មន្រ្តីស្ថានទូតអាមេរិកប្រចាំកម្ពុជា បានបញ្ជាក់ថា អាមេរិកនៅមិនទាន់មានសញ្ញាវិជ្ជមានណាមួយនៅឡើយទេ ជុំវិញការស៊ើបអង្កេតទៅលើបុរសវ័យចំណាស់ម្នាក់ដែលប៉ុនប៉ងគប់ស្បែកជើងទៅលើលោកនាយករដ្ឋមន្ត្រី ហ៊ុន សែន ក្នុងពេលដែលប្រមុខរដ្ឋាភិបាលកម្ពុជារូបនេះចូលរួមនៅក្នុងកិច្ចប្រជុំកំពូលអាស៊ាន-អាមេរិក កាលពីដើមខែឧសភាកន្លងទៅនេះ។
ឆ្លើយតបតាមសារអេឡិចត្រនិចជាមួយវីអូឌី កាលពីថ្ងៃទី២១ ខែមិថុនា មន្រ្តីនាំពាក្យស្ថានទូតអាមេរិកប្រចាំកម្ពុជា លោកស្រី ស្ទេបផាន្នី អាសាធ (Stephanie Arzate) បញ្ជាក់ថា មកដល់ពេលនេះ សហរដ្ឋអាមេរិកនៅមិនទាន់មានអ្វីថ្មីនៅឡើយទេ ទាក់ទិនសំណួរដែលលើកឡើងថា តើមានការវិវត្តបែបណាចំពោះការស៊ើបអង្កេតទៅលើបុរសម្នាក់ដែលគប់ស្បែកជើងសំដៅលើនាយករដ្ឋមន្រ្តីកម្ពុជា។
លោកស្រីបន្តថា៖ «ពួកយើងមិនទាន់មានអ្វីដែលថ្មីដូចដែលអ្នកចង់ដឹងនេះនៅឡើយទេ។ ពួកយើងនឹងផ្តល់ដំណឹង ប្រសិនបើមានអ្វីដែលនឹងកើតឡើង»។
ជុំវិញរឿងនេះ ក្នុងដំណើរបំពេញទស្សនកិច្ចជាផ្លូវការសម្រាប់កិច្ចប្រជុំកំពូលអាស៊ាន-អាមេរិក កាលពីខែឧសភា ឆ្នាំ២០២២ លោកនាយករដ្ឋមន្រ្តី ហ៊ុន សែន ត្រូវបានបុរសវ័យចំណាស់ដែលគេស្គាល់ឈ្មោះថា លោក អ៊ុក ទូច ជាពលរដ្ឋខ្មែរ-អាមេរិកាំង បានស្វាគមន៍លោកដោយស្បែកជើងមួយចំហៀង តែមិនត្រូវ។ ព្រឹត្តិការណ៍នេះកើតឡើងនៅថ្ងៃទី១១ ខែឧសភា ក្នុងពេលលោកនាយករដ្ឋមន្រ្តី ហ៊ុន សែន ជួបអ្នកគាំទ្ររបស់លោកនៅទីតាំងសាធារណៈ ក្នុងរដ្ឋធានីវ៉ាស៊ីនតោន សហរដ្ឋអាមេរិក។
ភ្លាមៗ ក្រោយហេតុការណ៍នេះកើតឡើង លោកនាយករដ្ឋមន្ត្រី ហ៊ុន សែន បានអំពាវនាវឱ្យអ្នកគាំទ្ររបស់លោកបន្តអត់ធ្មត់។ បើទោះបែបណា លោកក៏មានការខឹងសម្បារដែរចំពោះរឿងនេះ ក្រោយពេលលោកត្រលប់មកដល់កម្ពុជាវិញ។
នៅក្នុងពិធីជួបជាមួយក្រុមគ្រូពេទ្យ កាលពីថ្ងៃទី១៧ ខែឧសភា លោកនាយករដ្ឋមន្រ្តី ហ៊ុន សែន បានចាត់ទុកករណីគប់ស្បែកជើងប្រឆាំងរូបលោកនេះថា ជាការវាយប្រហារដោយហិង្សា និងបានព្រមានថា ប្រសិនបើសហរដ្ឋអាមេរិកចាត់ទុកសកម្មភាពនេះជាសេរីភាពបញ្ចេញមតិ នោះវាសនាក្រុមអ្នកដែលប្រឆាំងនឹងលោកនៅក្នុងប្រទេសកម្ពុជាក៏ត្រូវរងនូវការគប់ស្បែកជើងដូចគ្នានេះដែរ។
