ព្រះរាជអាជ្ញារងអមសាលាដំបូងខេត្តកំពង់ស្ពឺ ពន្យារពេលស្ដាប់ការបំភ្លឺរបស់ដើមបណ្ដឹងជាប្រជាពលរដ្ឋនៅសហគមន៍ឧត្ដមស្រែពស់ចំនួន៦នាក់ ក្រោយមន្ត្រីរូបនោះបានឆ្លងជំងឺកូវីដ-១៩។
កាលពីថ្ងៃទី០៩ ខែមីនា ឆ្នាំ២០២២ ប្រជាសហគមន៍ឧត្ដមស្រែពស់ ចំនួន៧នាក់ រស់នៅភូមិពោធិ៍មាស ឃុំត្រពាំងជោ ស្រុកឱរាល់ បានដាក់ពាក្យបណ្ដឹងទៅសាលាដំបូងខេត្តកំពង់ស្ពឺ ដោយប្ដឹងឈ្មោះ ប៉ែន សារិទ្ធ និងឈ្មោះ អៀម ម៉ៅ ជាទាហាននៃបញ្ជាការដ្ឋានកងរថក្រោះ ថាបានប្រើប្រាស់ហិង្សាលើពលរដ្ឋ និងកាប់បំផ្លាញព្រៃសហគមន៍ ដែលបានប្រព្រឹត្តកាលពីអំឡុងខែកុម្ភៈ ឆ្នាំ២០២២។ ក្រោយការដាក់ពាក្យបណ្ដឹង ព្រះរាជអាជ្ញារងអមសាលាដំបូងខេត្តកំពង់ស្ពឺ លោក វ៉ិត មឃៈ បានចេញដីកាកោះហៅពលរដ្ឋជាដើមបណ្តឹង ឱ្យចូលទៅស្ដាប់ការបំភ្លឺ នៅថ្ងៃទី១៤ ខែកក្កដា ឆ្នាំ២០២២ ខាងមុខនេះ។
ព្រះរាជ្ញារងអមសាលាដំបូងខេត្តកំពង់ស្ពឺ លោក វ៉ិត មឃៈ បានឱ្យដឹងនៅថ្ងៃចន្ទនេះថា លោកបានសម្រេចពន្យារពេលស្តាប់ការបំភ្លឺរបស់ពលរដ្ឋទាំងនោះហើយ ដោយសារតែលោកឆ្លងជំងឺកូវីដ-១៩។ ចំណែកកាលបរិច្ឆេទដែលត្រូវកោះហៅឱ្យចូលស្តាប់ការបំភ្លឺជាថ្មីទៀតនោះ ព្រះរាជអាជ្ញារងរូបនេះ នៅមិនទាន់កំណត់ពេលនៅឡើយ។
លោកថា៖ «ខ្ញុំបានណែនាំឱ្យក្រឡាបញ្ជី ឱ្យលើកកម្មវិធី [ស្តាប់ការបំភ្លឺ] ដោយសារតែកូវីដ [ឆ្លងជំងឺកូវីដ-១៩] ដាក់ច្បាប់ទៅ! អ៊ីចឹងទៅ កាលបរិច្ឆេទលើកក្រោយ ពេលខ្ញុំចូលធ្វើការវិញ [នឹងកំណត់ជាថ្មី]»។
បើតាមពាក្យបណ្ដឹង ពលរដ្ឋទាំង៦នាក់ដែលបានប្ដឹងទាហាន២នាក់ទៅតុលាការខេត្តកំពង់ស្ពឺនោះ រួមមាន អ្នកស្រី ឃន ខន, លោក សយ សាត, លោក ឈន ធាំ, លោក កាក់ សឿន, អ្នកស្រី ឃន ធុច និងអ្នកស្រី យី យឹម។
