មន្រ្តីរដ្ឋាភិបាលបានគូសបញ្ជាក់ជាថ្មីពីការប្ដេជ្ញាទប់ស្កាត់បទល្មើសសត្វព្រៃ តាមរយៈការពង្រឹងការអនុវត្តច្បាប់ និងការបង្កើតមុខរបរឱ្យសហគមន៍ ដូចជាការចិញ្ចឹមសត្វ និងការជំរុញសេវាទេសចរណ៍ ជាដើម។
ការបង្ហាញជំហរនេះធ្វើឡើងក្នុងពិធីប្រកាសជាផ្លូវការពីយុទ្ធនាការផ្លាស់ប្តូរឥរិយាបថសង្គម ស្តីពី «ការពារសត្វព្រៃ៖ កាត់បន្ថយការទិញ និងការហូបសាច់សត្វព្រៃ» នៅថ្ងៃទី២២ ខែមិថុនានេះ ដែលសហការរៀបចំដោយក្រសួងបរិស្ថាន ទីភ្នាក់ងារជំនួយអាមេរិក (USAID) អង្គការមូលនិធិសកលសម្រាប់ធម្មជាតិ (WWF) អង្គការសមាគមអភិរក្សសត្វព្រៃ (WCS) និងអង្គការដៃគូមួយចំនួនទៀត។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា ថ្លែងក្នុងពិធីនោះថា បទល្មើសធនធានធម្មជាតិកើតឡើងពីការប្រព្រឹត្តរបស់ពលរដ្ឋដែលមានជីវភាពខ្វះខាត។ លោកថា លុះត្រាតែមានដំណោះស្រាយលើតម្រូវការរបស់ពលរដ្ឋ នោះទើបអាចផ្លាស់ប្តូរឥរិយាបថរបស់ពួកគាត់បាន។
លោក ភក្ត្រា បន្តថា ដើម្បីកាត់ផ្តាច់នូវការដាក់សម្ពាធលើធនធានធម្មជាតិ លុបបំបាត់ការដាក់អន្ទាក់ និងការបរបាញ់សត្វព្រៃខុសច្បាប់បាន ដំណោះស្រាយគឺការអនុវត្តច្បាប់ ត្រូវដើរទន្ទឹមជាមួយការបង្កើនជីវភាពប្រជាពលរដ្ឋនៅមូលដ្ឋាន តាមរយៈការបង្កើតមុខរបរជូនពួកគាត់ ដូចជា ការចិញ្ចឹមសត្វ និងការជំរុញសេវាទេសចរណ៍នៅក្នុងសហគមន៍របស់ពួកគាត់ ជាដើម។
លោកថា៖ «បើសិនជាក្រពះគាត់ឆ្អែត គាត់មានចំណូល ក្រៅអំពីកិច្ចការងារហ្នឹង ខ្ញុំជឿថាបងប្អូនប្រជាពលរដ្ឋ គាត់មិនស៊ូទ្រាំចូលទៅក្នុងព្រៃ ដើម្បីប្រព្រឹត្តបទល្មើស ឬក៏ធ្វើកិច្ចការងារដែលប្រឈមមុខជាមួយច្បាប់ទេ គឺគាត់នឹងរកការងារដែលមានសុវត្ថិភាព និងការងារដែលមានចំណូល។ អ៊ីចឹងហើយបានជាក្រសួងបរិស្ថាន រួមជាមួយអង្គការដៃគូហ្នឹង យើងជំរុញទៅលើការអភិវឌ្ឍមូលដ្ឋានហ្នឹងឯង តាមរយៈការបង្កើតមុខរបរថ្មី ផ្តល់ជម្រើសថ្មី ជួយផ្នែកបច្ចេកទេសដល់គាត់ ឱ្យគាត់មានភាពរឹងមាំក្នុងការទាក់ទាញយកផលប្រយោជន៍»។
ប្រធានការិយាល័យកំណើនសេដ្ឋកិច្ចប្រកបដោយចីរភាព នៃទីភ្នាក់ងារជំនួយអាមេរិក (USAID) លោក រីឆាត ឈិន (Richard Chen) ថ្លែងថា សត្វព្រៃ គឺជាផ្នែកមួយដ៏សំខាន់នៃកេរដំណែលជាតិរបស់កម្ពុជា ហើយដើរតួនាទីយ៉ាងសំខាន់ក្នុងការរក្សានូវប្រព័ន្ធអេកូឡូស៊ី ដែលផ្តល់អត្ថប្រយោជន៍ដល់ពលរដ្ឋ និងសេដ្ឋកិច្ច។ តែយ៉ាងណា លោកថា ធនធានធម្មជាតិ និងសត្វព្រៃរបស់កម្ពុជា កំពុងបាត់បង់ពីព្រៃ និងតំបន់ការពារធម្មជាតិ ដែលទាមទារឱ្យមានការទប់ស្កាត់។
លោក រីឆាត ឈិន បានគូសបញ្ជាក់ថា ដោយសារមូលហេតុនេះហើយ ទើបអង្គការសង្គមស៊ីវិល សហការជាមួយក្រសួងបរិស្ថាន បង្កើតយុទ្ធនាការ «កាត់បន្ថយការទិញ និងការហូបសាច់សត្វព្រៃ» ដោយផ្តោតសំខាន់លើការអប់រំយុវជនឱ្យមានការយល់ដឹងពីសារៈសំខាន់នៃធនធានធម្មជាតិ តាមរយៈការកាត់បន្ថយតម្រូវការទិញនិងហូបសាច់សត្វព្រៃ។ លោកបន្ថែមថា ការកាត់បន្ថយតម្រូវការសាច់សត្វព្រៃ នឹងរួមចំណែកដល់ការកាត់បន្ថយការដាក់អន្ទាក់ និងការបរបាញ់ខុសច្បាប់។
