ប្រធានាធិបតីអាមេរិក លោក ចូ បៃឌិន លើកឡើងថា រុស្ស៊ីគួរតែត្រូវដកចេញពីក្រុមប្រទេសមានសេដ្ឋកិច្ចជឿនលឿនទាំង២០ (G20) ខណៈដែលប្រធានបទនេះត្រូវបានលើកឡើងក្នុងអំឡុងពេលកិច្ចប្រជុំរបស់លោកជាមួយមេដឹកនាំពិភពលោកនានា ដែលធ្វើឡើងក្នុងទីក្រុង ព្រុចសែល (Brussels) កាលពីថ្ងៃព្រហស្បតិ៍។ នេះបើយោងតាមការចុះផ្សាយដោយទីភ្នាក់ងារសារព័ត៌មាន Reuters។
ទាក់ទិននឹងសំណួរថាតើរុស្ស៊ីគួរតែដកចេញពីក្រុមនេះឬយ៉ាងណានោះ ប្រធានាធិបតីរូបនេះបានបញ្ជាក់យ៉ាងច្បាស់ថា៖ «ចម្លើយរបស់ខ្ញុំ គឺយល់ស្រប និងអាស្រ័យទៅលើសមាជិកក្រុមប្រទេស G20»។
ជាមួយគ្នានេះ លោក ចូ បៃឌីន បន្ថែមថា ប្រសិនបើប្រទេសមួយចំនួន ដូចជា ឥណ្ឌូនេស៊ី និងប្រទេសដទៃទៀត មិនយល់ស្របក្នុងការដករុស្ស៊ីចេញនោះ លោកថា អ៊ុយក្រែនក៏គួរតែត្រូវបានអនុញ្ញាតឱ្យចូលរួមក្នុងកិច្ចប្រជុំ [ក្រុមប្រទេស G20] ផងដែរ។
គួរបញ្ជាក់ថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃទី២៤ ខែកុម្ភៈ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន។
ទាក់ទិននឹងករណីនេះ សហរដ្ឋអាមេរិក និងសម្ព័ន្ធមិត្តរបស់ខ្លួន ក៏បានដាក់ទណ្ឌកម្មយ៉ាងធ្ងន់ធ្ងរមួយចំនួនលើរុស្ស៊ីផងដែរ ចំពោះការឈ្លានពានអ៊ុយក្រែន ខណៈខ្លួនក៏បានផ្គត់ផ្គង់អាវុធ និងជំនួយក្នុងទំហំទឹកប្រាក់រាប់ពាន់លានដុល្លារ សម្រាប់ជួយគាំទ្រដល់វិស័យការពារជាតិអ៊ុយក្រែនផងដែរ៕