ប្រធានាធិបតីបារាំង លោក Emmanuel Macron, អធិការបតីអាល្លឺម៉ង់ លោក Olaf Scholz និងនាយករដ្ឋមន្ត្រីអ៊ីតាលី លោក Mario Draghi នៅព្រឹកថ្ងៃព្រហស្បតិ៍នេះ បានធ្វើដំណើរទៅដល់រដ្ឋធានីកៀវ (Kyiv) ប្រទេសអ៊ុយក្រែនហើយ ក្នុងដំណើរទស្សនកិច្ចរួមគ្នាមួយ ដើម្បីបង្ហាញការគាំទ្រដល់អ៊ុយក្រែនក្នុងការប្រយុទ្ធប្រឆាំងនឹងការឈ្លានពានដោយរុស្ស៊ី។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងពីទីក្រុងកៀវ ប្រធានាធិបតីបារាំង លោក Emmanuel Macron បានឱ្យដឹងថា៖ «វាគឺជាពេលវេលាដ៏សំខាន់មួយ។ វាគឺជាសារនៃការរួបរួមមួយ ដែលយើងកំពុងតែផ្ញើទៅកាន់ប្រជាជនអ៊ុយក្រែនទាំងអស់ នៃការគាំទ្រទាំងសម្រាប់ពេលបច្ចុប្បន្ន និងអនាគត»។
ឆ្លើយតបទៅនឹងការរិះគន់ទាំងក្នុងប្រទេសនិងក្រៅប្រទេស កាលពីពេលកន្លងទៅ ចំពោះការមិនធ្វើដំណើរទៅកាន់ប្រទេសអ៊ុយក្រែន ប្រធានាធិបតីបារាំងរូបនេះបានបញ្ជាក់ថា ដំណើរទស្សនកិច្ចរបស់លោកត្រូវបានធ្វើឡើង លុះត្រាតែវាផ្ដល់នូវផលប្រយោជន៍ [ដល់គ្រប់ភាគីទាំងអស់] ដែលមិនមែនគ្រាន់តែជាការបង្ហាញការគាំទ្រមួយមុខទេ។
គួរបញ្ជាក់ថា ដំណើរទស្សនកិច្ចក្នុងប្រទេសអ៊ុយក្រែន ដោយថ្នាក់ដឹកនាំកំពូលៗទាំង៣រូបនេះ ក៏មានគោលបំណងក្នុងការស្វែងរកដំណោះស្រាយជុំវិញការរិះគន់ដែលមានលើប្រទេសពួកគេ ទាក់ទិននឹងការឆ្លើយតបនឹងសង្រ្គាមនៅអ៊ុយក្រែនផងដែរ។
ទាក់ទិននឹងករណីនេះ លោក Emmanuel Macron បន្ថែមថា៖ «យើងនៅទីនេះ យកចិត្តទុកដាក់ ហើយនឹងចូលរួមជាមួយលោកប្រធានាធិបតី វ៉ូឡូឌីមៀ ហ្សេលេនស្គី ដើម្បីទៅកាន់ទីតាំងសង្រ្គាមដែលផ្ទុះការវាយប្រហារគ្នាដោយផ្ទាល់»។
ការឈ្លានពានរបស់រុស្ស៊ីលើអ៊ុយក្រែន គិតរហូតមកដល់ពេលនេះ បានឈានចូលមកដល់សប្តាហ៍ទី១៦ហើយ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ខណៈមនុស្សរាប់លាននាក់ ក៏បានភៀសខ្លួនចេញពីប្រទេសផងដែរ៕
