លោកនាយករដ្ឋមន្ត្រី ហ៊ុន សែន ប្រកាសមិនចាត់វិធានការលើលោក ខឹម វាសនា ឬប្រើប្រាស់កម្លាំងក្នុងការបង្ក្រាបណាមួយទៅលើការប្រមូលផ្ដុំពលរដ្ឋដែលជាអ្នកគាំទ្រគណបក្សសម្ព័ន្ធដើម្បីប្រជាធិបតេយ្យ នៅតំបន់ភ្នំគូលេន ខេត្តសៀមរាប នោះទេ ដោយបារម្ភខ្លាចចូលអន្ទាក់ បើទោះបីលោករងការជេរប្រមាថពីសំណាក់លោក ខឹម វាសនា ក៏ដោយ។
ក្នុងពិធីបើកការដ្ឋានសាងសង់ស្ពានអាកាស ក្នុងរាជធានីភ្នំពេញ នាព្រឹកថ្ងៃពុធនេះ លោកនាយករដ្ឋមន្ត្រី ហ៊ុន សែន ថ្លែងថា អ្នកគាំទ្ររូបលោកជាច្រើនបានប្រតិកម្ម និងស្នើឱ្យចាត់វិធានការលើលោក ខឹម វាសនា ដែលបានប្រើពាក្យសម្ដីធ្ងន់ធ្ងរជេរប្រមាថលើរូបលោក។
លោកបន្តថា គោលបំណងរបស់លោក ខឹម វាសនា គឺចង់ឱ្យរដ្ឋាភិបាលប្រើប្រាស់កម្លាំងបំបែកកន្លែងជួបជុំ ប៉ុន្តែរឿងនេះ លោកមិនចូលអន្ទាក់លោក ខឹម វាសនា ឡើយ ទើបលោកបញ្ជាទៅកម្លាំងសមត្ថកិច្ចឱ្យនៅស្ងៀមស្ងាត់ កុំតបត ឬមានវិធានការណាមួយទៅលើក្រុមលោក ខឹម វាសនា ទោះបីជាលោកត្រូវទទួលរងការជេរប្រមាថ និងត្រូវបានក្រុមប្រឆាំងមួយចំនួនចោទរូបលោកថា បង្កើតព្រឹត្តិការណ៍ដើម្បីលុបបំបាត់រឿងកូនប្រុសរបស់លោក គឺលោក ហ៊ុន ម៉ាណែត ទៅវៀតណាម និងករណីភ្នំតាម៉ៅ ជាដើម។
លោក ហ៊ុន សែន បានថ្លែងថា៖ «បងប្អូនអ្នកគាំទ្រខ្ញុំ ដែលយប់មិញបានបង្ហាញកំហឹងពុះកញ្ជ្រោលអំពីសារដ៏ធ្ងន់ធ្ងរ ដែលឯកឧត្ដម ខឹម វាសនា ធ្វើការប្រមាថចំពោះខ្ញុំ ជេរគ្រប់សព្វរហូត “អាខ្វាក់” ប៉ុន្តែជាបន្ទាន់ ខ្ញុំបានចេញបទបញ្ជាថា អ្វីដែលលោក ខឹម វាសនា ចង់បាននោះ គឺចាប់បង្ខំឱ្យរាជរដ្ឋាភិបាលប្រើប្រាស់កម្លាំង គឺផ្ទេរពីអបិយជំនឿទៅកាន់នយោបាយតែម្ដង។ សូមកុំចូលអន្ទាក់ ខឹម វាសនា ឱ្យសោះ! អ៊ីចឹងបានយប់មិញ ខ្ញុំត្រូវប្រុងប្រយ័ត្នបន្ទាប់ពីមានសារ ព្រឹកមិញនេះហើយនៅតែមានសារ វាយចូលអាមួយនេះជេរអញ្ចេះៗ មិនគួរអត់ឱនអញ្ចេះៗ។ ខ្ញុំប្រិបភ្លាម ខ្ញុំបញ្ជាទៅ[អាជ្ញាធរខេត្ត]សៀមរាប ប្រយ័ត្ន អត់មានធ្វើសកម្មភាពអីទេ»។
លោកនាយករដ្ឋមន្ត្រី ហ៊ុន សែន បានបញ្ជាក់ដែរថា មូលហេតុដែលលោកមិនឱ្យសមត្ថកិច្ចចាត់វិធានការ ដោយសារលោក ខឹម វាសនា មិនបានអំពាវនាវឱ្យប្រមូលកម្លាំងដើម្បីផ្ដួលរំលំរដ្ឋាភិបាលដូចក្រុមគណបក្សប្រឆាំងឡើយ។
