នាយករដ្ឋមន្ត្រីអង់គ្លេស លោក បូរីស ចនសុន (Boris Johnson) បានថ្លែងឱ្យដឹងនៅថ្ងៃព្រហស្បតិ៍នេះថា អង់គ្លេស និងសម្ព័ន្ធមិត្តលោកខាងលិច នឹងបង្កើនសម្ពាធសេដ្ឋកិច្ចបន្ថែមទៀតលើប្រទេសរុស្ស៊ី ដោយពិនិត្យមើលពីអ្វីដែលអាចធ្វើទៅបាន ដើម្បីរារាំងលោកប្រធានាធិបតី វ្លាឌីមៀរ ពូទីន ពីការចូលទៅប្រើប្រាស់មាសបម្រុងទុករបស់ខ្លួន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទណ្ឌកម្មដែលដាក់ដោយប្រទេសលោកខាងលិច បានបង្កកទ្រព្យសម្បត្តិក្នុងទំហំទឹកប្រាក់ចំនួន៦៤០ពាន់លានដុល្លាររបស់ធនាគារកណ្ដាលរបស់រុស្ស៊ីរួចទៅហើយ ដែលក្នុងនោះក៏បានរារាំងធនាគារមួយចំនួនពីប្រព័ន្ធទូទាត់សកល SWIFT និងបានធ្វើឱ្យមានការធ្លាក់តម្លៃនៃរូបិយបណ្ណរូប៊ល (Ruble) ផងដែរ។
មុនពេលកិច្ចប្រជុំមួយរបស់អង្គការណាតូ (NATO) ដែលធ្វើឡើងក្នុងទីក្រុងព្រុចសែល (Brussels) លោក បូរីស ចនសុន បានថ្លែងប្រាប់វិទ្យុ LBC ថាលោក ពូទីន បានដើរហួសបន្ទាត់ក្រហមហើយ ខណៈដែលរូបលោកគួរតែបង្ហាញខ្លួននៅចំពោះមុខតុលាការព្រហ្មទណ្ឌអន្តរជាតិ (ICC)។
នាយករដ្ឋមន្ត្រីរូបនេះបន្តថា៖ «យើងត្រូវតែធ្វើអ្វីបន្ថែមទៀត យើងត្រូវតែធ្វើអ្វីដែលជាការដាក់សម្ពាធសេដ្ឋកិច្ចបន្ថែមទៀត [លើរុស្ស៊ី]។ តើយើងអាចធ្វើអ្វីដើម្បីបញ្ឈប់គាត់ [លោក ពូទីន] ពីការប្រើប្រាស់មាសបម្រុងទុក បន្ថែមពីលើទុនបម្រុងជាសាច់ប្រាក់របស់គាត់ដែរឬទេ?»
លោកបន្ថែមថា៖ «ការដាក់សម្ពាធកាន់តែច្រើននាពេលបច្ចុប្បន្ននេះ ជាពិសេសលើវត្ថុ ដូចជាមាសជាដើមនោះ ខ្ញុំជឿថាយើងអាចកាត់បន្ថយឥទ្ធិពលនៃសង្រ្គាមបានកាន់តែច្រើន»។
ជាមួយគ្នានេះ លោក បូរីស ចនសុន ក៏បានឱ្យដឹងផងដែរថា ការលើកឡើងរបស់ប្រធានាធិបតីអាមេរិក លោក ចូ បៃឌិន ដែលថារុស្ស៊ីប្រព្រឹត្តឧក្រិដ្ឋកម្មសង្គ្រាម គឺជារឿងត្រឹមត្រូវ។
លោកថា៖ «វាគឺជាការត្រឹមត្រូវ ដែលរុស្ស៊ីគួរតែត្រូវបានកោះហៅដោយតុលាការយុត្តិធម៌អន្តរជាតិ (ICJ) ហើយលោកប្រធានាធិបតី ពូទីន គួរតែបង្ហាញខ្លួននៅចំពោះមុខតុលាការព្រហ្មទណ្ឌអន្តរជាតិ»។
គួរបញ្ជាក់ថា ចក្រភពអង់គ្លេសបានខិតខំធ្វើសកម្មភាពជាច្រើនក្នុងការឆ្លើយតបជាអន្តរជាតិចំពោះការលុកលុយរបស់រុស្ស៊ីលើអ៊ុយក្រែន រួមមាន ការផ្ដល់ជំនួយផ្នែកយោធា ការជំរុញឱ្យមានការដាក់ទណ្ឌកម្មធ្ងន់ធ្ងរបន្ថែមទៀតលើរុស្ស៊ី និងផ្ដល់ការគាំទ្រផ្នែកហិរញ្ញវត្ថុផងដែរ៕