លោកថា៖ «រដ្ឋាភិបាលសហរដ្ឋអាមេរិកបន្តផ្តល់ការគាំទ្រដល់ប្រជាជនកម្ពុជា ក្នុងការការពារធនធានធម្មជាតិ និងឆ្លើយតបទៅនឹងបញ្ហាប្រឈមទាក់ទងនឹងការប្រែប្រួលអាកាសធាតុ រាប់បញ្ចូលទាំងការផ្តល់ជំនួយជាទឹកប្រាក់លើសពី១០០លានដុល្លារអាមេរិកពីសំណាក់ទីភ្នាក់ងារជំនួយអាមេរិក USAID ដល់គម្រោងបរិស្ថាននៅកម្ពុជារយៈពេល២ទសវត្សរ៍កន្លងមកនេះ។ តាមរយៈការសហការគ្នា ខ្ញុំយល់ថា យើងអាចធ្វើឱ្យកិច្ចការពារព្រៃឈើ សត្វព្រៃ និងធនធានធម្មជាតិរបស់កម្ពុជាប្រសើរឡើង»។
ជ័យលាភីបរវកញ្ញាពិភពលោកកម្ពុជាឆ្នាំ២០២១ កញ្ញា សារី សុវត្តី ដែលបានចូលរួមក្នុងកម្មវិធីនេះដែរ យល់ថា ព្រៃឈើនិងសត្វព្រៃមានភាពសំខាន់ ជាពិសេសសម្រាប់អ្នកជំនាន់ក្រោយ ខណៈការផ្តន្ទាទោសលើជនល្មើស គឺជារឿងចាំបាច់។ កញ្ញាថា ការពង្រឹងការអនុវត្តច្បាប់តែមួយមុខ គឺមិនគ្រប់គ្រាន់ទេ ព្រោះកត្តាចំណេះដឹងនៅមានកម្រិត កង្វះការផ្សព្វផ្សាយ និងបញ្ហាជីវភាព ក៏ជាផ្នែកមួយជំរុញឱ្យពលរដ្ឋបង្ខំចិត្តប្រព្រឹត្តបទល្មើសដែរ។
កញ្ញាថា៖ «ព្រៃឈើហើយនិងសត្វព្រៃ នៅពេលដែលបាត់បង់ ហើយអត់មានអ្នកការពារ អ្នកដែលខាតគឺយើងទាំងអស់គ្នា គ្រប់គ្នាតែម្តង មិនមែនសម្រាប់តែអ្នកដែលគាត់ធ្វើការបំផ្លាញសម្លាប់សត្វព្រៃនោះទេ។ ហើយអ្នកដែលប៉ះពាល់ខ្លាំងជាងគេ គឺក្មេងជំនាន់ក្រោយ ព្រោះយើងជាអ្នកនៅក្នុងជំនាន់នេះ យើងជាអ្នកបំផ្លាញ ហើយយើងអត់ឈប់ យើងអត់ទប់ស្កាត់ វាអត់ប៉ះពាល់យើងឥលូវទេ រយៈពេល១០ឬ២០ឆ្នាំទៅមុខទៀត ៥០ឆ្នាំទៅមុខទៀតយ៉ាងយូរ ប៉ះពាល់កូនចៅយើងជំនាន់ក្រោយ និងអាចក្លាយទៅជាវិប្បដិសារីមួយ ប្រសិនបើយើងមិនបញ្ឈប់សកម្មភាពទាំងអស់ហ្នឹង»។
បើតាមរបាយការណ៍របស់ក្រសួងបរិស្ថានក្នុងឆ្នាំ២០២១ ក្រសួង និងអង្គការដៃគូ បានដកអន្ទាក់សរុបចំនួន៦១ ៦១១អន្ទាក់ចេញពីតំបន់ការពារធម្មជាតិចំនួន៧២ និងច្រករបៀងជីវចម្រុះផ្សេងៗទៀតក្នុងប្រទេសកម្ពុជា។
រដ្ឋលេខាធិការក្រសួងបរិស្ថាន លោក នេត្រ ភក្ត្រា បានឱ្យដឹងដែរថា ក្នុងឆ្នាំ២០២១នោះដែរ ក្រុមសង្គ្រោះសត្វព្រៃបន្ទាន់មកពីអង្គភាពចម្រុះ បានចុះប្រតិបត្តិការបង្ក្រាបការជួញដូរសត្វព្រៃចំនួន៦២៥ករណី សង្គ្រោះសត្វព្រៃបាន១ ២៧១ក្បាល រឹបអូសសត្វព្រៃចំនួន៣ ៦០៩ក្បាល និងរឹបអូសសាច់សត្វព្រៃគ្រប់ប្រភេទបានចំនួន៣៥៤គីឡូក្រាម បញ្ជូនសំណុំរឿងចំនួន១១ទៅតុលាការ និងបានដោះលែងសត្វព្រៃចូលទៅព្រៃធម្មជាតិវិញចំនួន៨៦៤ក្បាល។
ដោយឡែក សម្រាប់ការបង្ក្រាបបទល្មើសធនធានធម្មជាតិជារួម ដូចជា បទល្មើសដឹកឈើ កាប់ឈើ បរបាញ់សត្វព្រៃ និងការទន្ទ្រានដីព្រៃខុសច្បាប់វិញ លោកថា រដ្ឋាភិបាលបង្ក្រាបបានចំនួន៨ ៦២១ករណី នៅឆ្នាំ២០២១ ក្នុងនោះជាង៨០០ករណីបានបញ្ជូនសំណុំរឿងទៅតុលាការ៕