រាជរដ្ឋាភិបាលជប៉ុនបានសម្រេចផ្តល់ថវិកាជិត ១លានដុល្លារសហរដ្ឋអាមេរិក សម្រាប់អនុវត្តគម្រោងស្តីពីការលើកកម្ពស់ការយល់ដឹងអំពីបញ្ហាបរិស្ថាន និងការលុបបំបាត់អំពើហិង្សាលើកុមារនៅក្នុងសាលារៀន។
ទំព័រហ្វេសប៊ុករបស់ស្ថានទូតជប៉ុនប្រចាំកម្ពុជាកាលពីថ្ងៃសុក្រ បានឱ្យដឹងថា រដ្ឋាភិបាលជប៉ុន បានឯកភាពផ្តល់ថវិកាសរុបចំនួន ៨១៧ ៧៥៦ដុល្លារអាមេរិក ដល់អង្គភាពទទួលជំនួយចំនួនពីរ ក្រោមគ្រោងការណ៍ជំនួយហិរញ្ញប្បទានឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន។
ជប៉ុនបញ្ជាក់ថា ក្នុងនោះ ថវិកាចំនួន ១២០ ៤៦១ដុល្លារអាមេរិក ត្រូវបានផ្តល់ទៅអង្គការមិនរកប្រាក់ចំណេញ Nature Center Risen ដើម្បីអនុវត្ត «គម្រោងការសម្រេចឱ្យបាននូវបរិស្ថានរស់នៅប្រកបដោយចីរភាពរបស់ប្រជាពលរដ្ឋកម្ពុជាតាមរយៈការលើកកម្ពស់ និងអប់រំការយល់ដឹងអំពីបញ្ហាបរិស្ថាន (ឆ្នាំទី២)» ហើយថវិកាចំនួន ៦៩៧ ២៩៥ ដុល្លារអាមេរិកទៀត ត្រូវបានផ្តល់ទៅអង្គការ Save the Children Japan (SCJ) ដើម្បីអនុវត្ត «គម្រោងលុបបំបាត់អំពើហិង្សាលើកុមារនៅតាមសាលារៀនក្នុងខេត្តកំពង់ចាម ប្រទេសកម្ពុជា (ឆ្នាំទី ១)»។
ប្រភពដដែលបានស្រង់ប្រសាសន៍របស់ឯកអគ្គរាជទូតជប៉ុនប្រចាំកម្ពុជា លោក មិកាមិ ម៉ាសាហ៊ីរ៉ូ ដោយបានថ្លែងអំណរគុណចំពោះអង្គការទាំងពីរ ដែលបានចូលរួមក្នុងគំនិតផ្តួចផ្តើមរបស់រដ្ឋាភិបាលជប៉ុន។
ស្ថានទូតជប៉ុនបន្ថែមថា គម្រោងជំនួយអភិវឌ្ឍន៍ផ្លូវការខ្នាតធំ ដូចជាគម្រោងកំពង់ផែក្រុងព្រះសីហនុ គម្រោងផ្លូវជាតិលេខ៥ និងកម្ចីហិរញ្ញប្បទានចំនួន ២០ពាន់លានយេនសម្រាប់ការប្រយុទ្ធប្រឆាំងនឹងជំងឺកូវីដ-១៩ ជារឿយៗ ត្រូវបានផ្តោតសំខាន់នៅលើប្រព័ន្ធផ្សព្វផ្សាយ ហើយវានៅតែជាអាទិភាពមួយសម្រាប់រដ្ឋាភិបាលជប៉ុន ក្នុងការធ្វើការជាមួយអាជ្ញាធរមូលដ្ឋាន និងអង្គការក្រៅរដ្ឋាភិបាលជប៉ុន ដើម្បីចូលរួមចំណែកក្នុងការកែលម្អគុណភាពជីវិតនៅក្នុងបណ្តាខេត្តនានា។ ជាមួយគ្នានេះ ជប៉ុនជឿជាក់ថា ជំនួយឥតសំណងទាំងនេះ នឹងជួយពង្រឹងគុណភាពជីវិតរបស់ប្រជាជនដែលរស់នៅក្នុងទីតាំងគម្រោងនីមួយៗផងដែរ៕
