ស្ថានទូតជប៉ុនប្រចាំកម្ពុជា នឹងបើកទ្វារទទួលស្វាគមន៍ចំពោះពលរដ្ឋកម្ពុជាដែលចង់ចូលរួមរំលែកទុក្ខនៃមរណភាពអតីតនាយករដ្ឋមន្រ្តីជប៉ុន លោក ស៊ីនហ្សូ អាបេ តាមរយៈសរសេរសាររំលែកទុក្ខដោយផ្ទាល់បាន នៅតាមទីតាំងស្ថានទូត និងការិយាល័យអគ្គកុងស៊ុលជប៉ុនប្រចាំនៅកម្ពុជា។
តាមរយៈហ្វេសប៊ុកផ្លូវការរបស់ស្ថានទូតជប៉ុនប្រចាំកម្ពុជា នៅថ្ងៃអាទិត្យនេះ ឱ្យដឹងថា ស្ថានទូតនឹងបើកទ្វារស្វាគមន៍ចាប់ពីថ្ងៃទី១៣ រហូតដល់ថ្ងៃទី១៦ ខែកក្កដា ឆ្នាំ២០២២ សម្រាប់ពលរដ្ឋកម្ពុជា ដែលរស់នៅរាជធានីភ្នំពេញ ដោយពួកគេអាចចូលរួមសរសេរសាររំលែកទុក្ខចំពោះមរណភាពលោកស៊ីនហ្សូ អាបេ ដោយផ្ទាល់បាន។ ស្ថានទូតបន្តថា ចំពោះម៉ោងដែលអាចចូលរួមសរសេរសាររំលែកទុក្ខបាន គឺពេលព្រឹកចាប់ពីម៉ោង១០ រហូតដល់ម៉ោងបាយថ្ងៃត្រង់ និងពេលរសៀលចាប់ពីម៉ោង២ រហូតដល់ម៉ោង៤ល្ងាច។
ដោយឡែក ពលរដ្ឋកម្ពុជាដែលរស់នៅខេត្តសៀមរាប ស្ថានទូតជប៉ុនបានបញ្ជាក់ថា ពួកគាត់ក៏អាចមានសិទ្ធិចូលរួមសរសេរសាររំលែកទុក្ខនេះបានដែរ។ ស្ថានទូតនឹងប្រើប្រាស់ការិយាល័យនៃអគ្គកុងស៊ុលជប៉ុនប្រចាំខេត្តសៀមរាប ដើម្បីបើកផ្លូវឱ្យពួកគេអាចចូលរួមសរសេរសាររំលែកនូវមរណទុក្ខនេះ ដូចពលរដ្ឋនៅរាជធានីភ្នំពេញដែរ។ តាមរយៈការជូនដំណឹងរបស់ស្ថានទូត ការិយាល័យនៃអគ្គកុងស៊ុលសម្រាប់ខេត្តសៀមរាប នឹងបើកទ្វារចាប់ពីថ្ងៃទី១១ រហូតដល់ថ្ងៃទី១២ ខែកក្កដា ឆ្នាំ២០២២ ហើយចំពោះពេលវេលា គឺពេលព្រឹកចាប់ពីម៉ោង១០ រហូតដល់បាយថ្ងៃត្រង់ និងពេលរសៀលចាប់ពីម៉ោង២ រហូតដល់ម៉ោង៤ល្ងាច។
បើតាមសេចក្តីជូនដំណឹងដដែលនេះ ចំពោះអ្នកដែលត្រូវទៅចូលរួមរំលែកទុក្ខ គឺគ្រាន់តែប្រាប់សន្តិសុខស្ថានទូតថា មកក្នុងគោលបំណងដើម្បីសរសេរសាររំលែកទុក្ខ ដោយត្រូវភ្ជាប់ទៅជាមួយនូវអត្តសញ្ញាណបណ្ណ ឬបណ្ណសម្គាល់ខ្លួនណាមួយ ដូចជាលិខិតឆ្លងដែន ជាដើម។ មួយវិញទៀត អ្នកដែលទៅចូលរួមទាំងអស់ត្រូវពាក់ម៉ាស់ជានិច្ច នៅក្នុងបរិវេណស្ថានទូត និងការិយាល័ នៃអគ្គកុងស៊ុលជប៉ុន ទាំងរាជធានីនៅភ្នំពេញ និងនៅខេត្តសៀមរាប។
ជុំវិញមរណភាពរបស់អតីតនាយករដ្ឋមន្ត្រីជប៉ុននេះដែរ រដ្ឋាភិបាលកម្ពុជាបានប្រកាសយកថ្ងៃទី១០ ខែកក្កដានេះ ដើម្បីកាន់មរណៈទុក្ខលោក អាបេ ផងដែរ ក្នុងនោះ រដ្ឋាភិបាលកម្ពុជាបានណែនាំដល់គ្រប់គ្រឹះស្ថានទាំងរដ្ឋ និងឯកជន ត្រូវបង្ហូតទង់ជាតិត្រឹមពាក់កណ្តាលដង ជាការគោរពវិញ្ញាណក្ខន្ធអតីតនាយករដ្ឋមន្រ្តីជប៉ុនរូបនេះ។
ចំណែកក្រសួងទេសចរណ៍កម្ពុជា កាលពីថ្ងៃម្សិលមិញ ក៏បានណែនាំដល់គ្រប់ម្ចាស់សេវាកម្មកម្សាន្ត រាប់ចាប់ពីតាំងពីក្លឹបកម្សាន្ត ខារ៉ាអូខេ និងបៀរហ្គាដែន ជាដើម នៅទូទាំងរាជធានី-ខេត្ត ត្រូវផ្អាកសកម្មភាពនៃការកម្សាន្តសប្បាយមួយថ្ងៃ គឺនៅថ្ងៃទី១០ ខែកក្កដានេះ។
លិខិតបន្ថែមថា គ្រប់ប្រធានមន្ទីរទេសចរណ៍រាជធានី-ខេត្ត ត្រូវបន្តផ្សព្វផ្សាយនិងអនុវត្តសារាចរណែនាំនេះឱ្យមានប្រសិទ្ធភាពខ្ពស់។
លោក ស៊ីនហ្សូ អាបេ ត្រូវបានឃាតកលួចធ្វើឃាតកាលពីថ្ងៃទី៨ ខែកក្កដា ក្នុងពេលដែលលោកចូលរួមឃោសនាបោះឆ្នោតជ្រើសរើសសមាជិកសភាជប៉ុន៕