សាច់ញាតិអនុភូមិម្នាក់ដែលស្លាប់ក្នុងរថយន្តសមត្ថកិច្ច ពេលកំពុងបញ្ជូនទៅកាន់បញ្ជាការដ្ឋានកងរាជអាវុធហត្ថខេត្តកំពង់ធំ អំពាវនាវទៅតុលាការចាត់វិធានការច្បាប់ទៅលើអ្នកក្រៀកកឪពុករបស់គាត់ម្នាក់ទៀត និងទាមទារសំណង៣ម៉ឺនដុល្លារ ខណៈតុលាការសម្រេចចោទប្រកាន់និងឃុំខ្លួនអ្នកពាក់ព័ន្ធចំនួន៣នាក់តែប៉ុណ្ណោះ។
កញ្ញា ឌិន នារតី កូនបង្កើតរបស់អនុប្រធានភូមិរូង មកពីគណបក្សកាន់អំណាច ស្ថិតនៅឃុំក្រវ៉ា ស្រុកបារាយណ៍ ខេត្តកំពង់ធំ លោក សួង ឌ័ន បានប្រាប់វីអូឌីនៅថ្ងៃនេះថា កាលពីថ្ងៃទី៧ ខែសីហា ឪពុករបស់គាត់បានទៅអង្គុយពិសាកាហ្វេនៅក្នុងហាងមួយកន្លែងក្នុងភូមិរូង ក្រោយត្រលប់មកពីប្រជុំវិញ។
កញ្ញាបន្តថា នៅថ្ងៃកើតហេតុ ក្នុងហាងកាហ្វេនោះមិនបានបើកល្បែងស៊ីសងតាមអនឡាញទេ ស្រាប់តែពេលនោះមានក្រុមកម្លាំងកងរាជអាវុធហត្ថស្រុកចុះទៅចាប់ក្រៀកស្មា និងសង្កត់កឪពុករបស់គាត់ឡើងរថយន្ត ដើម្បីបញ្ជូនទៅបញ្ជាការដ្ឋានកងរាជអាវុធហត្ថខេត្ត ប៉ុន្តែឪពុករបស់កញ្ញាក៏បានស្លាក់ខ្យល់ និងស្លាប់នៅលើរថយន្តតែម្តង។
ក្រោយពីមានហេតុការណ៍នេះកើតឡើង កញ្ញាបញ្ជាក់ថា កងរាជអាវុធហត្ថលើផ្ទៃប្រទេសបានឃាត់ខ្លួនជនសង្ស័យដែលជាមន្ត្រីកងរាជអាវុធហត្ថចំនួន១៣នាក់មកសួរនាំជាបន្តបន្ទាប់ រហូតដល់ថ្ងៃទី២២ ខែសីហានេះ គាត់ទទួលបានព័ត៌មានថា សាលាដំបូងខេត្តកំពង់ធំបានសម្រេចឃុំខ្លួនមន្ត្រីកងរាជអាវុធហត្ថខេត្តចំនួន៣នាក់នៅពន្ធនាគារខេត្ត និងអនុញ្ញាតឱ្យមន្ត្រីកងរាជអាវុធហត្ថចំនួន១០នាក់ទៀតត្រលប់ទៅផ្ទះវិញ ដោយរកពុំឃើញថា ពួកគេមានកំហុសនោះទេ។
ទោះជាបែបនេះក្ដី កញ្ញា នារតី នៅតែមិនទាន់អស់ចិត្តលើការសម្រេចរបស់តុលាការ ចំពោះការឃុំខ្លួនមន្ត្រីកងរាជអាវុធហត្ថចំនួន៣នាក់ ខណៈអ្នកដែលក្រៀកកឪពុករបស់គាត់ផ្ទាល់ មិនឃើញមានចំណាត់ការ និងអនុញ្ញាតឱ្យត្រលប់ទៅផ្ទះវិញ ហើយថាគ្មានកំហុសទៅវិញ។
ករណីនេះ កញ្ញាបង្ហាញការងឿងឆ្ងល់ និងស្នើទៅតុលាការធ្វើការស្រាវជ្រាវឱ្យមានតម្លាភាពលើមន្ត្រីកងរាជអាវុធហត្ថម្នាក់ទៀតដែលក្រៀកកឪពុកគាត់ផ្ទាល់ ដើម្បីចាត់វិធានការច្បាប់ និងផ្តល់យុត្តិធម៌ដល់ក្រុមគ្រួសារសាច់ញាតិគាត់ដែលកំពុងរងគ្រោះ។
កញ្ញានិយាយថា៖ «សុំឱ្យអ្នកណាដែលជាអ្នកធ្វើ ជាអ្នកទទួល ដោយសារអ្នកដែលក្រៀកកត្រូវរួចខ្លួន។ និយាយទៅ ដូចខ្ញុំនិយាយអ៊ីចឹង តាមច្បាប់គេជាអ្នកចាត់ចែង»។
វីអូឌី មិនអាចសុំការបំភ្លឺពីព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តកំពង់ធំ លោក សាយ វាសនា បានទេ នៅថ្ងៃនេះ ដោយលោកអះអាងថាជាប់រវល់សវនាការ។
ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តកំពង់ធំ លោក សាយ វាសនា ប្រាប់វីអូឌីកាលពីថ្ងៃទី២២ ខែសីហា ថាមន្រ្តីកងរាជអាវុធហត្ថខេត្តកំពង់ធំ ទាំង៣នាក់ ដែលត្រូវបានតុលាការបង្គាប់ឱ្យឃុំខ្លួននៅពន្ធនាគារជាបណ្ដោះអាសន្ន កាលពីថ្ងៃទី១៨ ខែសីហា ឆ្នាំ២០២២ ក្រោមបទចោទ «មនុស្សឃាតដោយអចេតនា» តាមមាត្រា២០៧ នៃក្រមព្រហ្មទណ្ឌ រួមមាន លោក សៅ សិរីវុឌ្ឍ ជាជំនួយការអង្គភាពនគរបាលយុត្តិធម៌ លោក លុយ តាំងឈួយ ជាប្រធានអង្គភាពនគរបាលយុត្តិធម៌ និងនាយការិយាល័យព្រហ្មទណ្ឌ លោក សុខ ម៉េងហុង។
ព្រះរាជអាជ្ញារងរូបនេះបន្ថែមថា ចំណែកមន្ត្រីកងរាជអាវុធហត្ថខេត្តកំពង់ធំចំនួន១០នាក់ផ្សេងទៀតត្រូវបានអនុញ្ញាតឱ្យត្រលប់ទៅផ្ទះវិញ ដោយសាររកមិនឃើញថាពួកគេមានកំហុស។ ប៉ុន្តែលោកថា ចៅក្រមស៊ើបអាចកោះហៅអ្នកពាក់ព័ន្ធទាំងនោះមកសួរនាំបន្ថែមទៀតបាន ត្បិតសំណុំរឿងនេះនៅមិនទាន់បញ្ចប់នៅឡើយទេ។
លោក សួង ឌ័ន មានវ័យ៤៧ឆ្នាំ ជាអនុភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ ត្រូវបានកម្លាំងកងរាជអាវុធហត្ថស្រុកបារាយណ៍ ឃាត់ខ្លួនក្នុងប្រតិបត្តិការចុះបង្រ្កាបករណីល្បែងស៊ីសងជល់មាន់ កាលពីថ្ងៃទី៧ ខែសីហានោះ។
ក្នុងសន្និសីទសារព័ត៌មាននៅបញ្ជាការដ្ឋានកងរាជអាវុធហត្ថខេត្តកំពង់ធំ កាលពីថ្ងៃ១៧ ខែសីហា អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានថ្លែងថា ប្រតិបត្តិការចុះបង្រ្កាបករណីល្បែងស៊ីសងកាលពីថ្ងៃទី៧ ខែសីហានោះ សមត្ថកិច្ចបានឃាត់មនុស្សចំនួន៤នាក់ និងវត្ថុតាងមួយចំនួន។ លោកបន្តថា ជនសង្ស័យម្នាក់ក្នុងចំណោម៤នាក់ ដែលជាអនុភូមិរូង ឈ្មោះ សួង ឌ័ន បានស្លាប់នៅក្នុងឡាន ខណៈកំពុងបញ្ជូនពួកគេទៅបញ្ជាការដ្ឋានកងរាជអាវុធហត្ថខេត្តកំពង់ធំ។
លោក អេង ហ៊ី អះអាងថា ការស្លាប់នេះមិនមែនបង្កដោយអំពើហិង្សានោះឡើយ ប៉ុន្តែអាចដោយសារខ្វះអុកស៊ីសែនក្នុងរថយន្ត។
ទោះជាបែបនេះក្ដី កូនស្រីបង្កើតរបស់លោក គឺកញ្ញា ឌិន នារតី ធ្លាប់បានអះអាងប្រាប់វីអូឌីថា ឪពុករបស់ខ្លួនបានស្លាប់ក្នុងរថយន្តសមត្ថកិច្ច ក្រោយមន្ត្រីប៉េអឹមបានចាប់ខ្លួនគាត់ ហើយសង្កត់នៅត្រង់ក ដែលធ្វើឱ្យគាត់ដកដង្ហើមមិនរួច។ កញ្ញាបានទទូចឱ្យរដ្ឋាភិបាលជួយរកយុត្តិធម៌ក្នុងករណីនេះ ត្បិតឪពុករបស់គាត់មិនមែនស្លាប់ដោយសារជំងឺឡើយ។
នាយកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ដែលតាមដានរឿងនេះ មានប្រសាសន៍ថា បើដូចការលើកឡើងរបស់កញ្ញា ឌិន នារតី ថាអ្នកដែលក្រៀកកឪពុករបស់ខ្លួនមិនត្រូវបានចាប់យកមកផ្តន្ទាទោសនោះ គួរតែបង្ហាញភស្តុតាងនិងរកសាក្សីស្នើទៅតុលាការនៅអំឡុងពេលស៊ើបអង្កេតនេះឱ្យជួយរកយុត្តិធម៌ជូនគ្រួសារគាត់ ។
លោកមានប្រសាសន៍ថា៖ «វានៅមានមន្ទិលសង្ស័យខ្លះ បើសិនជាក្រុមគ្រួសារ ឬក៏សាក្សីដែលបានឃើញថាមានអ្នកសង្កត់កពិតមែន គួរតែចេញមកធ្វើជាសាក្សី ដើម្បីឱ្យមានការស្រាវជ្រាវបន្តទៀតទៅរកអ្នកពាក់ព័ន្ធ ដើម្បីជាយុត្តិធម៌ពេញលេញនោះ»៕