មេធាវីការពារក្ដីឱ្យ កញ្ញា សេង ធារី បានដាក់លិខិតទៅអគ្គនាយកដ្ឋានពន្ធនាគារនៃក្រសួងមហាផ្ទៃ ដើម្បីស្នើសុំចួបសម្ភាសជាមួយកូនក្ដីរបស់ខ្លួននៅពន្ធនាគារខេត្តព្រះវិហារ។
ការដាក់លិខិតស្នើរបស់មេធាវីការពារក្ដីឱ្យកញ្ញា សេង ធារី នេះធ្វើឡើងបន្ទាប់ពីសមត្ថកិច្ចរាជធានីភ្នំពេញបានបញ្ជូនកញ្ញាចេញពីពន្ធនាគារព្រៃស រាជធានីភ្នំពេញ ទៅឃុំនៅពន្ធនាគារខេត្តព្រះវិហារ កាលពីថ្ងៃទី១៥ ខែមិថុនា ឆ្នាំ២០២២ ដោយមិនបានប្រាប់ពីមូលហេតុទៅកាន់មេធាវីការពារសិទ្ធិឱ្យកញ្ញាឡើយ។
យោងតាមលិខិត លោក ជូង ជូងី ដែលជាមេធាវីការពារក្តីឱ្យកញ្ញា សេង ធារី ដាក់ជូនអគ្គនាយកដ្ឋានពន្ធនាគារនាថ្ងៃទី២០ ខែមិថុនានេះ បានលើកឡើងថា កញ្ញា សេង ធារី (ឬសេង ច័ន្ទធារី) បានសុំពឹងពាក់រូបលោកការពារសិទ្ធិឱ្យកញ្ញាក្នុងសំណុំរឿងព្រហ្មទណ្ឌមួយ ហើយដែលសាលាដំបូងរាជធានីភ្នំពេញបានសម្រេចផ្តន្ទាទោសកញ្ញាដាក់ពន្ធនាគាររយៈពេល៦ឆ្នាំ និងចេញដីកាចាប់ខ្លួន។
លោកបន្តថា បន្ទាប់ពីប្រកាសសាលក្រមរួច សមត្ថកិច្ចបានចាប់ខ្លួននិងបញ្ជូនកញ្ញា សេង ធារី ទៅឃុំខ្លួនទៅមណ្ឌលអប់រំកែប្រែ (ម២) ហើយក៏បានបញ្ជូនបន្តទៅឃុំខ្លួននៅពន្ធនាគារខេត្តព្រះវិហារវិញ។
ការស្នើសុំចួបសម្ភាសកូនក្តីនៅក្នុងពន្ធនាគារខេត្តព្រះវិហារនេះ លោក ជូង ជូងី បញ្ជាក់ថា៖ «ខ្ញុំបាទជាមេធាវី ត្រូវចួបកញ្ញា សេង ច័ន្ទធារី ជាច្រើនលើកនៅក្នុងពន្ធនាគារ ដើម្បីផ្តល់ការប្រឹក្សាផ្លូវច្បាប់ជូនគាត់ និងដើម្បីការពារសិទ្ធិគាត់តាមនីតិវិធី។ អាស្រ័យហេតុនេះ សូមឯកឧត្តមអគ្គនាយក មេត្តាអនុញ្ញាតឱ្យខ្ញុំបាទបានចូលចួបកញ្ញា សេង ច័ន្ទធារី នៅក្នុងពន្ធនាគារ តាមកម្មវត្ថុនៃពាក្យស្នើសុំ»។
លោកមេធាវី ជូង ជូងី មានប្រសាសន៍បន្ថែមលើលិខិតថា ដើមចមដែលនាំឱ្យលោកដាក់លិខិតស្នើសុំជួបសម្ភាសជាមួយកូនក្ដីរបស់ខ្លួននៅពន្ធនាគារខេត្តព្រះវិហារ គឺដើម្បីប្រាប់ពីលទ្ធផលសាលក្រមដែលសាលាដំបូងរាជធានីភ្នំពេញសម្រេចផ្តន្ទាទោសដល់កូនក្តីរបស់ខ្លួន និងប្រឹក្សាផ្នែកច្បាប់ក្នុងការប្តឹងជំទាស់ទៅនឹងសាលក្រមនោះទៅសាលាឧទ្ធរណ៍រាជធានីភ្នំពេញ ជាដើម។ លោកថា បើសិនជាថ្នាក់ដឹកនាំពន្ធនាគារនៅក្រសួងមហាផ្ទៃ មិនអនុញ្ញាតឱ្យរូបលោកបានជួបកូនក្តីទេនោះ កាន់តែបង្ហាញពីភាពខ្សោយក្នុងការអនុវត្តច្បាប់នៅកម្ពុជា។
