ទីប្រឹក្សាសន្តិសុខជាតិរបស់សេតវិមាន លោក Jake Sullivan បានឱ្យដឹងនៅថ្ងៃអង្គារម្សិលមិញថា ប្រធានាធិបតីសហរដ្ឋអាមេរិក លោក ចូ បៃឌិន និងសមភាគីអឺរ៉ុប នឹងប្រកាសពីការដាក់ទណ្ឌកម្មថ្មីបន្ថែមទៀតលើប្រទេសរុស្ស៊ី និងវិធានការថ្មីទាំងឡាយក្នុងការរឹតបន្តឹងទណ្ឌកម្មដែលមានស្រាប់ ក្នុងអំឡុងដំណើររបស់លោកទៅកាន់ទីក្រុង ព្រុចសែល (Brussels) ក្នុងសប្ដាហ៍នេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ប្រភពដដែលបន្តថា ប្រធានាធិបតីរូបនេះក៏នឹងធ្វើការពិភាក្សាអំពីការកែទម្រង់រយៈពេលវែងចំពោះជំហរនិងផែនការត្រៀមរបស់កងកម្លាំងអង្គការណាតូ (NATO) ក្នុងករណីដែលអាវុធនុយក្លេអ៊ែរត្រូវបានប្រើប្រាស់ ខណៈរូបលោកក៏នឹងប្រកាសពីសកម្មភាពរួមគ្នាលើការពង្រឹងសន្តិសុខថាមពលនៅអឺរ៉ុប ដែលពឹងផ្អែកខ្លាំងលើឧស្ម័នរបស់រុស្ស៊ីផងដែរ។
យោងតាមលោក Jake Sullivan បានឱ្យដឹងថា លោកប្រធានាធិបតី ចូ បៃឌិន នឹងចាកចេញទៅកាន់ទីក្រុង ព្រុចសែល នៅថ្ងៃពុធនេះ ដើម្បីចូលរួមក្នុងកិច្ចប្រជុំជាមួយមេដឹកនាំនៃបណ្ដាប្រទេសដទៃទៀតនៅថ្ងៃព្រហស្បតិ៍ស្អែកនេះ។
ជាមួយគ្នានេះ លោក ចូ បៃឌិន ក៏នឹងចូលរួមកិច្ចប្រជុំកំពូលបន្ទាន់មួយរបស់អង្គការណាតូ ជួបជាមួយមេដឹកនាំនៃក្រុមប្រទេស G7 និងមេដឹកនាំនៃសហភាពអឺរ៉ុបទាំងឡាយ នៅក្នុងកិច្ចប្រជុំនៃក្រុមប្រឹក្សាអឺរ៉ុប (European Council) ផងដែរ។
ទាក់ទិននឹងករណីនេះ លោក Jake Sullivan បានបន្ថែមថា៖ «គាត់ [លោក ចូ បៃឌិន] នឹងមានឱកាសសម្របសម្រួលទាក់ទងនឹងដំណាក់កាលបន្ទាប់នៃជំនួយយោធាដល់អ៊ុយក្រែន។ គាត់នឹងចូលរួមជាមួយដៃគូរបស់យើងនានា ក្នុងការដាក់ទណ្ឌកម្មបន្ថែមទៀតលើរុស្ស៊ី និងរឹតបន្តឹងទណ្ឌកម្មដែលមានស្រាប់ ដើម្បីធានាឱ្យមានការអនុវត្តដ៏រឹងមាំលើករណីនេះ»។
គួរបញ្ជាក់ថា សហរដ្ឋអាមេរិក និងសម្ព័ន្ធមិត្តរបស់ខ្លួនបានដាក់ទណ្ឌកម្មយ៉ាងធ្ងន់ធ្ងរមួយចំនួនលើរុស្ស៊ីរួចមកហើយ ចំពោះការឈ្លានពានអ៊ុយក្រែន ខណៈដែលខ្លួនក៏បានផ្គត់ផ្គង់អាវុធ និងជំនួយក្នុងទំហំទឹកប្រាក់រាប់ពាន់លានដុល្លារ សម្រាប់ជួយគាំទ្រដល់វិស័យការពារជាតិអ៊ុយក្រែនផងដែរ៕