ប្រធានាធិបតីអាមេរិក លោក ចូ បៃឌិន បានឱ្យដឹងនៅថ្ងៃព្រហស្បតិ៍ម្សិលមិញថា ក្នុងករណីដែលប្រទេសរុស្ស៊ីប្រើប្រាស់អាវុធគីមីក្នុងការឈ្លានពានអ៊ុយក្រែននោះ សហរដ្ឋអាមេរិកនឹងចាត់វិធានការដើម្បីឆ្លើយតប។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់ប្រធានាធិបតីរូបនេះ ដែលបានថ្លែងក្នុងសន្និសីទសារព័ត៌មានមួយធ្វើឡើងនៅទីក្រុងព្រុចសែល (Brussels) ថា៖ «យើងនឹងចាត់វិធានការឆ្លើយតប ប្រសិនបើគាត់ [លោក វ្លាឌីមៀរ ពូទីន] ប្រើប្រាស់វា [អាវុធគីមី]។ ចំពោះសកម្មភាពនៃការចាត់វិធានការឆ្លើយតប គឺនឹងអាស្រ័យលើលក្ខណៈនៃការប្រើប្រាស់របស់ពួកគេជាក់ស្ដែង»។
ប្រទេសរុស្ស៊ី បានបញ្ជូនកងកម្លាំងរបស់ខ្លួនចូលទៅឈ្លានពានអ៊ុយក្រែនអស់រយៈពេល៤សប្ដាហ៍មកហើយ ខណៈដែលករណីនេះបានបង្កឱ្យមានជាការព្រួយបារម្ភ ដោយបណ្ដាប្រទេសលោកខាងលិចថាការប៉ះទង្គិចរវាងប្រទេសទាំង២នេះ អាចនឹងវិវត្តទៅជាសង្រ្គាមដោយប្រើប្រាស់អាវុធនុយក្លេអ៊ែរ គីមី និងជីវសាស្ត្រ ជាដើម។
ទោះជាយ៉ាងណា អ្នកនាំពាក្យវិមានក្រឹមឡាំងមួយរូបបានបញ្ជក់ឱ្យដឹងកាលពីពេលថ្មីៗនេះថា គោលនយោបាយសន្តិសុខរបស់រុស្ស៊ីកំណត់ថា ប្រទេសនេះនឹងប្រើប្រាស់អាវុធទាំងនេះ សម្រាប់តែករណីដែលអត្ថិភាពរបស់ខ្លួនត្រូវបានគំរាមកំហែងប៉ុណ្ណោះ៕