លោកថា៖ «ខឹម វាសនា គាត់អត់បានអំពាវនាវឱ្យប្រជាពលរដ្ឋងើបបះបោលផ្ដួលរំលំរដ្ឋាភិបាលដូចអ្នកដទៃទេ គាត់អត់បានអំពាវនាវឱ្យកម្លាំងប្រដាប់អាវុធផ្ទេរចុងកាណុងមកបំផ្លាញរដ្ឋាភិបាលទេ គាត់អត់បានអំពាវនាវឱ្យបរទេសកាត់ជំនួយពីស្រុកខ្មែរទេ ខុសពីអ្នកដទៃ។ គាត់ត្រឹមតែថា ពិភពលោកនឹងលិចលង់ស្លាប់អស់ នៅសល់តែកន្លែងគាត់ហ្នឹង ហើយបើសិនទៅមិនបានទេ ពេលដែលមានហេតុការណ៍កើតឡើង នឹកដល់ ខឹម វាសនា បាន ប៉ុន្តែខ្ញុំអត់យកការសន្និដ្ឋានថាគាត់ជាមនុស្សឡប់ សរសៃប្រសាទ វាមិនគ្រប់អញ្ចេះអញ្ចុះទេ នេះជាការប្រមាថមួយ»។
កាលពីថ្ងៃទី២៥ ខែសីហា កន្លងទៅនេះ លោក ខឹម វាសនា ដែលគេស្គាល់ជាទូទៅថាជាមេបក្សសម្ព័ន្ធដើម្បីប្រជាធិបតេយ្យ បានបង្ហោះសារនៅលើបណ្តាញសង្គមហ្វេសប៊ុកផ្ទាល់ខ្លួនរបស់លោក ដោយលើកឡើងថា បាងកកនឹងត្រូវរលំ ភ្នំពេញនឹងត្រូវរលាយ ចំណែកព្រៃនគរខ្ចាត់ខ្ចាយ សប្បាយនៅអង្គរវត្ត។
ទោះជាយ៉ាងណា លោកនាយករដ្ឋមន្ត្រី ហ៊ុន សែន បានចេញបញ្ជាទៅសមត្ថកិច្ចឈរជើងនៅខេត្តសៀមរាប ឱ្យបិទទីតាំងចម្ការរបស់លោក ខឹម វាសនា ចាប់ពីយប់រំលងអធ្រាត្រឈានចូលថ្ងៃទី៣១ ខែសីហានេះ ក្រោយឱសានវាទបានបិទបញ្ចប់។ លោកថា ប្រជាពលរដ្ឋនៅទីនោះអាចចេញពីចម្ការនោះបាន តែចូលវិញមិនបាននោះទេ។ ប៉ុន្តែលោកបានបញ្ជាឱ្យសមត្ថកិច្ចផ្ដល់អាហារ និងយករថយន្តទៅដឹកប្រជាពលរដ្ឋដែលមានគោលបំណងចង់ត្រលប់ទៅលំនៅឋានវិញ ប្រសិនបើពួកគេគ្មានមធ្យោបាយត្រលប់ទៅផ្ទះវិញ។
អភិបាលរងខេត្តសៀមរាប លោក លី សំរិទ្ធ លើកឡើងថា អាជ្ញាធរបានរៀបចំរថយន្តរួចរាល់ហើយ សម្រាប់ដឹកប្រជាពលរដ្ឋដែលចាកចេញពីចម្ការលោក ខឹម វាសនា ត្រលប់ទៅផ្ទះវិញ បន្ទាប់ពីបានទទួលបទបញ្ជាពីប្រមុខរដ្ឋាភិបាល។
លោកថា៖ «ការដាក់កម្លាំងគោលដៅកន្លែងសំខាន់ៗ មិនឱ្យមនុស្សចូល ប៉ុន្តែចេញមកវិញ។ យើងអំពាវនាវលើកទឹកចិត្តឱ្យគាត់ចេញមកវិញ ក្នុងករណីគ្មានមធ្យោបាយដឹកជញ្ជូន អាជ្ញាធរជួយ»។
ប្រតិកម្មតបរបស់លោកនាយករដ្ឋមន្ត្រី ហ៊ុន សែន បានធ្វើឡើងក្រោយពីប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា កាលពីថ្ងៃអង្គារម្សិលមិញ បានបង្ហោះសារលើបណ្ដាញសង្គម ដោយបានជេរប្រមាថលោកនាយករដ្ឋមន្ត្រី ហ៊ុន សែន ដោយប្រើពាក្យធ្ងន់ៗជាបន្តបន្ទាប់ អំឡុងពេលលោកកំពុងជួបអ្នកគាំទ្រនៅខេត្តសៀមរាប។