លោកមានប្រសាសន៍ថា៖ «បើមិនអនុញ្ញាត គាត់កាន់តែបំពានច្បាប់ធ្ងន់ទៅៗ គឺបង្ហាញនូវឥរិយាបថរបស់អ្នកអនុវត្តច្បាប់នៅស្រុកខ្មែរ គឺធ្វើតាមចិត្តរបស់ខ្លួន គឺអត់យកច្បាប់ជាគោលទេ ចេះតែទាញហេតុផលផ្សេងៗជាលេស ប៉ុន្តែធ្វើតាមទំនើងចិត្តរបស់ខ្លួន»។
ហេតុផលមួយទៀត លោក ជូង ជូងី បានបញ្ជាក់ដែរថា ការដាក់លិខិតស្នើទៅក្រសួងមហាផ្ទៃនេះ ដោយសារតែលោកបារម្ភខ្លាចមន្ត្រីពន្ធនាគារខេត្តព្រះវិហារមិនអនុញ្ញាតឱ្យលោកចូលចួបកូនក្ដី នៅពេលដែលលោកទៅដល់ពន្ធនាគារខេត្តនេះដែលមានចម្ងាយជាង៣០០គីឡូម៉ែត្រពីរាជធានីភ្នំពេញ។
លោកថា៖ «យើងអត់ទុកចិត្តពន្ធនាគារទេ ជួនកាលគាត់អារម្មណ៍អត់ល្អ គាត់ខ្លាចថ្នាក់លើរបស់គាត់ គាត់មិនឱ្យចួបស្រេចចិត្តគាត់។ អ៊ីចឹងចង់ឱ្យមានភាពជាក់លាក់ពីប្រធាននាយកដ្ឋានពន្ធនាគារ ថាតើគាត់ឱ្យចួបឬមិនឱ្យចួប! ហើយបើគាត់ឱ្យចួប ត្រូវមានលិខិតពីគាត់ទៅ ព្រោះជួនកាលពេលទៅដល់អត់ឱ្យចួប អាហ្នឹងខកជើងដូចខ្ញុំទៅ[ម២]អ៊ីចឹង គាត់មិនឱ្យចួបស្រេចចិត្តគាត់។ ដល់អ៊ីចឹងយើងធ្វើដំណើររាប់រយគីឡូ ត្រូវខកជើង»។
អ្នកនាំពាក្យអគ្គនាយកនៃអគ្គនាយកដ្ឋានពន្ធនាគារ លោក នុត សវនា មានប្រសាសន៍ថា គិតត្រឹមរសៀលថ្ងៃចន្ទនេះ លោកនៅមិនទាន់បានទទួលលិខិតរបស់លោកមេធាវី ជូង ជូងី នៅឡើយទេ។ លោកបន្តថា នៅពេលលិខិតនោះដល់ដៃអគ្គនាយកដ្ឋានពន្ធនាគារ ហើយថ្នាក់ដឹកនាំសម្រេចយ៉ាងណានោះ លោកនឹងផ្តល់ព័ត៌មាននៅពេលក្រោយ។
តែយ៉ាងណា លោកគូសបញ្ជាក់ថា៖ «ករណីភ្លាមៗអ៊ីចឹង គាត់ធ្វើសកម្មភាពកន្លងមក ធ្វើឱ្យយើងមានការចាប់អារម្មណ៍ មានការព្រួយបារម្ភដែរ អ៊ីចឹងបានយើងចាត់ទុកករណីហ្នឹងជាករណីពិសេស ដែលយើងត្រូវមានការប្រុងប្រយ័ត្ន។ មែនទែនទៅ គោលការណ៍យើងមិនមានអ្វីរារាំងទេ គាត់មានសិទ្ធិជួបមេធាវីគាត់ បើសិនជាគាត់ដាក់លិខិតទៅក្រសួង ហើយចាំក្រសួងឆ្លើយតប ចាំគាត់ធ្វើសកម្មភាពទៅ ប៉ុន្តែជាគោលការណ៍ គ្មានការរារាំងមិនឱ្យគាត់ជួបមេធាវីគាត់ទេ»។
