ក្រសួងសាធារណការ និងដឹកជញ្ជូន បានឱ្យដឹងថា ក្នុងត្រីមាសទី១ ឆ្នាំ២០២២ ដោយគិតចាប់ពីខែមករា ដល់ខែមីនា សមត្ថកិច្ចជំនាញបានចាប់ឃាត់រថយន្តដឹកលើសទម្ងន់សរុបចំនួនជិត១ ០០០ គ្រឿង និងពិន័យជាថវិកាបានជាង១ ៥៨៥ លានរៀលនៅទូទាំងប្រទេស។
អ្នកនាំពាក្យក្រសួងសាធារណការ និងដឹកជញ្ជូន លោក ហ៊ាង សុទ្ធាយុត្តិ បានបញ្ជាក់ប្រាប់ វីអូឌី ពីតួលេខករណីឃាត់រថយន្តដឹកលើសទម្ងន់ និងទឹកប្រាក់ពិន័យក្នុងខែនីមួយៗថា ក្នុងខែមករា មន្ត្រីជំនាញបានឃាត់រថយន្តខុសច្បាប់ចំនួន៣១២គ្រឿង និងពិន័យជាប្រាក់បានចំនួន៥០៧ ៧៨០ ០០០រៀល។
រីឯខែកុម្ភៈ រថយន្តឃាត់និងពិន័យមានចំនួន២៩៩គ្រឿង ស្មើទឹកប្រាក់ប្រមាណ៥៧៧ ៩៥០ ០០០រៀល និងខែមីនា រថយន្តពិន័យមានចំនួន២៨២គ្រឿង ស្មើប្រាក់ពិន័យចំនួន៤៩៩ ៣៥០ ០០០រៀល។
លោក ហ៊ាង សុទ្ធាយុត្តិ បន្ថែមថា ទោះបីរដ្ឋាភិបាលបានដាក់ជញ្ជីងសម្រាប់រថយន្តធុនធំចូលថ្លឹងគ្រប់ទីកន្លែងក៏ដោយ ប៉ុន្តែនៅតែមានករណីដឹកលើសឥតឈប់ឈរ។ លោកថា បញ្ហានេះបណ្ដាលមកពីការប្រកួតប្រជែងគ្នាកេងចំណេញផលប្រយោជន៍ ដែលធ្វើឱ្យប៉ះពាល់ទៅដល់ប្រជាពលរដ្ឋ និងប៉ះពាល់ដល់សង្គមជាតិ។
លោក ហ៊ាង សុទ្ធាយុត្តិ មានប្រសាសន៍ថា៖ «គាត់ចំណេញបន្តិចមែន ក៏ប៉ុន្តែធ្វើឱ្យខូចផ្លូវ បង្កគ្រោះថ្នាក់ចរាចរណ៍ ខាតបង់ថវិកាជាតិ»។
មន្ត្រីនាំពាក្យដដែលឱ្យដឹងថា ការអនុវត្តច្បាប់ក្នុងខែមីនាកន្លងទៅ ដែលសមត្ថកិច្ចចាប់បានរថយន្តដឹកលើសទម្ងន់ចំនួន២៨២គ្រឿង និងពិន័យថវិកាបានជាង៥០០លានរៀល គឺជាការឃាត់រថយន្តហើយប្រគល់ជូនម្ចាស់វិញភ្លាមៗបន្ទាប់ពីបង់ប្រាក់ពិន័យរួច។ លោកថា ករណីដែលមិនអនុវត្តការផាកពិន័យឱ្យបានត្រឹមត្រូវនោះ សមត្ថកិច្ចនឹងឃាត់រថយន្តទុកតែម្តង។
លោក ហ៊ាង សុទ្ធាយុត្តិ បន្តថា៖ «សម្រាប់យើង ក្នុងនាមជារាជរដ្ឋាភិបាល គឺខិតខំប្រឹងប្រែង ដោយសម្ដេចក្រឡាហោម ស ខេង ក៏មានប្រសាសន៍ថា បញ្ហានេះជាបញ្ហាយូរអង្វែង។ អ៊ីចឹងមិនមែនដោះស្រាយហើយចប់ទេ អ្វីដែលសំខាន់គឺយើងកាត់ភាគរយវាឱ្យបានច្រើន»។
ច្បាប់ស្ដីពីផ្លូវថ្នល់ឱ្យដឹងថា ក្នុងករណីដែលទទួលរងនូវការពិន័យអន្តរការណ៍ម្តងរួចហើយ តែនៅបន្តប្រព្រឹត្តល្មើសទៀត ត្រូវពិន័យជាប្រាក់ទ្វេដង និងបញ្ឈប់អាជីវកម្មដឹកជញ្ជូនរបស់ក្រុមហ៊ុនចំនួនមួយឆ្នាំ។ ជាមួយគ្នានេះ ម្ចាស់យានយន្តត្រូវទទួលខុសត្រូវលើការលើកដាក់ទំនិញ និងបង់ថ្លៃឈ្នួលកន្លែងថែទាំទំនិញនិងយានជំនិះដោយខ្លួនឯង៕
