំទៀតប៉ុណ្ណោះ មុននឹងត្រូវរុះរើចេញទៅរកមុខរបរផ្សេង ឬទៅរស់នៅកន្លែងផ្សេង។
ក្នុងសន្និសីទសារព័ត៌មាន ស្តីពីវឌ្ឍនភាពមូលដ្ឋានឃុំ-សង្កាត់ និងទិសដៅការងារបន្តរបស់រដ្ឋបាលរាជធានីភ្នំពេញនាថ្ងៃទី១ ខែមីនានេះ អភិបាលរងរាជធានីភ្នំពេញ លោក កើត ឆែ មានប្រសាសន៍ថា អាជ្ញាធរទុកពេល២ ទៅ៣ឆ្នាំឱ្យពលរដ្ឋរស់នៅតាមម្ដុំទន្លេសាបនាសង្កាត់ព្រែកព្នៅ ដែលប្រកបរបរចិញ្ចឹមត្រីបណ្ដែតទឹក មុននិងផ្លាស់ចេញពីទីតាំងនេះ។
លោកបន្តថា ការទុកពេលនេះ ដើម្បីឱ្យពួកគាត់មានឱកាសទៅប្រកបមុខរបរផ្សេង ឬកន្លែងរស់នៅផ្សេង ដោយថាប្រសិនបើបញ្ចប់មុខរបរចិញ្ចឹមត្រីលើទឹករបស់ពួកគេភ្លាមៗ ពលរដ្ឋទាំងនោះនឹងត្រូវជួបបញ្ហាប្រឈមក្នុងជីវភាពមិនខាន។
លោក កើត ឆែមានប្រសាសន៍ថា៖ «យើងប្រើប្រាស់វិធានការអប់រំច្រើនជាងវិធានការច្បាប់ ដែលយើងបានណែនាំឲ្យគាត់ដូរមុខរបររយៈពេល ៣ ឆ្នាំ ព្រោះបើយើងអោយគាត់ដូរមួយឆ្នាំ គាត់មិនអាចរកមុខរបរបានទេ ចឹងយើងទុកពេលអោយគាត់ ៣ឆ្នាំដើម្បីដូរមុខរបរ»។
កាលពីថ្ងៃទី២ ខែមិថុនា ឆ្នាំ២០២១ រដ្ឋបាលរាជធានីភ្នំពេញ បានចេញសេចក្តីជូនដំណឹងមួយដោយថា ការរស់នៅនិងប្រកបមុខរបរលើផ្ទៃទឹកទន្លេ ធ្វើឱ្យផលប៉ះពាល់ដល់ប្រព័ន្ធអេកូឡូស៊ី មានចរន្តទឹកហូរ គោករាក់ ពិសេសការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ពាសវាលពាសកាលក្នុងទន្លេ ធ្វើឱ្យខូចខាតធ្ងន់ធ្ងរដល់ជីវចម្រុះក្នុងទឹក ខូចគុណភាពទឹក បំពុលបរិស្ថាន ប៉ះពាល់សោភ័ណភាពរាជធានីភ្នំពេញ ព្រមទាំងប៉ះពាល់សុខភាពប្រជាពលរដ្ឋដែលប្រើប្រាស់ទឹកផងដែរ។
សេចក្តីជូនដំណឹងដដែល ក៏បានប្រាប់ទៅប្រជាពលរដ្ឋដែលរស់លើផ្ទះបណ្តែតទឹកតូចធំ បែចិញ្ចឹមត្រី និងសំណង់មិនរៀបរយតាមដងទន្លេក្នុងរាជធានីភ្នំពេញ ត្រូវរុះរើចេញពីយ៉ាងយូរ១សប្តាហ៍តែប៉ុណ្ណោះ។ បើពុំដូច្នេះទេ អាជ្ញាធរនឹងចាត់វិធានការរដ្ឋបាល ឬវិធានការច្បាប់។
លោក កើត ឆែ បញ្ជាក់ថា បច្ចុប្បន្នផ្ទះបណ្ដែតទឹកទាំងនោះនៅមានប្រមាណ២០០បែ ឬខ្នង ដែលបានសេសសល់ ពីការរើរុះកាលពីខែមិថុនា ឆ្នាំមុន ដែលមានជាង៨០០ខ្នង ដោយអាជ្ញាធរថាទីតាំង និងសំណង់មិនរៀបរយទាំងនោះស្ថិតក្នុងខណ្ឌចំនួន៦ តាមដងទន្លេចតុមុខ រាជធានីភ្នំពេញ។
ប្រធានសម្ព័ន្ធប្រជានេសាទកម្ពុជា លោក ឡុង សូចែត បានលើកឡើងអំពីផលប៉ះពាល់ពីការរស់នៅខុសច្បាប់ និងប្រកបរបរលើផ្ទៃទឹក ពិសេសប៉ះពាល់ដល់បរិស្ថានតែម្តង។
លោកបានថ្លែងថា៖ «វាប៉ះពាល់របៀបប្រយោលដល់អ្នករស់នៅបណ្ដែតទឹកស្របច្បាប់ផ្សេងទៀត ប៉ុន្ដែអ្វីដែលប៉ះពាល់ធ្ងន់ធ្ងរនោះគឺបរិស្ថានកន្លែងគាត់រស់នៅហ្នឹង ដូចយើងដឹងហើយថាការរស់នៅលើទឹកមិនដូចនៅលើគោកទេ គឺមានភាពរញ៉េរញ៉ៃ»។
កាលពីពាក់កណ្តាលខែមិថុនា ឆ្នាំ២០២១ អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក កែវ វណ្ណថន មានប្រសាសន៍ប្រាប់វីអូឌីថា សមត្ថកិច្ចជំនាញបានសហការជាមួយអាជ្ញាធរមូលដ្ឋាន ដើម្បីស្រាវជ្រាវករណីជនអន្តោប្រវេសន៍ ជាពិសេសជនជាតិវៀតណាមដែលកំពុងរស់នៅលើផ្ទះបណ្តែតទឹក និងសំណង់មិនរៀបរយតាមដងទន្លេក្នុងរាជធានីភ្នំពេញដោយខុសច្បាប់។
លោកអះអាងថា បើរកឃើញជនអន្តោប្រវេសន៍រស់នៅមិនស្របច្បាប់ ក្រុមការងារជំនាញនឹងអនុវត្តតាមច្បាប់អន្តោប្រវេសន៍ ដោយបណ្តេញពួកគេចេញទៅប្រទេសកំណើតវិញ ប៉ុន្តែដល់ពេលបច្ចុប្បន្នមន្ត្រីជំនាញក៏នៅមិនទាន់បានបង្ហាញលទ្ធផលជាក់លាក់នៅឡើយ។
ទោះបីជាយ៉ាងនេះក្តី កាលពីខែវិច្ឆិកា ឆ្នាំមុន អ្នកជំនាញសិទ្ធិមនុស្សរបស់អង្គការសហប្រជាជាតិUN ចំនួន៥រូប បានបង្ហាញក្តីកង្វល់ចំពោះបញ្ហាសិទ្ធិមនុស្ស ខណៈអាជ្ញាធររាជធានីភ្នំពេញ និងអាជ្ញាធរខេត្តកណ្តាលបញ្ជាឱ្យពលរដ្ឋខ្មែរ ចាម និងវៀតណាមរាប់រយគ្រួសាររុះរើផ្ទះបណ្តែតទឹកនៅតាមដងទន្លេ ដោយគ្មានការផ្តល់សំណងសមរម្យ៕