មន្ត្រីស៊ើបអង្កេតជាន់ខ្ពស់នៅសមាគមការពារសិទ្ធិមនុស្សអាដហុក លោក ស៊ឹង សែនករុណា ពន្យល់ជាទូទៅថា តាមច្បាប់ មេធាវីមានសិទ្ធិសុំជួបកូនក្តី ដើម្បីប្រឹក្សាយោបល់ផ្នែកច្បាប់ និងប្រាប់ពីសិទ្ធិរបស់កូនក្តី ដែលមិនពេញចិត្តទៅនឹងសេចក្តីសម្រេចរបស់តុលាការជាន់ទាប គឺគាត់មានសិទ្ធិប្តឹងជំទាស់នឹងសេចក្តីសម្រេចនោះទៅតុលាការជាន់ខ្ពស់។
ប៉ុន្តែលោកថា បើសិនជាការស្នើសុំរបស់មេធាវី ដើម្បីជួបកូនក្តី ត្រូវបានរឹតត្បិតឬមិនអនុញ្ញាត នឹងធ្វើឱ្យរងការរិះគន់ពីប្រព័ន្ធយុត្តិធម៌នៅកម្ពុជាថា ដើរថយក្រោយទៅវិញ។
លោកមានប្រសាសន៍ថា៖ «កាលណាអ្នកដែលគេមិនសប្បាយចិត្ត មិនពេញចិត្ត ជាសកម្មជននយោបាយ គឺគេតែងតែធ្វើទៅតាមទំនើងចិត្ត អ៊ីចឹងវាបង្ហាញពីប្រព័ន្ធយុត្តិធម៌សង្គមរបស់ប្រទេសយើងកាន់តែធ្វើឱ្យមានការបាត់បង់នូវជំនឿចិត្តអំពីការអនុវត្តច្បាប់ ហើយគេអាចនឹងមានការរិះគន់ជាបន្តបន្ទាប់បន្ថែមទៀតចំពោះប្រព័ន្ធយុត្តិធម៌នៅកម្ពុជាយើង»។
កញ្ញា សេង ធារី ជាមេធាវីម្នាក់ដែលបានបញ្ចប់ការសិក្សាថ្នាក់បណ្ឌិតច្បាប់នៅសហរដ្ឋអាមេរិក ត្រូវបានសមត្ថកិច្ចកម្ពុជាចាប់បញ្ជូនខ្លួនទៅឃុំនៅពន្ធនាគារព្រៃស (ម២) ភ្លាមៗ កាលពីថ្ងៃទី១៤ ខែមិថុនា ឆ្នាំ២០២២ ក្រោយពីសាលាដំបូងរាជធានីភ្នំពេញចេញសាលក្រមផ្តន្ទាទោសគាត់ដាក់ពន្ធនាគាររយៈពេល៦ឆ្នាំ ក្រោមការចោទពីបទ «រួមគំនិតក្បត់ និងញុះញង់»។
ការចោទប្រកាន់នេះ តុលាការសម្អាងថា កញ្ញា សេង ធារី បានបង្ហោះសារលើបណ្ដាញសង្គមគាំទ្រគម្រោងធ្វើមាតុភូមិនិវត្តន៍របស់លោក សម រង្ស៊ី អតីតប្រធានគណបក្សប្រឆាំង កាលពីអំឡុងឆ្នាំ២០១៩។
ក្រោយតុលាការផ្ដន្ទាទោសកញ្ញា សេង ធារី និងអ្នកនយោបាយប្រឆាំង ប្រមាណ៦០នាក់នោះ ស្ថានទូតអាល្លឺម៉ង់ប្រចាំកម្ពុជា ជំរុញរដ្ឋាភិបាលគោរពសេរីភាពបញ្ចេញមតិ និងការប្រមូលផ្ដុំ ខណៈស្ថានទូតអាមេរិកប្រចាំកម្ពុជាចាត់ទុកសាលក្រមកាត់ទោសកញ្ញា សេង ធារី និងក្រុមបក្សប្រឆាំងផ្សេងទៀត ជារឿងអយុត្តិធម៌ និងស្នើឱ្យអាជ្ញាធរកម្ពុជាដោះលែងកញ្ញា និងសកម្មជនសិទ្ធិមនុស្សដទៃទៀត៕
