ប្រធានាធិបតីសហរដ្ឋអាមេរិក លោក ចូ បៃឌិន នៅថ្ងៃអង្គារម្សិលមិញ បានលើកឡើងថា ប្រធានាធិបតីរុស្ស៊ី លោក វ្លាឌីមៀរ ពូទីន នឹងទទួលរងនូវផលប៉ះពាល់ធ្ងន់ធ្ងរសម្រាប់ការដែលលោកឈ្លានពានអ៊ុយក្រែន បើទោះបីជាយុទ្ធនាការយោធារបស់ខ្លួននៅពេលនេះហាក់ទទួលបានជោគជ័យក្នុងរយៈពេលខ្លីក៏ដោយ។
ទីភ្នាក់ងារសារព័ត៌មាន Reuters បានស្រង់សសម្ដីប្រធានាធិបតីអាមេរិក ដែលបានថ្លែងឱ្យដឹងនៅក្នុងសុន្ទរកថាស្ដីពីស្ថានភាពសហព័ន្ធ (State of the Union) ថា៖ «បើទោះបីជាគាត់ [លោក ពូទីន] ហាក់មានប្រៀបនៅលើសមរភូមិប្រយុទ្ធក៏ដោយ ប៉ុន្តែគាត់នឹងត្រូវទទួលរងនូវផលប៉ះពាល់ធ្ងន់ធ្ងរក្នុងរយៈពេលវែងនាពេលខាងមុខ»។
ការថ្លែងរបស់លោក ចូ បៃដិន បានធ្វើឡើង ខណៈការលុកលុយរបស់រុស្ស៊ីមកលើប្រទេសជិតខាងរបស់ខ្លួនគឺអ៊ុយក្រែន បានឈានចូលដល់ថ្ងៃទី៦ហើយ និងស្របពេលដែលការវាយលុកកាន់តែចូលកៀកមកដល់រដ្ឋធានីកៀវ (Kyiv) ផងដែរ។
ថ្លែងក្នុងសុន្ទរកថាដ៏សំខាន់នេះ លោក ចូ បៃឌិន ក៏បានប្រកាសពីជំហានថ្មីមួយទៀតក្នុងការហាមឃាត់ជើងហោះហើររុស្ស៊ីពីការប្រើប្រាស់ដែនអាកាសអាមេរិក និងគោលបំណងក្នុងការកម្រិតសកម្មភាពយោធារបស់រុស្ស៊ីនាពេលអនាគតផងដែរ។
លោកបន្ថែមថា៖ «បច្ចុប្បន្ន យើងកំពុងតែរារាំងការចូលប្រើប្រាស់បច្ចេកវិទ្យារបស់រុស្ស៊ី ដែលនឹងកាត់បន្ថយកម្លាំងសេដ្ឋកិច្ច និងធ្វើឱ្យកម្លាំងយោធារបស់ពួកគេចុះខ្សោយនាពេលអនាគត»។
គួរបញ្ជាក់ថា រុស្ស៊ីបានបើកការឈ្លានពានក្នុងទ្រង់ទ្រាយធំរបស់ខ្លួនមកលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃព្រហស្បតិ៍សប្ដាហ៍មុន ពោលគឺបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន។
ទោះជាយ៉ាងណា គិតចាប់តាំងពីទាហានរុស្ស៊ីបានចូលមកកាន់ប្រទេសអ៊ុយក្រែន អស់រយៈពេលជិតមួយសប្ដាហ៍មកនេះ ពួកគេនៅមិនទាន់ដណ្ដើមបានទីក្រុងសំខាន់ៗណាមួយរបស់អ៊ុយក្រែនយកមកគ្រប់គ្រងទាំងស្រុងនោះទេ៕