ចៅក្រមស៊ើបសួរនៃសាលាដំបូងរាជធានីភ្នំពេញ បានសម្រេចឃុំខ្លួនបុរសម្នាក់ដែលក្លែងខ្លួនជារដ្ឋលេខាធិការរួចបោកប្រាក់ពលរដ្ឋជិត ១ម៉ឺនដុល្លារសហរដ្ឋអាមេរិក ដោយធានាផ្តល់ការងារជាមន្ត្រីក្របខណ្ឌនៅក្រសួងទេសចរណ៍។
ក្នុងដីកាបង្គាប់ឱ្យឃុំខ្លួនកាលពីថ្ងៃទី២៩ ខែមីនា ឆ្នាំ២០២២ របស់ចៅក្រមស៊ើបសួរនៃសាលាដំបូងរាជធានីភ្នំពេញ លោក សេង រិទ្ធី បានឱ្យដឹងថា បុរសរូបនោះ មានឈ្មោះ ទ្រី សារិទ្ធិ ហៅ ឈុន ហុងលី ត្រូវបានតុលាការចោទពីបទមួយចំនួន រួមមានការក្លែងបន្លំឯកសារសាធារណ: ប្រើប្រាស់ឯកសាសាធារណ:ក្លែង ឆបោក និងប្រើប្រាស់ឯកសណ្ឋានជាអាទិ៍ដែលមានភាពប្រហាក់ប្រហែលគ្នានឹងនគបាល ឬយោធាជាដើម។
ក្នុងដីកាដដែលនេះ បានបង្គាប់ឱ្យប្រធានពន្ធនាគាររាជធានីភ្នំពេញ PJ ទទួលឃុំខ្លួនជនជាប់ចោទឈ្មោះ ទ្រី សារិទ្ធិ រហូតដល់មានបទបញ្ជាថ្មីសម្រេចផ្សេងពីនេះ និងឱ្យគ្រប់ភ្នាក់ងារនៃកងកម្លាំងសាធារណៈទាំងអស់ សហការអនុវត្តឱ្យបានល្អ។
មុនពេលចាប់ខ្លួនកាលពីថ្ងៃទី២៨ ខែមីនា លោក ទ្រី សារិទ្ធិ ដែលប្រើឈ្មោះក្លែងក្លាយ ឈុន ហុងលី បានតាំងខ្លួនជារដ្ឋលេខាធិការបម្រើការងារនៅខុទ្ទកាល័យនាយករដ្ឋមន្ត្រីនៃទីស្តីការគណ:រដ្ឋមន្ត្រី ហើយឆបោកប្រាក់ពីពលរដ្ឋជិត១ម៉ឺនដុល្លារ ដើម្បីរត់ការចូលក្របខណ្ឌបម្រើការងារនៅក្រសួងទេសចរណ៍។
ករណីស្រដៀងគ្នានេះដែរ សារព័ត៌មានក្នុងស្រុកមួយកាលពីម្សិលមិញបានចុះផ្សាយថា កម្លាំងនាយកដ្ឋាននគរបាលព្រហ្មទណ្ឌ បានចាប់ខ្លួនមន្ដ្រីនគរបាលម្នាក់ដែលបម្រើការងារនៅអគ្គនាយកដ្ឋានភស្ដុភា និងហរិញ្ញវត្ថុនៃក្រសួងមហាផ្ទៃ បញ្ជូនទៅកាន់សាលាដំបូងរាជធានីភ្នំពេញកាលពីរសៀលថ្ងៃទី២៩ ខែមីនា ឆ្នាំ២០២២។ ការចាប់ខ្លួនមន្ត្រីនគរបាលរូបនោះ ពាក់ព័ន្ធករណីឆបោកប្រាក់ជិត៣០ម៉ឺនដុល្លារ ពីជនរងគ្រោះចំនួន ២៨នាក់ ថ្លៃរត់ការចូលក្របខណ្ឌមន្ដ្រីនគរបាលជាតិ។
ប្រភពដដែលបន្តថា ជនរងគ្រោះទាំង២៨នាក់ បានដាក់ពាក្យប្តឹងទៅនាយកដ្ឋាននគរបាលព្រហ្មទណ្ឌក្រសួងមហាផ្ទៃអំឡុងឆ្នាំ២០១៩ ដោយចោទប្រកាន់ ឈ្មោះ ឡេង សុធីវុន ថាបានប្រើប្រាស់តួនាទីរបស់ខ្លួនជាមន្ត្រីនគរបាលនៅអគ្គនាយកដ្ឋានភស្តុភានិងជំនួយការអ្នកធំ ទៅឆបោកពួកគាត់ដើម្បីបានចូលក្របខណ្ឌជាមន្ត្រីនគរបាលជាតិ ដោយតម្រូវឱ្យពលរដ្ឋទាំងនោះ បង់ប្រាក់ក្នុងម្នាក់ៗ ចំនួន១៨ ០០០ដុល្លារ៕
