នាយករដ្ឋមន្ត្រីជប៉ុននឹងដឹកនាំគណៈប្រតិភូជាន់ខ្ពស់របស់ខ្លួនមកបំពេញទស្សនកិច្ចផ្លូវការនៅកម្ពុជានៅចុងសប្ដាហ៍នេះ តបតាមការអញ្ជើញរបស់នាយករដ្ឋមន្រ្តីកម្ពុជា។
សេចក្ដីប្រកាសព័ត៌មានរបស់ក្រសួងការបរទេសកម្ពុជា នៅថ្ងៃព្រហស្បតិ៍នេះ ឱ្យដឹងថា នាយករដ្ឋមន្ត្រីជប៉ុន លោក គីស៊ីដា ហ្វូមីអូ (Kishida Fumio) នឹងមកបំពេញទស្សនកិច្ចនៅកម្ពុជា នាថ្ងៃទី២០-២១ ខែមីនា ឆ្នាំ២០២២។
ក្រសួងបញ្ជាក់ថា ដំណើរទស្សនកិច្ចនេះ លោកនាយករដ្ឋមន្ត្រី ហ៊ុន សែន និងនាយករដ្ឋមន្រ្តីជប៉ុន លោក គីស៊ីដា ហ្វូមីអូ នឹងមានជំនួបទ្វេភាគី ដើម្បីពិភាក្សាអំពីការពង្រឹងទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ រួមមាន ក្នុងវិស័យពាណិជ្ជកម្ម និងការវិនិយោគ អប់រំ ហេដ្ឋារចនាសម្ព័ន្ធ ការពារជាតិនិងសន្តិសុខ ព្រមទាំងស្ដារសង្គម-សេដ្ឋកិច្ចឡើងវិញក្រោយវិបត្តិជំងឺកូវីដ-១៩ រួមនឹងវិស័យផ្សេងទៀត។
ប្រភពដដែលបន្ថែមថា៖ «នាយករដ្ឋមន្រ្តីទាំងពីរក៏នឹងផ្លាស់ប្ដូរទស្សនៈគ្នាស្ដីពីបញ្ហាតំបន់និងអន្តរជាតិនានាដែលជាផលប្រយោជន៍ និងក្ដីបារម្ភរួមផងដែរ។ នៅចុងបញ្ចប់នៃជំនួប នាយករដ្ឋមន្រ្តីទាំងពីរនឹងអញ្ជើញធ្វើសន្និសីទកាសែតរួមគ្នា។ សេចក្ដីថ្លែងការណ៍រួមរវាងកម្ពុជានិងជប៉ុន នឹងត្រូវចេញផ្សាយបន្ទាប់ពីកិច្ចប្រជុំ»។
សេចក្ដីប្រកាសព័ត៌មានរបស់ក្រសួងការបរទេសបញ្ជាក់ថា ក្នុងអំឡុងពេលទស្សនកិច្ច នាយករដ្ឋមន្រ្តីជប៉ុននឹងអញ្ជើញដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យ និងនៅមណ្ឌបព្រះករុណា ព្រះបាទ សម្ដេចព្រះបាទ នរោត្ដម សីហនុ «ព្រះបរមរតនកោដ្ឋ» អតីតព្រះមហាក្សត្រនៃព្រះរាជាណាចក្រកម្ពុជា។
ជាមួយគ្នានេះ លោក គីស៊ីដា ហ្វូមីអូ ក៏នឹងអញ្ជើញទៅគោរពវិញ្ញាណក្ខន្ធនៅមណ្ឌលរបស់អតីតមន្ត្រីជប៉ុនចំនួន២រូបដែលបានពលីជីវិតនៅក្នុងបេសកកម្មការងាររបស់អង្គការសហប្រជាជាតិនៅកម្ពុជា។
លោក គីស៊ីដា ត្រូវបានគណបក្សប្រជាធិបតេយ្យសេរី បោះឆ្នោតឱ្យធ្វើជាប្រធានបក្ស កាលពីខែកញ្ញា ឆ្នាំមុន ហើយលោកក៏បានក្លាយជានាយករដ្ឋមន្រ្តីថ្មីនៃការបោះឆ្នោតនៅក្នុងសភាកាលពីថ្ងៃទី៤ ខែតុលា ឆ្នាំដដែល។
ក្រសួងការបរទេសកម្ពុជា បានចាត់ទុកថា ដំណើរទស្សនកិច្ចផ្លូវការរបស់លោក គីស៊ីដា ហ្វូមីអូ នៅកម្ពុជា បង្ហាញកាន់តែច្បាស់ពីការប្ដេជ្ញាចិត្តយ៉ាងមោះមុតក្នុងការលើកកម្ពស់និងពង្រឹងនូវទំនាក់ទំនងល្អដែលមានស្រាប់ និងភាពជាដៃគូយុទ្ធសាស្រ្ត ព្រមទាំងកិច្ចសហប្រតិបត្តិការរវាងប្រទេសទាំងពីរផងដែរ៕