ប្រជាសហគមន៍ឧត្តមស្រែពស់ ដែលជាដើមបណ្តឹង លោក សយ សាត បានលើកឡើងថា មូលហេតុដែលប្រជាពលរដ្ឋប្តឹងមន្ត្រីទាហានទាំង២នាក់នោះ ដោយសារតែពួកគេបានប្រើអំពើហិង្សាលើប្រជាពលរដ្ឋជាច្រើនដង និងមានការដុតបំផ្លាញគោយន្តរបស់ប្រជាពលរដ្ឋ ជាដើម។ លោករំពឹងថា តុលាការនឹងផ្តល់យុត្តិធម៌ដល់ពួកគាត់ក្នុងពេលឆាប់ៗនេះ។
លោកថា៖ «ប្រជាពលរដ្ឋសហគមន៍ជឿជាក់ថា ប្រសិនបើតុលាការមានភាពយុត្តិធម៌ នឹងរកឃើញបញ្ហាការបង្ករបួសស្នាម ការដុតបំផ្លាញគោយន្ត ការបង្ករបួសស្នាម។ ដូច្នេះតុលាការនឹងអាចចោទប្រកាន់ទៅអ្នកប្រព្រឹត្តបាន»។
បើតាមលោក សយ សាត កន្លងមក ប្រជាសហគមន៍មិនបានទទួលដីកាកោះហៅលើកទី១នោះទេ ទើបតែថ្ងៃទី៩ ខែកក្កដា កន្លងទៅថ្មីៗនេះ មន្រ្តីបរិស្ថានម្នាក់បានយកដីកាកោះហៅលើកទី២នេះទៅឱ្យប្រជាពលរដ្ឋ។
លោកថា៖ «ខ្ញុំអត់បានដឹងផង! ស្រាប់តែមានលើកទី២! ហើយលើកទី២ គឺ១០ថ្ងៃហើយបានយកមក។ ហើយកាលពីលើកទី១ អត់បានដំណឹងដល់យើងផង ស្រាប់តែមានដីកាកោះលើកទី២។ ខ្ញុំដូចមិនយល់ទាល់តែសោះ»។
លោកស្រី សាម សុគន្ធា មេធាវីនៃអង្គការការពារសិទ្ធិមនុស្សលីកាដូ និងជាមេធាវីការពារសិទ្ធិឱ្យប្រជាសហគមន៍ឧត្តមស្រែពស់ទាំង៦នាក់នោះ លោកស្រីនឹងចូលរួមឆ្លើយបំភ្លឺជាមួយប្រជាពលរដ្ឋ នៅពេលដែលព្រះរាជអាជ្ញារងអមសាលាដំបូងខេត្តកំពង់ស្ពឺ កោះហៅកូនក្តីរបស់ខ្លួនជាថ្មីទៀត។
គួរបញ្ជាក់ថា កន្លងមក ប្រជាសហគមន៍ឧត្ដមស្រែពស់ចំនួន៦នាក់ ក្នុងនោះមានលោក សយ សាត ម្នាក់ដែរ បានរងនូវបណ្ដឹងដែលប្ដឹងដោយមន្ត្រីទាហាន ឈ្មោះ ប៉ែន សារិទ្ធ ពីបទ «ធ្វើឱ្យខូចខាតដោយចេតនា គំរាមកំហែង ជេរប្រមាថជាសាធារណៈ និងញុះញង់បង្កអសន្តិសុខធ្វើឱ្យប៉ះពាល់ដល់សង្គម»។
កាលពីថ្ងៃទី៧ ខែកុម្ភៈ ឆ្នាំ២០២២ តំណាងអយ្យការអមសាលាដំបូងខេត្តកំពង់ស្ពឺ លោក ទិន សុចិត្រា បានចេញដីកាកោះហៅប្រជាសហគមន៍ទាំង ៦នាក់នោះ ឱ្យចូលបំភ្លឺនៅថ្ងៃទី២៣ ខែកុម្ភៈ ឆ្នាំ២០២២ ប៉ុន្តែត្រូវបានប្រជាសហគមន៍ស្នើសុំពន្យារពេលចូលបំភ្លឺ៕