លើសពីនេះទៅទៀត លោក ហ៊ុន សែន ថែមទាំងព្រមានថា អ្នកគាំទ្រគណបក្សប្រជាជនកម្ពុជាក៏នឹងប្រមូលផ្តុំដែរ នៅមុខស្ថានទូតអាមេរិកប្រចាំកម្ពុជា បើបញ្ហានេះមិនមានការស៊ើបអង្កេតទេនោះ។
ចំណែក ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានគូសបញ្ជាក់នៅថ្ងៃនេះថា គម្រោងនៃការធ្វើបាតុកម្មនៅមុខស្ថានទូតអាមេរិកប្រចាំកម្ពុជាត្រូវបោះបង់ទៅវិញហើយ ក្រោយពីលោកនាយករដ្ឋមន្រ្តីមិនគាំទ្រ។
លោកបន្តថា៖ «អត់ទេ! បន្ទាប់ពីមានការសុំច្បាប់ធ្វើបាតុកម្មនៅមុខស្ថានទូតអាមេរិកហ្នឹង គឺសម្តេច [ហ៊ុន សែន] ថាវាមិនមានជាសារៈប្រយោជន៍អ្វីក្នុងការធ្វើបាតុកម្មទេ។ លោក[សម្តេច]មិនគាំទ្រឱ្យមានបាតុកម្មទេ ដូច្នេះបាតុកម្មហ្នឹងមិនមានជាសកម្មភាពអ្វីទេ»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ សាទរចំពោះការសម្រេចចិត្តមិនបង្កជម្លោះនៅពេលនេះពីសំណាក់រដ្ឋាភិបាលកម្ពុជា។ លោកថា ការព្យាយាមអត់ធ្មត់ចំពោះសភាពការណ៍នៅពេលនេះ បង្ហាញឱ្យឃើញពីភាពវៃឆ្លាតរបស់កម្ពុជា ហើយនេះក៏ជាកាយវិការដែលឆ្លុះបញ្ចាំងពីភាពចាស់ទុំផ្នែកការទូតផងដែរ។
លោកបន្តថា៖ «សម្រាប់ខ្ញុំ ខ្ញុំគិតថា នេះជារឿងមួយដ៏ត្រឹមត្រូវ ហើយការសម្រេចនេះគឺជារឿងមួយដ៏ល្អប្រសើរសម្រាប់កម្ពុជា ពីព្រោះកម្ពុជា ខ្ញុំអាចនិយាយដោយខ្លីថា ប្រហែលជាបានសិក្សាអំពីបញ្ហាផ្លូវច្បាប់រួចទៅហើយ មុននឹងធ្វើការសម្រេចចិត្ត ឬក៏ផ្លាស់ប្តូរនូវគោលជំហរធ្វើបាតុកម្មប្រឆាំងនឹងព្រឹត្តិការណ៍ដែលបានកើតឡើងកាលពីខែឧសភាហ្នឹង»។
បើទោះបែបណា អ្នកនាំពាក្យស្ថានទូតអាមេរិកប្រចាំកម្ពុជា បានគូសបញ្ជាក់ក្នុងសារដែលឆ្លើយតបជាមួយវីអូឌីថា សហរដ្ឋអាមេរិកនៅតែបន្តបើកការស៊ើបអង្កេតចំពោះករណីនេះ ហើយជាការស៊ើបអង្កេតធ្វើឡើងដោយហ្មត់ចត់ស្របតាមច្បាប់របស់ខ្លួនផងដែរ៕
កែតម្រូវ៖ ចំណងជើងអត្ថបទរឿង «អាមេរិកនៅមិនទាន់បានបើកការស៊ើបអង្កេតលើករណីគប់ស្បែកជើងសំដៅលោក ហ៊ុន សែន នៅឡើយ» ទៅជា «អាមេរិកមិនទាន់មានតម្រុយអ្វីថ្មីលើការស៊ើបអង្កេតករណីគប់ស្បែកជើងសំដៅលើលោក ហ៊ុន សែន»