ប្រភពស្និទ្ធនឹងលោកស្រី ណានស៊ី ផេឡូស៊ី (Nancy Pelosi) បានឱ្យដឹងថា ប្រធានរដ្ឋសភាសហរដ្ឋអាមេរិក ត្រូវបានរំពឹងថានឹងទៅដល់ទីក្រុងតៃប៉ិ កោះតៃវ៉ាន់ នៅក្នុងថ្ងៃអង្គារនេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ប្រភពដដែលបន្តថា ដំណើរទស្សនកិច្ចរបស់លោកស្រី ណានស៊ី ផេឡូស៊ី គឺភាគច្រើនផ្ដោតសំខាន់លើការជួបប្រជុំជាមួយប្រធានាធិបតីតៃវ៉ាន់ លោកស្រី សៃ អ៊ីងវេន (Tsai Ing-wen) ដែលនឹងត្រូវធ្វើឡើងនៅថ្ងៃពុធ។
ទោះជាយ៉ាងណា ប្រភពបញ្ជាក់ថា៖ «អ្វីៗគ្រប់យ៉ាងគឺអាចនឹងមានភាពប្រែប្រួលជានិច្ច»។
យោងតាមកាសែតតៃវ៉ាន់ Liberty Times ក៏បានបញ្ជាក់ថា គណៈប្រតិភូរបស់លោកស្រី ផេឡូស៊ី នឹងទៅដល់តៃវ៉ាន់ នៅម៉ោង១០និង២០នាទីយប់ (1420 GMT) នៅថ្ងៃអង្គារ។
សម្រាប់ដំណើរទស្សនកិច្ចរបស់ប្រធានសភាអាមេរិកមកកាន់ទ្វីបអាស៊ីនេះ លោកស្រីក៏គ្រោងទៅកាន់ប្រទេសម៉ាឡេស៊ី កូរ៉េខាងត្បូង ជប៉ុន ខណៈលោកស្រីក៏បានទៅកាន់ប្រទេសសិង្ហបុរី កាលពីថ្ងៃចន្ទម្សិលមិញនេះផងដែរ។
គួរបញ្ជាក់ថា ចិនដែលតែងតែអះអាងថា កោះតៃវ៉ាន់គឺជាទឹកដីរបស់ខ្លួន ក៏ធ្លាប់បានព្រមានចាត់វិធានការទាំងឡាយ ក្នុងករណីដែលលោកស្រី ផេឡូស៊ី ធ្វើដំណើរទៅកាន់ដែនកោះមួយនេះផងដែរ។
ទាក់ទិននឹងករណីនេះ អាមេរិកបានធ្វើការឆ្លើយតបថា ការព្រមាននេះនឹងមិនមានឥទ្ធិពលអ្វីលើខ្លួនឡើយ ខណៈពួកគេថា លោកស្រី ផេឡូស៊ី មានសិទ្ធិទៅកាន់កោះតៃវ៉ាន់គ្រប់ពេល៕
