ប្រមុខរដ្ឋាភិបាលកម្ពុជា លោក ហ៊ុន សែន បានគូសបញ្ជាក់ជំហរជាថ្មីថា កម្ពុជាប្រកាន់យកជំហរបោះឆ្នោតប្រឆាំងការឈ្លានពានរបស់ប្រទេសរុស្ស៊ីទៅលើអ៊ុយក្រែន នៅគ្រប់វេទិកាទាំងអស់។
ការថ្លែងរបស់លោកនាយករដ្ឋមន្ត្រីនេះ បន្ទាប់ពីលោកបានអះអាងថា មានប្រទេសមួយចំនួនបានបបួលកម្ពុជាឱ្យងាកចេញពីជំហរមួយនេះ។ ក៏ប៉ុន្តែលោកនាយករដ្ឋមន្ត្រី ហ៊ុន សែន បានបញ្ជាក់ថា កម្ពុជាបានប្រកាន់យកគោលការណ៍ជាក់លាក់លើបញ្ហារុស្ស៊ី និងអ៊ុយក្រែននេះច្បាស់លាស់ហើយ។
លោកថា៖ «អត់ទេ! យកជំហរហ្នឹងឱ្យច្បាស់! អត់មានញ៉ិញញ៉ុញទេ ព្រោះយើងបានបញ្ជាក់ជំហររបស់យើងច្បាស់ហើយ បន្ទាត់នយោបាយការបរទេសយើងយ៉ាងម៉េច! យើងអត់មាននៅអនុប្បវាទទេ ហើយយើងមិនគាំទ្រការឈ្លានពានណាមួយពីប្រទេសមួយទៅកាន់ប្រទេសមួយទេ អត់ទេ! អាហ្នឹងជាគោលជំហរដាច់ណាត់របស់យើង»។
ការប្រកាសរបស់លោកនាយករដ្ឋមន្ត្រី ហ៊ុន សែន បានធ្វើឡើងនៅថ្ងៃទី២៣ ខែមីនា ឆ្នាំ២០២២នេះ ក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ២១ តភ្ជាប់ពីរង្វង់មូលក្រុងតាខ្មៅ ខេត្តកណ្ដាល ទៅកាន់ច្រកទ្វារអន្តរជាតិកម្ពុជា-វៀតណាម (ជ្រៃធំ-ឡុងប៊ិញ)។
កម្ពុជា កាលពីថ្ងៃទី២ ខែមីនា បានបោះឆ្នោតនៅឯកិច្ចប្រជុំមហាសន្និបាតអង្គការសហប្រជាជាតិ ប្រឆាំងការឈ្លានពានរបស់រុស្ស៊ីលើប្រទេសអ៊ុយក្រែន។
សេចក្ដីថ្លែងការណ៍របស់ក្រសួងការបរទេសកម្ពុជា នៅថ្ងៃទី៣ ខែមីនា បានគូសបញ្ជាក់ថា កម្ពុជាមិនត្រឹមតែជាប្រទេសដែលបោះឆ្នោតគាំទ្រថ្កោលទោសនេះទេ កម្ពុជាក៏បានសម្រេចចិត្តចូលរួមជាមួយប្រទេសសហស្ថាបនិកនៃសេចក្ដីសម្រេចចិត្ត នៃកិច្ចប្រជុំពិសេសបន្ទាន់របស់មហាសន្និបាតអង្គការសហប្រជាជាតិ ស្ដីពីស្ថានការណ៍នៅក្នុងប្រទេសអ៊ុយក្រែននេះថែមទៀត៕