ប្រជាសហគមន៍ឧត្ដមស្រែពស់ ក្នុងឃុំត្រពាំងជោរ បានអះអាងថា មន្ត្រីជំនាញបរិស្ថានខេត្តកំពង់ស្ពឺបានប្រកាសប្រាប់ប្រជាពលរដ្ឋក្នុងវេទិកាសាធារណៈមួយកាលពីសប្ដាហ៍មុន ដោយសន្យាផ្ដល់ដីចំនួនជាង៤០០ហិកតា ដើម្បីសងទៅកាន់ប្រជាសហគមន៍ឧត្ដមស្រែពស់វិញ ក្រោយព្រៃមួយនេះរងការឈូសឆាយនិងកាប់បំផ្លាញ។
ប្រជាសហគមន៍ឧត្ដមស្រែពស់ លោក សយ សាត បានប្រាប់វីអូឌីថា កាលពីចុងខែមិថុនាកន្លងទៅ ក្នុងកិច្ចប្រជុំជាសាធារណៈនោះ អនុប្រធានមន្ទីរបរិស្ថានខេត្តកំពង់ស្ពឺ លោក នូវ ណាក់ និងអាជ្ញាធរផ្សេងទៀត បានសម្រេចឱ្យរក្សាដីនៅសេសសល់ចំនួន៣០ហិកតានៅជុំវិញបរិវេណវត្តព្រៃមេត្តាធម្មជាតិប៉ុណ្ណោះ។ ប៉ុន្តែអនុប្រធានមន្ទីរបរិស្ថានខេត្តកំពង់ស្ពឺ បានសន្យារកដីកន្លែងផ្សេងជាង៤០០ហិកតា ដើម្បីយកមកសងសហគមន៍វិញ។
លោកថា៖ «អ្វីដែលសហគមន៍ចង់បាន គឺនិរន្តរភាពព្រៃឈើ មានទីវត្ត មានកន្លែងសមាធិ មានសត្វព្រៃដែលអាចរស់នៅជាមួយគ្នាបាន»។
យ៉ាងណា ប្រជាសហគមន៍រូបនេះមិនអាចជឿទុកចិត្តចំពោះការលើកឡើងរបស់អនុប្រធានមន្ទីរបរិស្ថាននោះទេ ត្បិតកន្លងមក លោកថា សហគមន៍ព្យាយាមទាមទារឱ្យមានការដោះស្រាយពីមន្ត្រីជំនាញ និងអាជ្ញាធរពាក់ព័ន្ធ ប៉ុន្តែគ្មានលទ្ធផលល្អឡើយ។
វីអូឌី មិនអាចសុំការឆ្លើយតបពីអនុប្រធានមន្ទីរបរិស្ថានខេត្តកំពង់ស្ពឺ លោក នូវ ណាក់ បានទេ នៅថ្ងៃទី៤ ខែកក្កដា។ ចំណែកប្រធានមន្ទីរបរិស្ថានខេត្តកំពង់ស្ពឺ លោក ឱម ម៉ាក់ធារី បង្វែរសំណួរទៅកាន់អនុប្រធានមន្ទីរបរិស្ថានរូបនោះវិញ។
ដោយឡែក អភិបាលស្រុកឱរ៉ាល់ លោក មួង ធី បដិសេធឆ្លើយសំណួរវីអូឌីតាមទូរសព្ទនៅថ្ងៃចន្ទនេះ។
លោក មួង ធី ថា៖ «ទីមួយ អ្នកសារព័ត៌មាន ខ្ញុំអត់ស្គាល់ ខ្ញុំអត់ឆ្លើយទេ! អត់ស្គាល់មុខគ្នា! បងឯងយកតែលេខគេមកតេអ៊ីចឹងហ្នឹង! អ៊ីចឹងទាល់តែមកជួបផ្ទាល់ ខ្ញុំអត់កំណាញ់ទេ ទម្លាប់ខ្ញុំអ៊ីចឹង»។
បើតាមវីដេអូឃ្លីបមួយដែលប្រជាសហគមន៍ «ឧត្ដមស្រែពស់» បានបង្ហោះអំពីវេទិកាសាធារណៈនោះ អភិបាលស្រុកឱរ៉ាល់ លោក មួង ធី បានឆ្លើយទៅកាន់ប្រជាពលរដ្ឋថា អង្គការក្រៅរដ្ឋាភិបាល ឬបណ្ដាញសង្គម មិនអាចជួយអ្វីដល់ពលរដ្ឋនោះទេ ពោលគឺមានតែអាជ្ញាធរថ្នាក់មូលដ្ឋានទេដែលអាចជួយនិងដោះស្រាយជូនពួកគាត់បាន។
លោកថា៖ «តើអ្នកស្រុកឱរ៉ាល់អត់ស្គាល់ចៅហ្វាយស្រុកឬយ៉ាងម៉េច? អត់ស្គាល់មេឃុំឬម៉េច? ហើយសួរថាអង្គការស្ដាប់ហើយមានអ្វីដោះអត់? គាត់មានអីដោះទេ? គាត់អង្គការ។ អ៊ីចឹងមានតែពួកខ្ញុំដោះហ្នឹងណា អ៊ីចឹងកុំរំខានគាត់»។
អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តកំពង់ស្ពឺ លោក រ័ត្ន ថាវី បានឱ្យដឹងថា បន្ទាប់ពីមន្រ្តីថ្នាក់ខេត្តបានចុះមកវាស់វែងដីព្រៃសហគមន៍ កាលពីពាក់កណ្ដាលខែមិថុនា ប៉ុន្តែមកទល់ពេលនេះមិនទាន់មានដំណោះស្រាយអ្វីនៅឡើយទេ។ ដូច្នេះ លោកសង្ឃឹមថា អាជ្ញាធរថ្នាក់ជាតិនឹងដោះស្រាយជម្លោះដីធ្លីនេះឱ្យបានឆាប់រហ័ស ដោយលោកយល់ថា អាជ្ញាធរខេត្តមិនអាចដោះស្រាយបញ្ហានេះបាននោះទេ។
លោកថា៖ «រឿងនេះ បើយើងនិយាយពីសមត្ថកិច្ចធ្វើការដោះស្រាយដោះអី ដូចជាមិនអាចដោះស្រាយបាននោះទេ ព្រោះថារឿងហ្នឹងអនុក្រឹត្យធ្លាក់ពីលើមក វាគួរតែអាជ្ញាធរថ្នាក់ជាតិអាចដោះស្រាយបាន»។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង២៦០ហិកតា (២៦២,២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតនៅភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន៤១គ្រួសារ សម្រាប់ធ្វើលំនៅឋាន និងបង្កបង្កើនផល។
ក្រោយទទួលបានដីសម្បទានសង្គមកិច្ចនេះ ក្រុមទាហានដាក់គ្រឿងចក្រឈូសឆាយ និងប្រើកម្លាំងកម្មករឱ្យចូលទៅកាប់រុករានព្រៃឈើតំបន់នោះ ប៉ុន្តែត្រូវបានអ្នកភូមិរាប់រយនាក់នៅឃុំត្រពាំងជោរចេញតវ៉ាប្រឆាំង ដោយពួកគេអះអាងថា ព្រៃឈើតំបន់នោះជាព្រៃសហគមន៍ឧត្ដមស្រែពស់ និងព្រៃមេត្តាធម្មជាតិ ដែលពួកគេបានការពារជាង២០ឆ្នាំមកហើយ៕