បើតាមហ្វេសប៊ុក លោក ខឹម វាសនា បានសរសេរថា៖ «កុំខ្លាចពួកអាខ្វាក់ ពូមិនដែលជេរវាអ៊ីចឹងទេ តែពេលនេះពូដឹងថា ពួកវាធ្វើក្ដិតអាចម៍អីពូមិនកើតទេ ហើយធ្វើកូនចៅពូទាំងអស់នៅក្នុងលោកក៏មិនកើតដែរ កុំថាប៉ះរោមជើង ប៉ះតែអាចម៍កូនពូទាំងអស់ម្នាក់ណាក៏ដោយ វាធ្វើអីពួកយើងមិនកើតទេ។ ពូជាស្ដេចចក្រ បើពូគ្មានឫទ្ធិទេ ពួកអាចោរអស់ខ្វាក់អស់នេះ វាមកធ្វើពូភ្លាម ឱ្យពួកវាមកទៅ ធ្វើអាចម៍អីពូមិនកើតទេ។ បើពូហ៊ាននិយាយពាក្យហ្នឹងកណ្ដាលនគរអាខ្វាក់ហើយ កូនខ្មែរមិនភ្ញាក់ដឹងថាពូជាអ្នកណាទៀត ភ្លើងាប់ជាមួយអាខ្វាក់ហ្នឹងទៅ»។
ស្ថាបនិកនៃអង្គការអភិវឌ្ឍន៍ផ្នត់គំនិត លោក សេក សុជាតិ ចាត់ទុកការប្រកាសរបស់លោកនាយករដ្ឋមន្ត្រី ហ៊ុន សែន ថាជារឿងល្អ ហើយលោកចង់ឃើញការអនុវត្តដូចគ្នានេះជាមួយគណបក្សប្រឆាំងដែរ ដើម្បីបង្ហាញពីតម្លាភាព និងការអនុគ្រោះចំពោះភាគីពាក់ព័ន្ធដែលមាននិន្នាការផ្ទុយពីគណបក្សប្រជាជនកម្ពុជា ក្នុងនាមជាប្រមុខរដ្ឋាភិបាល។
លោកយល់ថា៖ «ក្នុងកាលៈទេសនេះ កាលណាតែរដ្ឋាភិបាលហ៊ានមានវិធានការណាមួយគណបក្ស LDP [គណបក្សសម្ព័ន្ធដើម្បីប្រជាធិបតេយ្យ] មានក្ដីព្រួយបារម្ភ ពួកគាត់មិនចាកចេញពីដីចម្ការលោក ខឹម វាសនា ហើយនឹងអាចទ្រាំអាចធ្វើកិច្ចការផ្សេងៗទៀត តាមការញុះញង់ តាមការចង្អុលបង្ហាញរបស់ប្រធានបក្ស LDP ហ្នឹង។ អ៊ីចឹងកាលៈទេសៈនេះ យ៉ាងណាក៏ដោយ គួរតែបំបែកសិន ហើយគ្មានអ្នកណាដឹងច្បាស់ដែរថា លោក ហ៊ុន សែន នឹងចាត់ការឬមិនចាត់ការ។ ជាទូទៅ ក្នុងដំណាក់កាលនេះ យើងយល់ថា គាត់មិនចាត់ការភ្លាមទេ វាអាចបង្កជាបញ្ហាស្មុគស្មាញ ហើយវាអាចធ្វើឱ្យប៉ះពាល់សភាពការណ៍នយោបាយនៅក្នុងប្រទេស»។
កាលពីថ្ងៃទី២៥ ខែសីហា លោក ខឹម វាសនា បានអំពាវនាវនៅលើបណ្ដាញសង្គមហ្វេសប៊ុករបស់លោកថា នៅថ្ងៃទី៣០ ខែសីហា គឺជាថ្ងៃដែលពិភពលោកនឹងត្រូវលិចលង់ដោយទឹកជំនន់ សូម្បីតែរាជធានីភ្នំពេញ ក៏មិនអាចនឹងទប់ទល់ចំពោះគ្រោះធម្មជាតិនេះបានដែរ។ លោកអះអាងថា ទីតាំងដែលអាចជួយសង្រ្គោះជីវិតមនុស្សបាន គឺមានតែនៅចម្ការម្រេចរបស់លោក ដែលស្ថិតក្នុងឃុំត្បែង ស្រុកបន្ទាយស្រី ខេត្តសៀមរាប តែមួយគត់។ លោកបន្តថា ការអះអាងដូច្នេះ ដោយសារលោកគឺជាព្រហ្មចុះមករក្សាលោក ហើយលោកដឹងពិតថា វានឹងមានព្រឹត្តិការណ៍ដ៏អាក្រក់នេះកើតឡើងចំពោះពិភពលោកមួយនេះ។
ក្រោយការអំពាវនាវនេះ បើតាមសេចក្តីរាយការណ៍នានាពីសារព័ត៌មានក្នុងស្រុកដែលដកស្រង់សម្ដីពីអាជ្ញាធរ ឱ្យដឹងថា អ្នកគាំទ្រគណបក្សសម្ព័ន្ធដើម្បីប្រជាធិបតេយ្យ ដែលបានទៅស្នាក់នៅដីចម្ការម្រេចរបស់លោក ខឹម វាសនា មានប្រមាណជិត២ម៉ឺននាក់៕
