ប្រភពមួយចំនួនបានឱ្យដឹងនៅថ្ងៃអង្គារនេះថា ប្រធានាធិបតីអាមេរិក លោក ចូ បៃឌិន ក្នុងរយៈពេលប៉ុន្មានថ្ងៃខាងមុខនេះ ត្រូវបានរំពឹងថានឹងប្រកាសផ្ដល់កញ្ចប់ជំនួយយោធាមួយផ្សេងទៀតសម្រាប់អ៊ុយក្រែន ក្នុងទំហំដូចគ្នាទៅនឹងជំនួយ [៨០០លានដុល្លារ] ដែលត្រូវបានប្រកាសកាលពីសប្ដាហ៍មុន។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់មន្ត្រីអាមេរិកមួយរូបដែលសុំមិនបញ្ចេញឈ្មោះ ថាកញ្ចប់ជំនួយយោធាថ្មីមួយដែលផ្ដល់ជូនដល់អ៊ុយក្រែននេះ ត្រូវបានរំពឹងថានឹងមានទំហំដូចគ្នាទៅនឹងកញ្ចប់មុន។
ទោះជាយ៉ាងណា ប្រភពខាងលើនេះពុំបានផ្ដល់ព័ត៌មានលម្អិតទាក់ទិននឹងករណីនេះនោះទេ។
រដ្ឋបាលលោក ចូ បៃឌិន កាលពីសប្ដាហ៍មុន បានប្រកាសផ្ដល់ជំនួយយោធាបន្ថែមដល់អ៊ុយក្រែនក្នុងទំហំទឹកប្រាក់ចំនួន៨០០លានដុល្លារ រួមទាំងប្រព័ន្ធកាំភ្លើងធំ រថពាសដែក និងកប៉ាល់គ្មានមនុស្សបើក ដើម្បីពង្រឹងវិស័យការពារជាតិរបស់អ៊ុយក្រែន ជាមួយនឹងអាវុធធុនធំទាំងឡាយទប់ទល់នឹងការឈ្លានពានដោយរុស្សី។
គួរបញ្ជាក់ថា ក្នុងករណីការផ្ដល់ជំនួយថ្មីបន្ថែមទៀតក្នុងសប្ដាហ៍នេះមានទំហំធំដូចទៅនឹងការរំពឹងទុកនោះ កញ្ចប់ជំនួយយោធាសរុបរបស់សហរដ្ឋអាមេរិកដល់អ៊ុយក្រែន នឹងឈានដល់ចំនួន៣ពាន់លានដុល្លារ គិតចាប់តាំងពីរុស្ស៊ីបានឈ្លានពានកាលពីខែកុម្ភៈកន្លងទៅ៕
