មន្ត្រីជាន់ខ្ពស់នៃស្នងការដ្ឋាននគរបាលខេត្តបន្ទាយមានជ័យ បញ្ជាក់ថា សមត្ថកិច្ចបានបញ្ជូនខ្លួនអ្នកសារព័ត៌មានម្នាក់ទៅតុលាការខេត្តកំពង់ធំរួចរាល់ហើយកាលពីម្សិលមិញ ក្រោយចាប់ខ្លួនបុគ្គលរូបនោះតាមដីការបស់តុលាការ ជុំវិញការចោទប្រកាន់ពីបទ «កំហែងយក»។
ស្នងការនគរបាលខេត្តបន្ទាយមានជ័យ លោក សិទ្ធិ ឡោះ ប្រាប់វីអូឌីនៅថ្ងៃពុធនេះថា កាលពីថ្ងៃទី១១ ខែកក្កដា សមត្ថកិច្ចខេត្តនេះបានចាប់ខ្លួនបុគ្គលឈ្មោះ ហ៊ាង លីហាក់ ដែលមានមុខរបរជាអ្នកកាសែត ខណៈដែលបុគ្គលរូបនេះព្យាយាមលាក់ខ្លួននៅក្នុងផ្ទះសំណាក់មួយកន្លែង។
លោកបន្តថា ក្រោយចាប់ខ្លួន សមត្ថកិច្ចបានបញ្ជូនអ្នកសារព័ត៌មានរូបនោះទៅកាន់ស្នងការដ្ឋាននគរបាលខេត្តកំពង់ធំវិញ ដើម្បីចាត់វិធានការបន្តទៅតាមនីតិវិធីច្បាប់។
បើតាមដីការបស់ចៅក្រមស៊ើបសួរសាលាដំបូងខេត្តកំពង់ធំ លោក អែម សុទ្ធសច្ចា ឱ្យដឹងថា បុគ្គលឈ្មោះ ហ៊ាង លីហាក់ អាយុ៥២ឆ្នាំ មានមុខរបរជាអ្នកកាសែត ប៉ុន្តែមិនបានបញ្ជាក់ថាជាអ្នកកាសែតឱ្យស្ថាប័នណាមួយនោះឡើយ។ ដីកាបន្តថា អ្នកកាសែតរូបនេះ បច្ចុប្បន្នមានលំនៅឋាននៅភូមិកំពង់ចិន ឃុំកំពង់ចិនត្បូង ស្រុកស្ទោង ខេត្តកំពង់ធំ បានគេចខ្លួនពីការកោះហៅរបស់តុលាការ ក្នុងការចូលឆ្លើយបំភ្លឺ ដោយឱ្យតែមេធាវីចូលទៅបំភ្លឺជំនួសតែប៉ុណ្ណោះ។
ប្រភពដដែលបន្តថា អ្នកកាសែតរូបនេះត្រូវបានតុលាការដាក់នៅក្រោមការត្រួតពិនិត្យពីបទ«កំហែងយក» ដែលប្រព្រឹត្តបទល្មើសនៅក្នុងចំណុចភូមិអូរពេកសាមគ្គី ស្រុកមានរិទ្ធ ស្រុកសណ្ដាន់ ខេត្តកំពង់ធំ កាលពីអំឡុងឆ្នាំ២០២០ ប៉ុន្តែតុលាការក៏មិនបានបញ្ជាក់ចំពោះការកំហែងយកនោះ ពាក់ព័ន្ធករណីណានោះដែរ។
បើតាមការចុះផ្សាយរបស់សារព័ត៌មានក្នុងស្រុកកាលពីឆ្នាំ២០១៨ ឱ្យដឹងថា លោក ហ៊ាង លីហាក់ ជាអ្នកយកព័ត៌មានឱ្យទូរទស្សន៍ប៉ុស្តិ៍លេខ៥ ប្រចាំខេត្តកំពង់ធំ ពេលនោះ។
កាលពីថ្ងៃទី២៦ ខែមិថុនា ឆ្នាំ២០១៨ ដីកាបង្គាប់របស់ព្រះរាជអាជ្ញារងអមសាលាដំបូងរាជធានីភ្នំពេញ លោក ខាំ សុផារី ពេលនោះ បានបង្គាប់ឱ្យចាប់ខ្លួនឈ្មោះ ហ៊ាង លីហាក់ ម្តងរួចមកហើយ។
ដីកាបង្គាប់ឱ្យចាប់ខ្លួនលោក ហ៊ាង លីហាក់ ពេលនោះ ពាក់ព័ន្ធបទឆបោក ប្រព្រឹត្តនៅរាជធានីភ្នំពេញ ខេត្តកំពង់ធំ និងខេត្តសៀមរាប កាលពីខែកក្កដា ឆ្នាំ២០១២៕